Red Purple Black
Kurdistanigawre@gmail.com
عومه‌رێکی ئازا و گه‌وره.. ئاسۆ عه‌زیز

omar

یه‌کێک له خاڵه لاوازه‌کانی من وه‌ک ئاسۆ عه‌زیز، بریتییه له هه‌ستیارییه‌کی گه‌وره، به‌شێوه‌یه‌ک که دڵمی هێنده‌ی په‌ڕه‌ی گوڵێک ناسک کردووه. ڕووداوێک، باروودۆخێک یاخوود هه‌ر شتێکی تراژیدیی، که تێیدا بژییم و به‌هۆیه‌وه هاوڕێم، که‌سم، دۆستم له‌ده‌ستبده‌م ده‌توانێت وه‌ک منداڵ بمگریه‌نێت. هه‌مانکاتیش ئه‌م دیوه‌ی من، بریتییه له دیوه ئێتیکیی و مۆڕاڵییه‌که‌م، که مرۆڤایه‌تیی له خۆیدا هه‌ڵگرتووه. دیاره هه‌موو مرۆڤێک توانای گریانی له باروودۆخه تراژیدیاکاندا نییه، به‌ڵام من ئه‌و مرۆڤه‌م، که به بیرکردنه‌وه‌ش لێیان خه‌مبار ده‌بم و وه‌ک جاری جاران، که ڕووداوه‌که تازه ڕوویداوه ده‌گریێم.

گریانی ئه‌مجاره‌م بۆ هاوڕێیه‌کی دێریین، بۆ گه‌نجێک که له هه‌ڕه‌تی گه‌نجێتییدا نیشتیمان به کٶلییه‌وه بوو، گووند به گووند و کێو به کێو ده‌یگێڕا، هه‌تاوه‌کوو فاشییه‌کانی به‌عس هه‌تکی نه‌که‌ن. تراژیدیای عومه‌ر له‌وانی تر ناچێت، چونکه که‌سمان ئاگاداری چیرۆکی ڕوودانی ڕووداوه‌که‌ی نین، به‌ڵام هه‌سته‌کانمان پێمانده‌ڵێت، ئیتر له چاوه‌ڕوانیی عومه‌ردا فرمێسکه‌کانتان له چاوانتاندا قه‌تیس مه‌که‌ن، به‌ڵکوو لێبگه‌ڕێن که بچۆڕێته خواره‌وه و کوڵمتان ته‌ڕبکات، چونکه عومه‌ر چیتر ناگه‌ڕێته‌وه لاتان.
هه‌فته‌ی ڕابوورد له خۆپیشاندانه گه‌وره‌که‌ی شاری کۆلندا، بۆ پشتگیریی کۆبانێ، من چه‌ند به‌خته‌وه‌ر بووم، به‌ڵام هێنده‌ش خه‌مبار بووم. به‌بێئه‌وه‌ی بزانم هۆکاری خه‌مبارییم چییه. له گه‌ڕانه‌وه‌مدا بۆ ماڵه‌وه ئه‌و شه‌وه هیچ باش نه‌نووستم و خه‌مبارییم هه‌تا ده‌هات دڵته‌نگتری ده‌کردم و خه‌وی له چاوه‌کانم ده‌زڕاند. له‌ناکاودا له هه‌ناوی دوکه‌ڵی سووتانی کۆبانێدا عومه‌رم له ناوه‌ڕاستی دوکه‌ڵی سووتانی کۆبانێدا بینی، که شه‌هید ده‌بوو. بینینی عومه‌ر له خه‌یاڵێکی ئاوهادا زه‌نگی شه‌هیدبوونی عومه‌ر بوو. به‌شێوه‌یه‌ک وه‌ک پێویست بێت عومه‌ر جارێکی تر شه‌هیدبێته‌وه، هه‌تاوه‌کوو من درکپێبکه‌م، که عومه‌ر شه‌هید بووه. عومه‌ر له ساڵی 1986ه‌وه ونه، به‌بێئه‌وه‌ی هیچ که‌س بزانێت چیی لێبه‌سه‌رهات و بۆچیی له‌ناکاودا دیار نه‌ما؟ خۆپیشاندانه‌که‌ی کۆلن هۆکارێک بوو بۆ خه‌مبارکردنم، خه‌مبارکردنیشم هۆکارێک بوو بۆ گێڕانه‌وه‌ی ئه‌م چیرۆکه‌ی عومه‌ر. ده‌زانم ئێستا تۆی ئازیز وه‌ک خوێنه‌ر ده‌پرسیت، ئاخۆ ئه‌م عومه‌ره کێ بێت؟ وه‌ڵامی منیش بریتییه له:
عومه‌ر ئه‌مین، یاخوود عومه‌ر کاک ئه‌مین، که له‌ناو هێزی پێشمه‌رگه‌دا به عومه‌ره بچکۆلی قه‌ره‌داغ ناسرابوو، چونکه باڵایه‌کی بچکۆلانه‌ی هه‌بوو، به‌ڵام غیره‌تێکی گه‌وره به وێنه‌ی شێر، ئه‌مه‌ش بریتیی بوو له گه‌وره‌یی عومه‌ر. عومه‌ر له ساڵی 1981دا هاته گووندی زڕگوێز بۆئه‌وه‌ی ببێت به پێشمه‌رگه. که پێیان وتم، گه‌نجێک هاتووه، ببێت به پێشمه‌رگه، چووم بۆ لای، که بینیم هه‌ر زۆر منداڵ بوو. من که‌وتمه گفتووگۆ له‌گه‌ڵیدا، ناوت چییه، ته‌مه‌نت چه‌نده، خه‌ڵکی کوێی، دایک و باوکت چ کاره‌ن، خانووی خۆتان هه‌یه یان کرێچیین ....هتد. له وه‌ڵامی پرسیاره‌کانیدا ده‌رکه‌وت، که خێزانێکی هه‌ژارن و باوکی ئێشکگری ده‌واجنێکه له سلێمانیی، به‌و مووچه‌یه‌ش که به‌ده‌ستی دێنێت ناتوانێت خێزانێک به‌خته‌وه‌ر بکات. هه‌رچۆنێک بێت باوه‌ڕم به عومه‌ر هێنا، که بچێته‌وه بۆ سلێمانیی و درێژه به ژیانی خوێندن بدات و پشتگیریی باوکی و خێزانه‌که‌ی له به‌خته‌وه‌رکردنیدا بکات.
به‌ڵام دوای ساڵێک عومه‌ر دیسانه‌وه هاته‌وه، ئه‌مجاره‌یان کڵاشینکۆفێکیشی له‌گه‌ڵ خۆیدا هێنابوو. ئه‌و کڵاشینکۆفه‌ی له‌کوێ بوو، چۆنی هێنابوو،نامه‌وێت لێره‌دا باسیبکه‌م. ئه‌وه‌ی له‌سه‌ر من بوو بیکه‌م، سه‌ره‌تا ئه‌وه‌ بوو، که ڕێگریی بکه‌م، که به‌هۆی ئه‌و کڵاشینکۆفه‌وه زیان به که‌س و کاره‌که‌ی بگات. هه‌ربۆیه هه‌رئه‌و ڕۆژه کڵاشینکۆفه‌که‌م گه‌یانده‌وه سلێمانیی و ده‌ستی خاوه‌نه‌که‌ی، به‌و مه‌رجه‌ی ئه‌ویش بێده‌نگ بێت و کێشه بۆ که‌سوکاری عومه‌ر دروست نه‌کات. عومه‌ر به به‌خته‌وه‌ریی له‌لامان وه‌ک پێشمه‌رگه مایه‌وه.
دوای ماوه‌یه‌کی که‌م عومه‌ر به‌مه‌شه‌وه نه‌وه‌ستا و ئاره‌زوومه‌ندێتییه‌کی گه‌وره‌ی چالاکیی پارتیزانیی هه‌بوو. هه‌ربۆیه زۆر زوو ده‌ستیکرد به چالاکیی و له ماوه‌یه‌کی کورتدا به‌هۆی ئازایه‌تیی و جه‌ربه‌زه‌ییه‌که‌یه‌وه کرا به ئامر مه‌فره‌زه. له‌و ماوه کورته‌دا، عومه‌ر شاره‌زاییه‌کی باشی له دانانی که‌مین و هێرشبردن و به‌رگرییدا په‌یدا کرد. ئه‌مه‌ش عومه‌ری کرد به یه‌کێک له پێشمه‌رگه خۆشه‌ویسته‌کان چ له‌ناو هێزی پێشمه‌رگه‌دا و چ له‌ناو ئاواییدا له ناوچه‌ی قه‌ره‌داغ. عومه‌ر هه‌میشه خاوه‌نی قسه‌ی خۆی بوو له کۆبوونه‌وه‌‌کاندا، یه‌کێک بوو له‌و پێشمه‌رگانه‌ی، که هه‌میشه به‌بێ ترس و به ئاشکرا خاوه‌نی ڕه‌خنه بوو له‌کاتی خۆی و پێویستدا.
له‌سه‌ره‌تای سه‌رهه‌ڵدانی ئاڵای شۆڕشدا، عومه‌ر بوو به ئه‌ندامێکی ئاڵای شۆڕش و له‌لایه‌ن هێزی پێشمه‌رگه‌ی یه‌کێتیی نیشتیمانییه‌وه ده‌ستگیرکرا. عومه‌ر له زیندانی یه‌کێتییدا وه‌ک ده‌رخستنی ناڕه‌زایه‌تییه‌ک به‌رانبه‌ر به‌و هه‌ڵوێستانه‌ی، که له زینداندا له‌گه‌ڵ زیندانییه‌کانی ئاڵای شۆڕشدا ده‌کرێت، ده‌می خۆی دوورییه‌وه، وه‌ک سمبوڵێک بۆ پاراستنی نهێنییه‌کانی هاوڕێکانی، خۆی پیشانی سه‌رکرده‌کانی یه‌کێتیی ده‌دا. به‌ڵام ئه‌و به‌رپرسه باڵایانه‌ی یه‌کێتیی، که ئێستا هه‌ندێکیان له ژیاندا ماون و ئه‌وانی تریش له‌دوای ڕاپه‌ڕیین له شه‌ڕی ناوخۆدا گیانیان له‌ده‌ستدا، ده‌ستدرێژییه‌کی زۆریان کرده سه‌ر عومه‌ر بۆ ئاشکراکردنی ناوی هاوڕێکانی، به‌ڵام عومه‌ر نه‌به‌ردانه به‌رگه‌ی گرت، ته‌‌نانه‌ت به یه‌کێک له سه‌رکرده‌کان ده‌ڵێ: وامه‌زانه گه‌وره و که‌ڵه‌گه‌ت و خاوه‌ن مه‌چه‌ک و بازووی ئه‌ستووریت، به‌س ئازادم بکه وه‌ک مێش ده‌تده‌م به زه‌وییدا. ده‌شێت ئه‌م قسانه‌ی عومه‌ر به‌رانبه‌ر ئه‌و سه‌رکردانه، وه‌هایکردبێت، که هیچ شتێکی تریان بۆ نه‌مێنێته‌وه له کووشتنی عومه‌ر زیاتر نه‌بێت. هه‌ربۆیه کاتێک ده‌یبه‌ن، ئیتر نایه‌ته‌وه، به‌ڵام له‌و کاته‌وه هه‌تاوه‌کوو ئێستا هیچ که‌س ئاماده‌ی ئاشکراکردنی چاره‌نووسی نه‌بوو.
به‌ڵام کاره‌ساتی کۆبانێ، کاره‌ساتی عومه‌ریشی له‌گه‌ڵ خۆیدا سه‌وز کرده‌وه. ئێستا هه‌ستێکی به‌هێز له هه‌ناومدا پێمده‌ڵێ، که عومه‌ر شه‌هیده. من عومه‌رم له کۆبانێشدا بینی ڕۆحی شاد و یادی هه‌رئاوها به‌رز و بڵند بێت.

1

07.11.2014

هۆڵاند

ئاسۆ عه‌زیز

 

 

 

Share