Red Purple Black
Kurdistanigawre@gmail.com
جەنگی بێدەنگی ئیسلامییەکان لەدژی ئازادی رادەربڕین دانا مه نمى

دکتۆر ئەحمەد ئەبو مەتەر لەوتارێکدا کەلەسایتی ئیلاف لە14/9/2010دا بڵاویکردۆتەوەو دەڵێ کاردانەویە موسوڵمانەکان بێگومان بەهاندانی سەلەفییە جۆراوجۆرەکانی لەپشتی پەردەوە لەبەرامبەر سووکایەتیکردن بەئیسلام و پێغەمبەرەکەی سووکایەتیکردنی زیاتر دەگەیەنێت بەئیسلام بڕوانە بڵاوکراوەی ئینستان مەرکەزی ژمارە4797ی 15/9/2010 لاپەڕە 44 ئەوەش بێهۆنییە چونکە سەرجەمی ئەو کاردانەوانە تێکەڵەیەکی سەیرە لەرەفتارێکی نامەردەنیانیە پڕ لەدەمارگیری ئایننی و توندتیژی و سووتاندنی پڕ لەرەق و کێنەی ئاڵاو سونبولەکانی ئەوانەی ترو کوشتن و تیرۆر ئێمە خۆمان لەکوردستاندا شاهیدی ئەو جۆرە کاردانەوە دەمارگیرانە بووینە، بەتایبەتی لەهێرشیاندا بۆ سەر پەرلەمانی کوردستان لەئەنجامی دووبارە بڵاوکردنەوەی و وەتارۆکەیەکی بێناوەرۆک و پوچی کەسایەتییەکی کاڵفامی نەخۆش لەگۆڤارێکی بێ ئەرزشی بی َخوێنەری بازاڕی لەهەولێر. بێگومان رەوتە ئیسلامییە سیاسیە ناوەرۆک سەلەفییەکانی کوردستانیش چاوەچاوی رووداوێکی بێبەهای لەو جۆرەن بۆ تێکدانی ئاشتەوایی کۆمەڵایەتیی بەمەبەستی گەیشتن بەدەسەڵات ئایە بەراستی سووکایەتیکردن بەپێغەمبەریان سووتاندنی قورئان لەلایەن دەمارگیرێکەوە لەئەوروپاو ئەمریکا سووکایەتی بەئیسلام دەگەیەنێ یان سووتاندنی هەمان قورئان لەلایەن خەلیفەیەکی موسوڵمانانی سوننەوە سووکایەتی زیاتر دەگەیەنێ کەتائێستاش لەمێژووی ئیسلامدا بەموسوڵمان و خەلیفەی دەخوێننەوە دکتۆر ئەحمەد ئەبو مەتەر لەهەمان وتاریدا نووسیویەتی هەندێک عەرەب و موسڵمان هەن لەبۆچوون و رەفتاریاندا بەرامبەر بەهەندێک کێشەی لێکچوو دووروون، چونکە ئەو هێرشە پڕ لەهاشوهوشەی لەدژی قەشەتێری جۆنز بەرێخرا بەبیانووی ئەوەی ناوبراو بۆیلادی نۆیەمین ساڵەی هێرشە تیرۆریستییەکاین یانزەی سێپتەمبەر هەڕەشەی سووتاندنی قورئانی کردبوو، لەتەواوەتی ناکۆکە لەگەڵ ئەو بێدەنگییە مێژوییەی موسڵمانە سوننەکان لەبەرامبەر دراندنی قورئان لەلایەن خەلیفەی موسوڵمانانەوە وەلیدی کوڕی یەزیدی کوڕی ئیبن عەبدو لمەلیک، کەچی هەتا ئێستاش هەر لەخەلفەو حاکم و موسوڵمان ناوی دەبن و ئەو کردەوە قێزەوەنەی باس ناکەن و لەبیرخۆیانی موسوڵمانانی دەبنەوە کەلەزۆربەی کتێبە مێژوییەکاندا تۆمارکراوە. دەڵێن بەیانییەکان وەلید قورئان دەکاتەوەو ئایەتی ؟؟؟؟؟ وخاب کل جبار عتیدی بۆ دەرئەچێت توورە دەبێ و قورئانەکە دەدرێنێ و بەهەوادا پەرتی دەکاو بەدەم ئەوەوە ئەم دوو دێرە شعیرە دەڵێ:
هەرەشە لەهەمو زۆردارێکی کەللەرەق دەکیت؟
ئائەوەتا من زۆردارو کەللەرەقم
ئەگەر لەرۆژی حەشردا چوویتە بەردەم خوای خۆت
بڵێ خوایە وەلید بوو منی دراند
هۆی چییە عەرەب و موسوڵمانەکان ئەو کردەوەیە کەئەوپەڕی سووکایەتیکردنە بەزاتی خودایی لەبیرخۆیان ئەبەنەوە؟ کەچی هەر هەموو ئوومەت بەو هەڕەشەیەی قەشەتێری جۆنزەوە خەریک دەکەن؟ پێدەچێ بەشێک لەو عەرەب و موسڵمانانە لەوەش پەست وتووڕە بووبن کەقەشە ئەمریکییەکە هەڕەشەکەی نەبردە سەر بەسووتاندنی قورئان، چونکە بەو پەشیمانبوونەوەیە دەرفەتێکی چاکی لەدەستی ئە دەمارگیرانەدا بۆ خۆپشاندان و سووتاندن و هەڕەشە و قیژوقاژو لەخۆدانن... تەنانەت هیچ بەدووریش نابینرێت ئەگەر ئیسلامییە سیاسییە سەلەفییەکان بەبەرنامەوە وردە رووداوی جۆراوجۆری سووکایەتیکردن بەپیرۆزییەکانی ئیسلام بخوڵقێنن تەنها بۆ ئەوەی بۆ مەرامە سیاسییەکانیان ئاژاوەی کۆمەڵایەتی بنێنەوە. بەڵام ئەگەر لەو تیۆرییەی پلانێگرانەش دوورکەوینەوە، بەو رۆژگارانە دەبینرێ کەلەلایەن خودی پیاوانێکی ئایینییەوە سووکایەتی بەئیسلام دەکرێ، بەتەواوی سەیرەو سەمەرە دەدرێ، لەپاڵ ئەوانەشدا سووکایەتی بەئەقڵی خەڵکە رەشۆکە موسوڵمانەکان دەکرێ، بەڵام نەمانبیی و نەمانبیست هیچ کاردانەوەیەکی نەرم یان توند بەرامبەر بەو جۆرە سووکایەتیانە نیشانبدرێت کەلەلایەن خودی کەسانێکەوە ئەنجام ئەدرێت کەبەرامبەر بەئایینیەکەیان دڵسۆزو دەمارگیرن. ئەمەش باسێکی ترەو دەکرێ لەدەفەرتێکی تردا بگەڕێنیەوە سەری لێرەدا ئەم پرسیارە دێتە پێشەوە. ئایا یاسایەک بۆ پاراستنی پیرۆزییە ئاینییەکان دەبێ ئەحکامی چیبێت بەرامبەر بەسووکایەتیکردن بەو پیرۆزیایە کەلەلایەن مەلاو ئایینییەوە ئەنجام بدرێت؟
لەتازەترین كتێبی مەلایەكی وەهابی سەعودیدا بەناونیشانی راستی شارستانێتی ئیسلامیدا كەناوی شێخ ناسرین حەمەد ئەلفەهدە، پەردە لەسەر ئەو راستیانە هەڵدراوەتەوە كەئەو زانا موسوڵمانانەی لەڕووی زانست و زانیارییەوە پشكیان هەبووە لەبەرەو پێشبردنی مەعریفەی مرۆڤایەتیدا هەر هەموویان مولحیدو خوانەناس بوونە. شێخ ناسر لەو كتێبەیدا دەیسەلمێنێ یەك بەدواییەك كەئیبن سینا، ئیبن ئەلموقەفەع، جابرین حەییان، جاحیز، خەوارزمی، كیندی، رازی، فارابی، مەجریتی، ئیبن ئەلهەیسەم، ئەبو عەلای مەعەرری، ئیبن توفەیل، ئیبن رەوشد، نەسیرەددینی تووسی، ئیبن بەننا، ئیبن بەتوتە، و زۆری تریش هەر هەموویان كافر، مولحید و زەندیق بوونە، بۆ نمونە لەبارەی ئاماژە بۆ گوتەیەكی ئیبن قەیمی جۆزیە، كراوە كەدەڵێ: ئیبن سینا ئیمامی مولحیدە كافرەكانە بەخواو مەلا یكەت و كیتاب و پێغەمبەرەكان و ئاخیرەت. مێژووی ئیسلام پڕە لەسووكایەتیكردن بەپیرۆزییەكانی ئیسلام لەلایەن خودی گەورەپیاوانی ئیسلامەوە ئەگەر بمانەوێ ریزیان بكەین بەدەیان وتاری وەك ئەم وتارە تەواو نابن. بەڵام لەوانەش سەیرەو سەمەرە ترسناكتر سووكایەتیكردنە بەئەقڵی مرۆڤ لەرێگای بڵاوكردنەوەی فەتوای پڕوپووچی خوارافییەوە لەلایەن مەلای جۆراوجۆرەوە بەبێئەوەی بچووكترین بەها بۆ ئینسانەكان دابنێن وەك بڵێ ئەو خەڵكە گایەل بن. شێخێكی میسری دەڵێ حەرامە ژن مۆز بخوات چونكە زەكەری پیاوی بیر دەخاتەوەو شەهوەت و حەزی دەجووڵێنێ، ئەو فەتوایەی لەیەكێك لەمزگەوەتەكانی وڵاتێكی ئەسكەندەنافیاداوە. ئەو گوتەیەك ئەگەر بگەیشتایەتە میدیای ئەو ولاتە، بەبێ ئەوەی كاریكاتێر لەسەر پێغەمبەر بڵاوبكەنەوە، ئیسلام زۆر لەو زیاتر دەكرایە گاڵتەجاڕو ئافرەتی موسوڵمانی بورقە پۆشیان دەكردە كەرەستەی خاو بۆ كاریكاترێی نایاب كەلەژێر بورقەوە بەدزییەوە مۆزی دەخوارد. شێخ مەلایەكی تر لەمەغریبەوە فەتوا ئەدات كەئیسلام سێكسی حەرام نەكردوە لەگەڵ تەرمی ژنی مردوودا، شێخە نەخۆشێكی تر كەلەژندا تەنها سێكس دەبینن، بەناوی شێخ عەلی رەوبەیعی فەتوای داوە حەرامە ژن بەرووتی لەگەڵ پیاوەكەیدا بخەوێت و هەر ژنێك ئەوە بكات تەڵاقی خۆی وەرگرتووە. بەو فەتوایە بێت پێموایە كەس لەموسوڵمانان سەلامەت دەرناچێت چونكە هەر دەبێت جارێك لەجاران بەرووتی خەوتبن. فەتوای تردراوە گوایە سەردانی هەرەمەكانی میسر حەرامەو دەچێتە خانەی بت پەرستییەوە پێشتریش شێخە مەلایەكی تری گەمژە فەتوای ئەوەی دابوو كارمەندی ژن، بەتایبەتی ئەگەر كاری سكرتێر بكات، بۆ ئەوەی لەبەڕێوەبەرەكەی حەرام بێت، واتە بۆ ئەوەی ببن بەمەحرەم پێویستە سێجار شیری مەمكی خۆی بەحوزوری مێرەدكەی بدات بەو بەڕێوەبەرە تابەو جۆرە بۆی ببێتە شیركوڕ. مەلایەكی تر لەسەر یوتیوب باسی ئەوە دەكات بەردانەوەی ریش زۆر كاریگەرە بۆ هەڵساندنی ئەندامی نێریەو لەگەڵ گوتەكانیشدا پەیتا پەیتا هەر دەڵێ سوبحانەڵڵا.

لەهەموو ئەوانە سەمەرەتر لەفەتوایەكی تردا راگەیاندراوە حەرامە ژن بچێتە ئاوی دەریاوە بۆ مەلەوان یان بۆ هەر مەبەستێكی تر تەنانەت ئەگەر بەهەموو جلوبەرگ و سەر پۆشیشەوە بێت چونكە دەریا لەرەگەزی نێرینەیە بێگومان ئەوە لەزمانی عەرەبیدایە كاتێكیش كەئاوی دەریا بەر عەورەتی ئەو ژنە بكەوێت واتای ئەوەیە زینای كردووە. بێگومان ئەوە دەبێ تەنها ژنانی عەرەب بگرێتەوە چونكە ئەو شێخە مەلا گەمژەیە لەوە تێنەگەیشتووە لەزمانگەلێكی زۆری غەیرە عەرەبیدا نێرو مێ لەجەمادا نییە. بۆ نموونە لەكوردیدا.

مەلایەكی لای خۆشمان لەپەیجی فەیسبوكی خۆیەوە چەند مانگێك بەر لەئێستا بەبێ هیچ هەستكردنێك بەبەرپرسیارێتی ئەخلاقی و یاسایی سووكایەتییەكی گەورەی بەرامبەر بەگەنجانی ئەم وڵاتە بڵاوكردەوە بەناونیشانی پێنج سیفەت لەسیفتەكانی قەومی لوت كەئێستا لەنێوان كوڕان و كچانمان بڵاون. ناكرێ لێرەدا باسی هەر پێنج خاڵەكەی ئەو وتارۆكە بێ بناغەیە بكەم كەسەرجەمیان گاڵتەكردن و سووكایەتیكردنە بەئەقڵ مرۆڤ. بەگوتەی ئەو مەلایە یەكەمینی ئەو سیفەتانە فیكە لێدانە كەیەكێك بووە لەسیفەتەكانی قەومی لوت، پیاوەكانیان بەكاریان ئەهێنا بۆ بانگكردنی یەكتر بۆ كردنی كاری فاحیشە، لەرۆژگاری ئەمرۆماندا. گەنجەكانمان ئەم رێگەیە بەكارئەهێنن. ئەم مەلایە بەو جۆرە لەكون فەیەكونێكدا هەموو گەنجانی ئەم وڵاتەی كرد بەهۆمۆسێكسوال و بێ ئەخلاق و خۆشی كردووە بەپارێزەری ئەخلاق. هەر باوكێكیش ئەگەر رۆژێك لەرۆژان فیكەی بۆ كۆرپەكەی خۆی لێدابێت، پێویستە گومان لەخۆی بكات و بزانێت نییەتی فاحیشەی هەبووە یان نا. دیارە مەلای ئاین بۆ ئەو فەتوا نەستەقەسی كەداویەتی دەبێ زۆر لەعیلمەكەی دڵنیا بووبێت، ئیتر یان دەبێ خۆی یان پێشنیازێك لەناو قەومی لوتدا بووبن تابەوجۆرە ئەسڵییەكەی چیرۆكەكە، واتە كیتابی تەكوین لەتەوراتدا ئاماژەی لەو جۆرەی تیادا نییە. یان ئەگەر وانەبێت، ئیتر دیارە ئەوە درۆیەكی بێ شەرمانەی هەڵبەستراوەو یەكێكە لەو دەیان پروپووژانەی بەناوی وەعزو فەتواو مەلایەتی و ئیسلامەوە بەناو خەڵكیدا بۆ چەواشەكاری وشتنەوەی مێشك و تۆقاندنی ئەخلاقی بڵاویان دەكەنەوە ئەوە هەم تاوانەو هەم سووكایەتیكردنە بەكۆمەڵگە.

بەراستی ئەگەر لەم وڵاتەدا یاسا سەروەر بێت و داواكاری گشتی هۆشیارو بوێربێت دەبێ ئەو جۆرە مەلایەكە بەناوی ئیسلامەوە سووكایەتی بەمرۆڤ دەكا بەتۆمەتی جنێودانی ئاشكرا ؟؟؟؟ بەمیللەتێك و بەتۆمەتی هەڵبەستنی تۆمەتی درۆ بۆ خەڵك ئەویش لەبواری نامووسیدا. بدرێتە دادگاو سزا بدرێ. گەنجانی ئەم وڵاتەش ئەگەر دەربەست بوونایە دەبوا لەدژی ئەو مەلایەو هەموو ئەوانەی لەپشتیەوە راوەستاون و بەرگری لەو سووكایەتیانە دەكەن گەورەترین كەمپین بەڕێ بخەن. كەچی هەر ئەو جۆرە مەلاو پیاوە ئایینییە سیاسییە دەمارگیرانەن لەهەوڵی ئەوەدان یاسایەكی دژە دیموكراتیانە بەناوی پاراستنی پیرۆزییەكانی ئایینەوە بەسەر كۆمەڵدا داسەپێنرێ و لەئەنجامدا تەنانەت فیكە لێدان بۆ بولبولیش قەدەغە بكەن.

زۆرم لەلایە لەو جۆرە فەتوا پروپووچ و دژە ئینسانیانە كەئەوپەڕی سووكایەتیكردنن بەبەها مرۆییەكانی مرۆڤ و هیچ یاسایەكیش نییە پێشیان لێبگرێ و خاوەنەكانیان سزا بدات. بەرای من پێویستە لیژنەی مافی مرۆڤ لەپەرلەمان ئەگەر هەبێت بكەوێتە خۆی و پرۆژە یاسایەكی تێروتەسەل گەڵاڵە بكات لەژێر سەردێڕی پرۆژە یاسای پاراستنی بەهاو مرۆییەكان لەدژی خورافەو پڕوپووچ و سووكایەتیكردن بەئەقڵی مرۆڤ. لەواقیعدا كێ سووكایەتی بەپیرۆزییە ئایینییەكان دەكات؟ پێشتر نووسییومەوە لێرەشدا دووبارەی دەكەمەوە كەبەو رۆژگارانە دەبینرێ و دەبیسترێ كەلەلایەن خودی پیاوانێكی ئایینییەوە لەرێگای ئەو جۆرە فەتواو بیرو بۆچوونە گاڵتە جارانەوە ئیسلام سووك دەكەن و سووكایەتی بەئیسلام دەكەن، لەپاڵ ئەوەشدا سووكایەتی بەئەقڵی خەڵكە رەشۆكە موسوڵمانەكان دەكرێ، بەڵام نەمانبینی و نەمانبیست لەلایەن هیچ پیاوێكی ئایینی هۆشیارەوە كاردانەوەیەكی نەرم یان توند بەرامبەر بەو جۆرە سووكایەتییانە نیشان بدرێت كەلەلایەن خودی كەسانێكەوە ئەنجام ئەدرێن كەبەرامبەر بەئایینییەكەیان دەمارگیرن. ئەوەش یەكێكە لەخەسڵەت و سیفەتەكانی قەومی دووڕوو.

Share