Red Purple Black
Kurdistanigawre@gmail.com
عه‌ره‌ب توانای نه‌ماوه‌ دژایه‌تی ده‌وڵه‌تی كوردیی بكات

 

YAZDAN_PANAحوسێن یه‌زدانپه‌نا- جێگری سه‌رۆكی پارتی ئازادیی كوردستان:
عه‌ره‌ب توانای نه‌ماوه‌ دژایه‌تی ده‌وڵه‌تی كوردیی بكات
دیمانه‌: ستیڤان شه‌مزینی
* به‌هێزبوونی ناسیۆنالیزمی كورد بووه‌ته‌ خه‌م و ترسی سه‌ره‌كیی ئێران
* ئێران له‌ هه‌موو كێشه‌ و هاوكێشه‌یه‌كی سیاسیی عێراقدا ته‌ڕه‌فه‌
حوسێن یه‌زدانپه‌نا جێگری سه‌رۆكی پارتی ئازادیی كوردستان له‌م دیمانه‌ تایبه‌ته‌دا باس له‌ دۆخی سیاسیی رۆژهه‌لاَتی كوردستان و گرنگیی به‌ستنی كۆنگره‌یی نه‌ته‌وه‌یی كورد و ئه‌گه‌ر دامه‌زراندنی ده‌وڵه‌تی كوردستان ده‌كات له‌ باشوور.
ستیڤان: دۆخی رۆژهه‌لاَتی كوردستان چۆن ده‌بینیت؟ پێتوانییه‌ حزبه‌ كوردستانییه‌كان له‌ رۆژهه‌لاَتی كوردستان كه‌مترین كاریگه‌رییان ماوه‌ له‌سه‌ر دۆخی سیاسیی ئه‌و به‌شه‌ی كوردستان؟.
حوسێن یه‌زدانپه‌نا: له‌ لێكدانه‌وه‌ی گه‌وره‌دا دۆخی رۆژهه‌لاَتی كوردستان هه‌ر به‌ فاكته‌ره‌ سه‌ره‌كییه‌كانی وه‌ك داگیركراویی خاك و بنده‌ستی گه‌ل و هه‌بوونی ده‌یان هه‌زار هێزی پۆشته‌ و په‌رداخی سوپای پاسداران و ئه‌رته‌ش كه‌ له‌ چه‌ندین له‌شكردا رێكخراون و حوكمی دام و ده‌زگا ئه‌منییه‌كان له‌ لایه‌ك و بێ مافی كورد و گرتنی چالاكانی سیاسیی و مه‌ده‌نی و كوشتنی رۆڵه‌ی كورد له‌ سنووره‌كان له‌ لایه‌ك و له‌ خاڵی به‌رانبه‌ریشدا كۆڵ نه‌دانی تاكی كورد و هه‌بوونی جووڵه‌ی كوردایه‌تی له‌ده‌یان خانه‌ی جۆراوجۆردا ده‌ناسرێته‌وه‌. ئه‌و خوێندنه‌وه‌یه‌ دووره‌ له‌ راستی.
حزبه‌كان به‌ رادده‌ی باردۆخی خۆیان كارییگه‌رییان هه‌یه‌. به‌لاَم له‌ راستیدا حزبی سیاسیی كاتێ ده‌توانێ ئه‌كته‌ری چالاكی گۆڕه‌پانی سیاسه‌ت بێ یان له‌ دۆخێكی ئازاددا له‌ ناو خه‌ڵكی خۆیدا بێ ئه‌وه‌ش له‌ رۆژهه‌لاَت نه‌ك بۆ حزبی سیاسیی به‌ڵكو بۆ گروپێكی كاری مه‌ده‌نیش نییه‌، یان ده‌بێ له‌ پرۆسه‌ی شه‌ڕێكی گه‌رموگوڕدا بێ، كه‌ ئه‌وه‌ش له‌ حاڵی حازردا له‌ گۆڕێدا نییه‌. كه‌موكوڕیی سه‌ره‌كیی ئێمه‌ له‌ رۆژهه‌لاَت ئه‌وه‌یه‌ له‌گه‌ڵ ئه‌وه‌دا له‌ دۆخێكی له‌ باردا نین كه‌چی خۆشمان باری خۆمان ئه‌وه‌نده‌ی دیكه‌ لار كردووه‌. له‌م هه‌لومه‌رجه‌دا ده‌كرا به‌ كۆمه‌ڵێك هه‌نگاوی سیاسیی گرینگ تا رادده‌یه‌ك دۆخی له‌ بارمان قه‌ره‌بوو كردبایه‌ته‌وه‌. به‌لاَم به‌ داخه‌وه‌ هاوكات له‌گه‌ڵ ئه‌وه‌ی له‌ دۆخی له‌ باردا نین، نه‌مانتوانیوه‌ به‌ هه‌نگاوی سیاسیی گه‌وره‌ ئه‌و بۆشاییه‌ پڕ بكه‌ینه‌وه‌. ئه‌گه‌ر حزبه‌ سیاسییه‌كانی رۆژهه‌لاَت چه‌ند هه‌نگاوی وه‌ك دامه‌زراندنی به‌ره‌و پێكهێنانی "ده‌وڵه‌تی رۆژهه‌لاَتی كوردستان له‌ ده‌ره‌وه‌ی ولاَت" وه‌ك ئاڵترناتیڤی حاكمییه‌تی ده‌وڵه‌تی ئێران له‌ كوردستان و یه‌كخستنی هێزه‌كانی پێشمه‌رگه‌یان هه‌ڵگرتبا، بێگومان هه‌لومه‌رجی حزبه‌كان و كاریگه‌رییان له‌ سه‌ر ناوخۆی ولاَت جۆرێكی دیكه‌ ده‌بوو. به‌لاَم داخه‌كه‌م كوا ئه‌و بیره‌ نه‌ته‌وایه‌تییه‌، كوا رێبه‌رانی سیاسیی ئازا و بوێر؟.
ستیڤان: باس له‌وه‌ ده‌كرێت گۆڕه‌پانی سیاسیی له‌ رۆژهه‌لاَتی كوردستان چۆڵ بووه‌ و كۆماری ئیسلامی ئێران جگه‌ له‌ پژاك هه‌ست به‌ هیچ مه‌ترسییه‌ك ناكات له‌و پارچه‌یه‌ له‌ دژی خۆی. ئێوه‌ راتان چییه‌؟.
حوسێن یه‌زدانپه‌نا: ترسی راسته‌قینه‌ی ده‌وڵه‌تی ئێران له‌ نه‌ته‌وه‌ی كورده‌. چالاكیی حزبایه‌تی به‌ پێی كات و دۆخ، هه‌را و به‌رته‌سك ده‌بێته‌وه‌، به‌لاَم نه‌ته‌وه‌كه‌ له‌ جێی خۆی ده‌مێنێ. ترس و دڵنیایی ئێران له‌ بوون و نه‌بوونی ژماره‌یه‌ك به‌رهه‌ڵستكار نییه‌، به‌ڵكوو، ترسی سه‌ره‌كی له‌ په‌ره‌گرتنی بیری نه‌ته‌وایه‌تییه‌. بۆ ئێران شه‌ڕی حزبێك و چه‌ند حزبێك، ئه‌رك و ترسێكی گه‌وره‌ نییه‌. له‌ رابردوودا شه‌ڕی زۆر و گه‌وره‌یـان له‌گه‌ڵ كردووه‌. به‌لاَم به‌ قه‌ت یه‌ك هه‌نگاو وریابوونه‌وه‌ی نه‌ته‌وه‌یی و دووركه‌وتنه‌وه‌ی خه‌ڵك به‌ گشتیی و نه‌وه‌ی نوێ به‌ تایبه‌تی له‌ ئێرانچێتی بۆی جێی نیگه‌رانی نه‌بووه‌. بۆیه‌ له‌ راستیدا به‌هێزبوونی ناسیۆنالیزمی كورد بووه‌ته‌ خه‌م و ترسی سه‌ره‌كیی ئێران. سه‌رچاوه‌ی ئه‌م ترسه‌ش، تاك و كۆی كورد له‌ ناو جه‌رگه‌ی شاره‌كاندایه‌.
ستیڤان: كار بۆ گرێدانی كۆنگره‌یه‌كی نه‌ته‌وه‌یی كوردستانی ده‌كرێت به‌ به‌شداریی كوردی هه‌ر چوار پارچه‌ی كوردستان. ئێوه‌ گرنگیی كۆنگره‌یه‌كی نه‌ته‌وه‌یی له‌م ساته‌دا چۆن ده‌بینن؟.
حوسێن یه‌زدانپه‌نا: پێكهێنانی كۆنگره‌ی نه‌ته‌وه‌یی زۆر له‌ مێژه‌ لای پارتی ئازادیی كوردستان به‌ بابه‌تێكی گرنگ و پێویست دانراوه‌. ٢٠ ساڵ له‌مه‌وبه‌ر، له‌ یه‌كێ له‌ پلینۆمه‌كانی كۆمیته‌ی ناوه‌ندیی كه‌ له‌ باره‌گای "بۆتێ" به‌سترا، ئه‌م بابه‌ته‌ كه‌وته‌ ناو ئه‌ده‌بیاتی سیاسیی ئێمه‌وه‌. هه‌روه‌ها ساڵی ٢٠٠٠ له‌ كۆنفرانسی چواره‌می پارتی ئازادیی كوردستاندا، به‌ شێوه‌ی دیاریكراو داوامان كرد كۆنگره‌یه‌كی نه‌ته‌وه‌یی له‌ هه‌ولێری پایته‌خت ببه‌سترێ. هه‌روه‌ها یه‌كێكه‌ له‌ خاڵه‌كانی پرۆگرامی پارتی ئازادیی كوردستان. بۆیه‌ ئیمه‌ پێكهێنانی كۆنگره‌ی نه‌ته‌وه‌ییمان زۆر پێ بڕیار و بابه‌تێكی گرینگه‌. له‌ مێژه‌ كاتی ئه‌وه‌ هاتووه‌، كورد له‌ پارچه‌كراوییه‌وه‌ به‌ره‌و یه‌كبوون و ناوه‌ندییه‌ت بڕوا. كاتی ئه‌وه‌یه‌ كه‌ هێز و سه‌ركرده‌ سیاسییه‌كانی هه‌موو پارچه‌كانی كوردستان، له‌ هێڵه‌ گشتییه‌كاندا، رێككه‌ون و ماف و ئه‌ركه‌كان به‌سه‌ر یه‌كه‌وه‌ پێناسه‌ و ده‌سنیشان بكرێ. هه‌روه‌ها ناوچه‌كه‌ و ناوه‌نده‌ گرینگ و بڕیار به‌ده‌سته‌كانی جیهان، كورد وه‌ك یه‌ك نه‌ته‌وه‌ پێكه‌وه‌ ببینن.
كورد ئه‌گه‌ر ئێستا ناتوانێ نیشتمانه‌كه‌ی یه‌كبخاته‌وه‌ و یه‌ك قه‌واره‌ی سیاسیی پێكه‌وه‌ بنێ، خۆ ده‌توانێ به‌ گه‌لاَڵه‌ی سیاسیی دیاریكراو، خۆی وه‌ك یه‌ك نه‌ته‌وه‌ی یه‌كگرتوو، ده‌ربخا. جیهانی ئێستا بۆ وه‌رگرتنی كورد وه‌ك یه‌ك نه‌ته‌وه‌ی سه‌ربه‌خۆ (نه‌ك وه‌ك عێراقی و ئێرانی و توركی و سووری) ده‌رفه‌تی زۆری تێدایه‌. ئه‌م خالاَنه‌ی باسم كردن، هه‌مووی بۆ وه‌ده‌سهێنان و گرتنی جێگه‌ و پێگه‌ی باشتره‌ له‌ هه‌رێمه‌كه‌ و جیهاندا، به‌لاَم لایه‌نێكی دیكه‌ی پێویستیی كۆنگره‌ی نه‌ته‌وه‌یی و یه‌كگرتنی سیاسیی كورد ئه‌وه‌یه‌ كه‌: شیمانه‌ی گۆڕانكارییه‌ جیۆپۆله‌تیكییه‌كان له‌ ناوچه‌كه‌ زۆره‌. كورد به‌هێزه‌وه‌ ده‌توانێ له‌و گۆڕانكارییانه‌دا ئه‌كته‌رێكی چالاك بێ. به‌لاَم ئه‌گه‌ر لاواز بێ، ده‌كرێ ببێ به‌ ژێر ستیڤانه‌كانی گۆڕانكارییه‌ جیۆپۆڵه‌تیكییه‌كانه‌وه‌. بۆیه‌ بێ دوو دڵی پشتیوانیی له‌ پێكهێنانی كۆنگره‌ی نه‌ته‌وه‌یی ده‌كه‌ین.
ستیڤان: پرسی ده‌وڵه‌تی كوردیی بۆته‌ رۆژه‌ڤی سیاسیی. خوێندنه‌وه‌تان بۆ ده‌وڵه‌تی كوردیی چییه‌؟.
حوسێن یه‌زدانپه‌نا: پرسی راگه‌یاندنی ده‌وڵه‌ت، بۆ كورد، هه‌ڵبژاردن نییه‌، به‌ڵكوو پێویستی و زه‌رووره‌ته‌. به‌ دیتنی من كورد له‌ چوارچێوه‌ی ئه‌و ده‌وڵه‌تانه‌ی به‌ سه‌ریاندا دابه‌شكراوه‌، هه‌رگیز و له‌ هیچ هه‌لومه‌رجێكی سه‌قامگیر و له‌ هیچ فۆرمێكی ده‌وڵه‌تدا به‌ ئاوات و ئامانجه‌كانی خۆی وه‌ك نه‌ته‌وه‌یه‌ك ناگا. ئه‌و هه‌لوومه‌رجه‌ی ئێستا بۆ كورد له‌ باشوور هه‌یه‌، به‌رهه‌می رێككه‌وتن له‌گه‌ڵ عه‌ره‌ب نییه‌. به‌ڵكوو به‌رهه‌می بارودۆخی هێرشی رووخاندنی حكوومه‌تی سه‌دام حسێن و پارسه‌نگی هێزه‌ له‌ نێوان كورد و عه‌ره‌بی عێراقدا. كورد له‌و كاته‌دا به‌ هێز بوو و توانی هه‌م له‌ كوردستان له‌ سه‌ر عه‌رزی واقع خۆی به‌هێز بكا هه‌م له‌ ناو دامه‌زراوه‌كانی ده‌وڵه‌وتی عێراقدا. (هه‌ڵبه‌ت به‌ باوه‌ڕی من كورد ده‌بوو له‌و كاته‌دا ده‌وڵه‌ت رابگه‌یه‌نێ). ئه‌وه‌ ئێستا ده‌بینین لایه‌نی عه‌ره‌بی به‌ تۆزێ خۆ كۆكردنه‌وه‌ هه‌ڕه‌شه‌ی شه‌ڕ و په‌لامار له‌ كورد ده‌كا. به‌ باوه‌ڕی من هه‌ر چه‌ند له‌ تاكتیكدا، گۆڕینی كه‌سه‌كان له‌ به‌غدا، بایه‌خی خۆی هه‌یه‌، به‌لاَم له‌ مه‌ودای ستراتیجیدا، هیچ شتێكی بنه‌ڕه‌تی ناگۆڕێ و كورد ده‌بێ وه‌دوای پرۆژه‌ی به‌ ده‌وڵه‌تبوونی خۆی بكه‌وێ.
له‌ راستیدا رێگایه‌كی دیكه‌ جگه‌ له‌وه‌ش بۆ كورد نییه‌. كات به‌ قازانجی كورد ناچێته‌ پێشه‌وه‌. هه‌تا ئێستا لانیكه‌م ٤ سیستمی سیاسیی له‌ جیهاندا گۆڕدراوه‌. به‌ گۆڕینی هه‌ر سیستمێك كه‌ له‌ چوارچێوه‌ی میترۆپۆله‌كان رووده‌دا، ولاَتانی په‌ڕواێز كه‌وتوونه‌ته‌ به‌ر ره‌حمه‌تی ئه‌و سیستمه‌ گۆڕاوه‌ و هێزه‌ بالاَده‌سته‌كانی. دۆخی ئێستای جیهان، له‌گه‌ڵ ساڵه‌كانی ٢٠٠٣ تا ٢٠٠٧ جیاوازه‌. ئه‌و ماوه‌یه‌ جیهان له‌ سیستمی تاك جه‌مسه‌رییدا بوو. له‌و كاته‌وه‌، جیهان تا دێ زیاتر به‌ره‌و فره‌ جه‌مسه‌ریی بوون ده‌ڕوا. روون نییه‌ داهاتوو چی لێدێ. هاوكات هێدنێك ئه‌گه‌ر و شیمانه‌ی گۆڕانكارییه‌ جیۆپۆڵه‌تیكییه‌كان هه‌یه‌. توركیا به‌ خێرایی روو له‌ گه‌شه‌یه‌ و وه‌ك ئه‌ندامێك له‌ گرۆپی ولاَتانی E8 پێشبینی ده‌كرێ له‌ داهاتوودا ببێته‌ هێزی گه‌وره‌. عه‌ره‌به‌كان به‌و جیۆپۆڵه‌تیكه‌ به‌هێزه‌یانه‌وه‌، له‌وانه‌یه‌ روو له‌ یه‌كگرتن و هاوپه‌یمانێتی بكه‌ن.
ئێران به‌ ته‌مای به‌هێزكردنی هیلالی شیعه‌یه‌. خودی عێراق ولاَتێكی ده‌وڵه‌مه‌نده‌، ئه‌گه‌ر خۆی به‌ باشی كۆ بكاته‌وه‌، حیسابێكی گه‌وه‌ری هه‌یه‌ له‌ ئاستی جیهاندا. له‌م نێوه‌دا و له‌ هه‌ر كام له‌م حاڵه‌تانه‌دا، بۆی هه‌یه‌، كورد به‌م حاڵه‌ته‌ی ئێستایه‌وه‌ سات و سه‌ودای له‌سه‌ر بكرێ. به‌لاَم ئه‌گه‌ر ببێته‌ ده‌وڵه‌تی سه‌ربه‌خۆ، ده‌توانێ ئه‌كته‌رێكی چالاكی ئه‌م هاوكێشه‌ و ئه‌گه‌رانه‌ بێ، نه‌بێ به‌ ژێر ساتوسه‌ودای هێزه‌كانی گه‌وره‌تر له‌ خۆیه‌وه‌. له‌ رووی واقعیشه‌وه‌، هه‌م بنه‌ماكانی به‌ ده‌وڵه‌تبوون هه‌یه‌ و هه‌م ده‌رفه‌ته‌كان هه‌ن. له‌ حاڵی حازردا عه‌ره‌ب ئه‌و توانایه‌ی نییه‌ دژایه‌تی پڕۆژه‌ی به‌ ده‌وڵه‌تبوونی كورد بكا، توركیا به‌ هۆی به‌رژه‌وه‌ندییه‌كانیه‌وه‌ (نه‌ك ئایدۆلۆژیا و پرێنسیپه‌ سیاسییه‌كانی) له‌سه‌ر ئه‌وه‌ پشت له‌و هه‌موو قازانجه‌ ناكا كه‌ له‌ گه‌ڵ كورد هه‌یه‌تی. ئێران له‌ حه‌ولی تێكده‌رانه‌ به‌رده‌وام ده‌بێ، به‌لاَم ناتوانێ ببێته‌ له‌مپه‌ری ده‌وڵه‌تی كوردیی. ده‌مێنێته‌وه‌، باری ناوخۆیی كورد.
بێگومان یه‌كگرتوویی و یه‌كڕیزیی كورد مه‌رجێكی بنه‌ڕه‌تی سه‌ركه‌وتنی پڕۆژه‌كه‌یه‌. به‌لاَم یه‌كگرتوویی و یه‌كڕیزیی له‌ پێناو وه‌دیهێنانی ئه‌و خه‌ونه‌ له‌ مێژینه‌یه‌ نه‌ك له‌ پێناو ده‌ست لێ به‌ردانی. ئه‌و هێزه‌ی پێشه‌نگه‌ له‌ هه‌نگاونان به‌ره‌و به‌ ده‌وڵه‌تبوون، ده‌بێ حه‌ول بدا رای گشتیی كوردستان به‌ هه‌موو پێكهاته‌كانییه‌وه‌ و پاڵپشتی هه‌موو هێزه‌ سیاسییه‌كان به‌ ده‌ستبێنێ و له‌ راستیدا پڕۆژه‌كه‌ ببێته‌ هی هه‌مووان. به‌لاَم خۆ ئه‌گه‌ر هه‌موو هێزه‌كان نه‌هاتنه‌ ناو پڕۆژه‌كه‌وه‌، هێزی پێشه‌نگ نابێ، له‌به‌رئه‌وه‌ ده‌ستبه‌رداری پڕۆژه‌كه‌ بێ. ئه‌وه‌ی دژایه‌تی پڕۆژه‌ی به‌ ده‌وڵه‌تبوون بكا، بۆ هه‌میشه‌ ده‌سووتێ. له‌م پرۆژه‌یه‌دا كوردی پارچه‌كانی دیكه‌ش قوولاَیی ستراتیژیی و هێزی پشتیوانن. له‌ نه‌ورۆزدا دانشیتوانی رۆژهه‌لاَتی كوردستان خۆیان حازر كرد بوو كه‌ ئه‌گه‌ر هه‌ولێر ده‌وڵه‌ت رابگه‌یه‌نێ، بۆ پشتیوانی بڕژێنه‌ سه‌ر شه‌قامه‌كان و شادیی و خۆشی بنوێنن.
ستیڤان: باشووری كوردستان له‌ كێشه‌دایه‌ له‌گه‌ڵ عێراق. پێتانوایه‌ باشترین رێگه‌چاره‌ بۆ كورد له‌ باشووری كوردستان چییه‌ بۆ ده‌ربازبوونی یه‌كجاریی له‌م كێشه‌ و قه‌یرانانه‌ی ناو عێراق؟.
حوسێن یه‌زدانپه‌نا: بۆ دۆزینه‌وه‌ی رێگا چاره‌ی كێشه‌یه‌ك، ده‌بێ بگه‌ڕێینه‌وه‌ بۆ سه‌ره‌تا و ده‌سپێك و هۆكاری سه‌رهه‌ڵدانی كێشه‌كه‌. ئه‌م كێشه‌یه‌ هی ئه‌مڕۆ نییه‌. كێشه‌یه‌كی كۆنه‌ له‌ سه‌رده‌مێكی نوێدا سه‌ریهه‌ڵداوه‌ته‌وه‌ و ته‌شه‌نای كردووه‌. هۆكاری ئه‌م كێشه‌یه‌ ئه‌وه‌یه‌ كورد مافی دیاریكردنی چاره‌نووسی زه‌وتكراوه‌ و كاتی خۆی به‌ زۆری زۆرداریی و به‌ زه‌بر و زه‌نگ لكێندراوه‌ به‌ ده‌وڵه‌تی ده‌ستكردی عێراقه‌وه‌. سه‌ره‌تاكه‌شی هاوكاته‌ گه‌ڵ لكاندنه‌كه‌. ئێستا كورد له‌ هه‌ناوی جیهانێكی گۆڕادراو و هه‌لومه‌رجێكی له‌ بارتر له‌ رابردوو، حه‌ول ده‌دا ئه‌م كۆت و به‌نده‌ بپسێنێ و لایه‌نی عه‌ره‌بیش به‌ پێچه‌وانه‌وه‌، ده‌یه‌وێ، به‌ توندی به‌ به‌غداوه‌ شه‌ته‌كی بداته‌وه‌. رێگا چاره‌ ئه‌وه‌یه‌ هه‌موو شتێ بگه‌ڕێته‌وه‌ بۆ ئه‌سڵه‌كه‌ی. واته‌ رێگاچاره‌ی یه‌كجاریی هاتنه‌ ده‌ره‌وه‌ی كورده‌ له‌م ده‌وڵه‌ته‌" ئیتیحادییه‌" ناموباره‌كه‌ و دامه‌زراندنی ده‌وڵه‌تی نه‌ته‌وه‌ییه‌.
ستیڤان: رۆڵی كۆماری ئیسلامی ئێران چۆن ده‌بینی له‌ قه‌یرانی عێراقدا؟ هه‌ندێك پێیانوایه‌ ئێران كاراكته‌ری سه‌ره‌كییه‌ له‌ گه‌مه‌كه‌دا و ته‌نانه‌ت گۆڕانی هه‌ڵوێستی یه‌كێتی له‌سه‌ر داوا و به‌ فشاری ئێران بووه‌؟ ئێوه‌ له‌و باره‌وه‌ چ سه‌رنجێكتان هه‌یه‌؟
حوسێن یه‌زدانپه‌نا: ئێران ئه‌كته‌رێكی چالاكی گۆڕه‌پانی سیاسه‌تی عێراقه‌ و ئه‌له‌مێنتی شیعه‌ و ئازادبوونی پۆتانسیه‌لی له‌ عێراقدا به‌ پێچه‌وانه‌ی سه‌رده‌می حوكمی به‌عس، بووه‌ته‌ پێگه‌یه‌كی به‌هێز بۆ ئێران. بۆیه‌ له‌ راستیدا ئێران له‌ هه‌موو كێشه‌ و هاوكێشه‌یه‌كی عێراقدا ته‌ڕه‌فه‌ و به‌ پێی قورساییه‌كه‌ی كار ده‌كاته‌ سه‌ر پرۆسه‌ سیاسیه‌كانی ئه‌و ولاَته‌. مالیكی سیاسه‌ته‌كانی ئێران له‌ عێراق پیاده‌ ده‌كا و قاسم سلێمانی فه‌رمانده‌ی گشتی هێزی قودسی سوپای پاسداران كه‌ كه‌یسی عێراقی له‌ ئه‌ستۆیه‌، سیاسه‌ته‌كانی ئێرانی پێ دیكته‌ ده‌كا. به‌لاَم هه‌رچی له‌ مه‌ڕ یه‌كێتی نیشتمانی كوردستانه‌، سه‌ره‌ڕای بۆچوونی جیاواز، به‌ دووری ده‌زانم له‌م پرسه‌دا، به‌ پێچه‌وانه‌ی پاراستنی یه‌كڕیزیی كوردستانی هه‌ڵوێست بگرێ. بڕیاری ده‌ست له‌ كار كێشانه‌وه‌ی به‌ڕێز مام جه‌لال سه‌ركۆماری عێراق هه‌ڵوێستێكی گرینگ بوو.

 

Share