Red Purple Black
Kurdistanigawre@gmail.com
ديدار لةگةڵ کاک ئەحمەد كرێكار

487581 225137314317080 1643227961 n

ديدار لةگةڵ کاک ئەحمەد كرێكار
سەبارەت بە سەرةتاكانى رێكخستنى كۆمەڵە لەشارى كەركوك

پ: کاک ئەحمەد لەچ ساڵێک جەنابتان بەرپرسى کۆمیتەى ئاگر بوون؟ و: لەراستیدا ئەم پرسیارە دەمان گەڕێنێتەوە بۆ ڕابردووى شارى کەرکوک، ئەم شارەش شان بەشانى شارەکانى ترى کوردستان کادرو سەرکردەو پێشمەرگەى چالاک ودڵسۆزى هەبووە هیچ کاتێ لە کۆڕى خەبات دوا نەکەوتوونە، هەر لەڕاپەڕینى گاورباغى ساڵى 1946 و ڕاپەڕینى بەردەرگاى حەمامەکانى شارى کەرکوک، کە دەگێڕنەوە هەندێ لە ناحەزان ویستویانە بچنە سەر حەمامى ژنان لە شارى کەرکوک، بەڵام عەلە بەستێ ناودارى کورد لە شارى کەرکوک شەڕى کردوەو توانیویەتى ئەو پیلانە پوچەڵ بکاتەوەو هەروەها چەند پیاوێکى ئازاو ناودارى کورد لە کەرکوک وەکو مجید شانشینى و مەلا مەجید مۆرخواردەیى سەرووى تێدا هەڵکەوتووە کە نەیان توانیوە تەعدا قبوڵ بکەن، بۆیە لەو سەردەمانە بەرەنگارى زوڵم وزۆردارى بونەتەوە ناحەزانیش بەچەتەو رێگر ناوزەدیان کردوون. پاشان هەر لە سەرەتاى دروستبوونى حزبە کوردییەکانەوە کادرو سەرکردەى باش هەڵکەوتوون، بۆ نموونە لەساڵى پەنجاکاندا مامۆستا ئیبراهیم ئەحمەدى رەحمەتى لەلایەنى حکومەتى ئەوکاتەى بەغدا پەیتا پەیتا دوور دەخرایەوە، ئەوەبوو لەو ساڵانەدا لە کەرکوک لەگەرەکى شاترلوو جێگاى کرایەوەو توانى لەم شارەدا درێژە بە کارى سیاسی خۆى بدات، هەروەها لەناو پارتى دیموکراتى کوردستانیش لەو سەردەمانە چەندین کادرو سەرکردەى کەرکوکى تێدا هەڵکەوت لەوانە شەهید عەلى عەسکەرى و جلال عبدالرحمن مامەرەشى وعادل عیزەت و فەیزوڵلا کەریم و مامۆستا عەباس و نورەدین عبدالرحمن و نەجمەدین گلى و دەیان سەرکردەو کادرو پێشمەرگەى تر، بەڵام بەداخەوە لەگەڵ هەڵگیرساندنى شۆڕشى ئەیلوولى مەزنى 1961 بەدواوە کۆمەڵێک کێشەى سیاسى لەگەڵ خۆى هێنایە کایەوە، وەک جیابوونەوەى باڵى مەکتەبى سیاسى وبارزانى، ئەمە وایکرد کورد دەستى بچێتە خوێنى یەکترو ئەمەش باڵى جەلالى و مەلایى لێکەوتەوە، پاشان باڵى مەکتەبى سیاسى چوونە ئێران وپێیان دەگوتن هەمەدانیەکان، باڵى بەرزانى لەساڵى 1963 لەگەڵ رژێمى ئەو کات مفاوەزاتیان کردو پارتى یان دروست کردەوە بەو شێوازەى کە خۆیان مەبەستیان بوو. لە ساڵى 1965دوژمن هێزێکى زۆرى لەسەر شۆرش کۆکردەوە و ئەو برادەرانەى لەهەمەدان بوون خەڵکیان ناردە لاى بەرزانى بۆ گەڕانەوەیان بۆ ناو پارتى بۆ بەرگریکردن لە کوردستان، بەڵام لێرەو لەوێ ناوو ناتۆرە دەکرا بەرامبەر هەردوولا هەریەکەى بەشێوەیەک، لەئەنجامدا بەناچارى لەکۆتایى 1966باڵى مەکتەبى سیاسى لەپارتى جیابۆوەو لەگەڵ حکومەتى عێراق هەندێ رێکەوتنى سیاسیان کردو لەشارەکان وشوێنە نزیکەکان بارەگایان داناو هەندێ هاوکارى سیاسى و مەعنەویان کرد بۆ ئەوەى نەفەوتێن تا گەیشتنە گفتوگۆى نێوان میرى و بارزانى ئەوەبوو حکومەتى ئەوکاتەى بەغدا بەتەواوى دانى بەمافە ڕەواکانى کورددا ناو بەیانى 11ى ئازارى لێ کەوتەوە . هەر لەگەڵ بەیانى 11ى ئازار باڵى مەکتەبى سیاسى کۆبوونەوەیان کردو بڕیاریاندا پشتگیرى لەو بەیانە بکەن کە مافەکانى کورد دەسەلمێنن، ئەوەبوو وەفدێکیان پێکهێنا و چوونەوە بۆلاى بەرزانى جارێکى تر چوونەوە ناو پارتى بۆ سرینەوەى ئەو ناووناتۆرانەى دراوەتە پاڵیان. ئەوەبوو بەبۆنەى بەیانى 11ى ئازارەوە هەموو کورد لە شارو شارۆچکەو ناوچەکانى کوردستان خەریکى شایى و زەماوەندو ئاهەنگێڕان بوون، بەڵام لەناو باڵى مەکتەبى سیاسى هەندێ لەڕۆشنبیرو خوێندەوارەکان گۆڤارێکیان دەردەکرد بەناوى(رزگارى)کە گرنگیان بە مەقالاتى شۆڕشى چین دەدا لەوانەش وتەکانى ماوسیتۆنگ و بەراوردکردنى شۆڕشى چین لەگەڵ شۆڕشى کوردستان و شتى لەوبابەتانە . لەو روانگەیەوە ئەم کەسایەتیە شۆڕشگێرو ڕۆشنفکرانە کەوتنە کۆڕو کۆبوونەوەو شیکردنەوەى بەیانى 11ى ئازار، بەوپێیەى کە هەموو مافەکانى کوردى نەپێکاوە، بەڵکو حکومەت مەبەستى خۆکۆکردنەوەو خۆسازدانە بە هەرەس پێهێنانى شۆرشەکە و لەلایەکى ترەوە جگە لە مەسەلە نەتەوایەتییەکە کورد مافى چینایەتى هەیە کە دەستەبەر نەبوونە، وەکو مافى جوتیاران وکرێکاران و رەنجدەران و لاوان و خوێندکاران و ژنان و هتد ....... دەبێت ئێمە خەبات بکەین بۆ بەدەستهێنانى مافى چینەکانى کوردستان لەناو مافى نەتەوایەتى کوردستان، بۆ ئەم مەبەستە پێویستە رێکخراوێکى سیاسى راستەقینەمان هەبێت ئەوەبو لە 10/6/1970 رێکخراوى کۆمەڵەى مارکسى لینینى کوردستان دروست بوو، بەمەبەستى رێکخستن و هۆشیارکردنەوەى هەموو چین و توێژەکانى کوردستان، کەرکوک یەکێک بوو لەو شارانەى رۆڵى سەرەکى بینى لەو رێکخراوەدا، ئەویش بەلێهاتوویى کەسانى وەک عەلى بچکۆل و ئیبراهیم جەلال و ئەبو شەهاب و فەرەیدون عەبدولقادر کە ناوى لێنرابوو لیژنەى شار، بەڵام لە کۆتایى ساڵى 1973ئەم لیژنەیە فراوان کرایەوە هەندێ کادرى نوێیان بردە ناو لیژنەى ئەساسیەوە، یەکەم مام حەمید دووەم کاک ئازاد هەورامى و ئەحمەد کرێکار چوونە ناو ئەو لیژنە باڵایەى شارى کەرکوک، پاش چەند مانگێ کۆڕو کۆبوونەوە دەبوایە هەموو هەفتەیەک لەکۆبوونەوە باس لەچالاکیەکانى خۆت بکەیت، کەچۆن لەناو خەڵک قسەت کردوەو هەوڵتداوە چەند کەس بۆناو ریزەکانى کۆمەڵە رابکێشى. ڕۆژێک لەماڵى کاک فەرەیدون عبدالقادر کۆبوونەوەى لیژنەى شارمان هەبوو، کارى هەفتانەى خۆمان ئەنجام دەدا، کاک ئەبوشەهاب وتى: ئەم هەفتەیە زیاد لە 50 کەسم راکێشاوە بۆناو کۆمەڵە. هەر ئەو قسەیەى کرد، کاک برایم جەلال یەک سەر وەڵامى دایەوەو وتى: ئەمە درۆیە. بوو بە موناقەشە و لەیەکتر راستبوونەوە . لەناو ژوورەکە پەردەیەکى سوورى دوولایەنە هەبوو لەناکاو پەردەکە هەڵدرایەوەو سەرى زەلامێک دەرکەوت و وتى: ئافەرین کادرەکانى کۆمەڵە ئێوە لەناو خۆتان وابن ئیتر سبەینێ لەناو جەماوەرو لەشاخ چۆن دەتوانن تێکەڵاوى خەڵک بن. ئەو قسەیەى کردو پەردەکەى داخست، بەڵام ئەبو شەهاب و برایم جەلال بێ دەنگ بوون و هیچ قسەیەکیان نەکرد تا کۆبونەوەکە تەواو بوو، کە بڵاوەمان لێکرد لەرێگا لە کاک عەلى بچکۆلم پرسی ئەو زەلامە کێ بوو؟ من نایناسم! وەڵامى دامەوەو وتى: ئەوە خاڵە شیهابە و سکرتێرى کۆمەڵەى مارکسى لینینى کوردستانە. ئەوە یەکەم جاربوو کە خاڵە شیهاب ببینم، بەڵام لەوە بەدواوە چەندجارێ لە کۆبونەوەکان دەمبینى، لەساڵى 1974 بۆماوەى مانگێ لەماڵى ئێمە مایەوە، لەو کاتانە ئامادە نەبوو یەک پاکەت جگەرە لەسەرپیتاکى رێکخستن بکڕێ، بەڵکو ئەگەر پێویستى بەپارە بوایە ئیعتمادى دەکردە سەر خۆى وجارو بار دەچوو لە مەعدەن لاى براى مام حەمید لە کورەى گەچ کرێکارى دەکرد و هەمیشە دەیوت: پێویستە پشت بە خۆمان ببەستین و خۆمان بژێنین و هەوڵیشبدەین خۆشمان پەروەردە بکەین . دواى ئەوە لە کۆبونەوەیەک خاڵە شیهاب پێیراگەیاندین کەحکومەتى عێراق لە بەڵێنەکانى خۆى پەشیمان بۆتەوە وماوەیەکیتر شەڕ دەست پێدەکاتەوە و دەبێت ئێمە بەبەرنامەوە بچینە ناو شۆڕش بۆ هۆشیارکردنەوەى هێزى پێشمەرگەو جەماوەرى گەلەکەمان، بەمەبەستى گۆڕینى بەرنامەى ئەم شۆڕشە بۆ شۆڕشێکى جەماوەرى کەهەموو چین و توێژەکان سوودمەندبن لێى . هەروەها بڕیاردرا سەرکردایەتى کادرە ئەساسیەکانى کۆمەڵە بچنە دەرەوە بۆ پێشمەرگایەتى، بەڵام بۆ رێکخستنى شارى کەرکوک کاک ئەبوشەهاب و کاک برایم جەلال و ئەحمەد کرێکارو نەجمەدین فەقێ و محمد حەسەن بمێننەوەو کارى رێکخستن لەکەرکوک بکەن، پاش چەند مانگێ ئەبو شەهاب سەردانى گوندەکانى بان ساڵەیى کردو لەوێوە چووە ناو هێزى پێشمەرگەوە، بەڵام دواى چەند ڕۆژێک کاک عەلى بچکۆل نامەى بۆ ناردم کە ئەبو شەهاب هاتۆتە دەرەوە بۆ پێشمەرگایەتى ئێوەش وریا بن و کارى خۆتان بکەن، هەر لەو کات و سەردەمانەدا برایم جەلال لەلایەن ڕژێمەوە گیراو زیاتر لەمانگێ لەبەندیخانە بوو دواتر ئازادکرا، پێدەچوو مەسەلەى گرتنەکەى لەسەر کارى ئیدارى بووە، پەیوەندى بەکارى رێکخراوەیى کۆمەڵەوە نەبوو، ئەویش دواى ئازادکردنى خۆى وەزیفەکەى گواستەوە بۆ سلێمانى ولەکەرکوک نەمایەوە، ئەوانەى لە رێکخستنى کەرکوک مانەوە (ئەحمەد کرێکار- مەلا محمد دێوانە شەریف و نەجمەدین فەقێ عەبدلڵاو مامۆستا محمد حەسەن و فایق لەشۆرجە بۆ سەرپەرشتى رێکخستنەکانى کەرکوک تا ساڵى 1975 . کە شۆڕشى تووشى هەرەس هات، دواى گەرانەوەى برادەرانى شاخ و تێپەراندنى بەچەند مانگێ رێکخستنەکانى شارو شاخ تێکەڵاو کرایەوە، یەک دوو مانگێ کاک سیروان تاڵەبانى بووە مەسئوولى رێکخستن وسێ جار لەماڵى ئەوان کۆبووینەوە، بەڵام هەر لەسەرەتاى تێکەڵ کردنەوەى رێکخستن بەرنامەى دەستپێکردنەوەى شۆڕشى باسکرد کە دەبێت خۆمان ئامادە بکەین بۆ پێشمەرگایەتى، ئەمجارەیان پێویستە خۆمان شۆڕش هەڵگیرسێنینەوە، هەر لەسەرەتاوە بریارى دابوو کەدەبێ یەکەم کەس بێت ببێ بە پێشمەرگە، بۆیە لەماوەى چەند مانگێکدا ماڵەکەى گواستەوە لەگەڵ وەزیفەکەى بۆ سلێمانى، دواى ڕۆیشتنى بەرێزى کاک ئازاد هەورامى یەک سەر بوو بە مەسئوولى ئێمەو ناوى رێکخستنى کەرکوکى ناونا (کۆمیتەى ئاگر) یەکەم مەسئوولى ئەو کۆمیتەیە کاک ئازاد هەورامى بوو، ئەوا دەتوانم بڵێم لەمانگەکانى 11 یان 12 ى 1975 تا مانگى 10/1976 کاک ئازاد مەسئوولى کۆمیتەى ئاگر بوو، لەو ماوەیەدا کۆمەڵێک رووداو روویدا هەر لەناو ساڵى 1975 کاک عەلى بچکۆل بەمنى ووت برادەرانمان لە بەغدا گیراون نامەى جەنابى مام جلال بە بەریدەکە گیراوەو ئەویش ناوى برادەرانى داوە، بەڵام ئێمە وەکو سەرکردایەتى کۆمەڵە دەچینە ئەو گوندانەى سەر سنوور، بەڵام لە ئێستا بە دواوە شێوەى خەبات و شێوەى قسەکردنمان بەناوى یەکێتى نیشتمانى کوردستان دەبێت، چونکە مام جلال لە دەرەوەى وڵات یەکێتى نیشتمانى کوردستانیان دروست کردوەو لەم ڕۆژانە بەیانى کۆتایى کۆبونەوەى دروستکردنى یەکێتى تان بۆ دێت بەلاتانەوە سەیر نەبێت لەسەر ئەوە کار بکەن، بەڵام کۆمەڵە فەرامۆش نەکەن . لە 1/1/1976 لەناکاو هەواڵێک هات گوایە لە سنوورى پێنجوێنەوە سەرکردایەتى ئەوکاتەى کۆمەڵە بە سکرتێرەکەیەوە شاى ئێران تەسلیم بە حکومەتى عێراقى کردوون و عێراقیش کۆمەڵێک لەسەرکردەو کادرانى حزبى دیموکراتى ئێرانى تەسلیم بەشاى ئێران کردووە، پاش بڵاوبونەوەى ئەوەى کە برادەران شاى ئێران تەسلیم بە حکومەتى عیراقى کردون یەکسەر کۆمەڵێک لە کادرو بەرپرسانى ئەو کاتەى کۆمەڵە کۆبونەوەى خۆیان سازداو کۆمیتەى هەرێمەکانیان دروستکرد، کە لەم هاوڕێیانە پێکهاتبوون کاک شاسوار جەلال (ئارام) – کاک سالار عزیز – کاک ئازاد هەورامى – کاک مەلا بەختیار – کاک عەبدولرەزاق، بەڕاستى توانیان جڵەوى رێکخستنەکان بگرنە دەست و قیادەى بکەن، بەڵام لەکۆبوونەوەکانى خۆیان بەیانێکى روون کردنەوەیان دەرکردبوو، کە هێرشکردنە سەر سەرکردایەتى پێشووى کۆمەڵەبوو و بە محتەریف ناویان هێنابوون کە پێیان دەوت بەیانى 16ى شوبات – لەسەر ئەم بەیانە کێشەو گرفت و موناقەشەیێکى زۆر دروست بوو، هەندێ لە هاوڕێیان باوەڕیان بەو بەیانە نەبوو، چونکە سەرکردایەتى کۆنى ئەوکات کەلەبەندیخانەدا بوون هەموومانیان دەناسى، ئەگەر خۆڕاگرو قارەمان نەبوونایە لەو ئەشکەنجەدانەى بەسەرئەوان هات دوور نەبوو ئێمەو مانان لەماڵى خۆمان بەدەست بگیراینایە، بەڵام لەبەر قارەمانى و خۆڕاگرى سەرکردایەتیمان لە بەندیخانە ئێمە هیچ باکمان نەبوو، لەجاران زیاتر بەکارەکانى خۆمانەوە سەرقاڵ بووین تا ڕۆژێک کاک مەلا بەختیار بەکاک ئازاد هەورامى وتبوو هاوڕێیانى کەرکوک باوەڕیان بەو بەیانە نییە دانەگیراوە بوناو ڕێکخستنەکان ئەگەر مەوعید دابنیێ خۆم دێمە کەرکوک کۆبونەوەیان لەگەڵ دەکەم، ئەوە بوو کاک ئازاد هەورامى لەگەڵ ئێمە قسەى کردو مەوعیدى دانا ئەوەبوو ڕۆژێک کاک مەلا بەختیار هاتە کەرکوک شەو لەماڵى کاک ئازاد کۆبوینەوە هەموو برادەران شەهید بێستون عەسکەرى – عەلى مەجید - ملا فایەق شۆرجە – ئەحمەد کرێکار و مام حمید هەر لە ئێوارە تا ڕۆژبۆوە موناقەشەمان بوو، بەڵام ئێمە نەمان سەلماند کە سەرکردایەتیمان ئیعترافیان کردبێ، هەر بەو هۆیەوە بەیانى 16ى شوبات لە کەرکوک دانەگیراوەتە خوارەوە بۆناو رێکخستن بۆ مناقەشەکردنى تەنها خۆمان هەندێ گفتوگۆمان لەسەرى کردبوو. لەوەبەدواوە بڵاوکراوەکانى یەکێتى نیشتمانى دەگەیشتە دەستمان لەناویاندا بەڵاغى خیتامى دامەزراندنى یەکێتى نیشتمانى کوردستان بۆچى؟ ئاگادارکراینەوە کە شۆڕش دەستى پێدەکاتەوە زۆر کۆبونەوەمان کرد لەسەر رەوشى ناوچەکەو وەزعى مادى خۆمان و ئایە دەتوانین شۆڕش بکەین، لەناکاودا بڕیارمان بۆ هات کە دەبێت لە ڕێکخستنەکانى ناو شارەکان مەفرەزە دروست بکەن بۆ ئەوەى ببن بەپێشمەرگە، ئێمەش لاى خۆمانەوە بڕیارماندا کاک ئازاد هەورامى و کاک بێستوون وکاک على مجید وکاک شێرکۆ وکاک سالار بۆگردى و کۆمەڵێکى تر بڕۆنە دەرەوە، پاش رۆیشتنى هەڤاڵانمان من وەکو ئەحمەد کرێکار بووم بە مەسئوولى کۆمیتەى ئاگر. بەرۆیشتنى برادەران بۆ دەرەوە، ئێمەش ئەرکەکانمان زۆر گران بوو لەبەرئەوەى جێگاکانى ئەوان وا بەسانایى پر نەدەبۆوە، سەرەتا پەیوەندیمان کرد بە ڕێکخستنەکانى سلێمانى کەئەوکات کاک محمد چاوشین بوو کە ناسرا بوو بە وەستا ڕەسول، هەر لەگەڵ کاک محمد چوینە هەولێرو کاک حاجى مەمۆمان بینى و شێوەى کارکردنى خۆمان دەست نیشانکرد، بەڵام پاش چەند مانگێ کاک محمد چاوشین چووە دەرەوە، ئێمەش ئاگادار نەبووین ئیتر پەیوەندیمان بە سلێمانى و هەولێرەوە نەما، تەنها هەندێ دەنگوباسمان لەڕێگاى مەفرەزەکانى چەمى ڕێزان کاک ئازادو کاک بێستونەوە پێ دەگەیشت، هێندەى پێنەچوو ئەوانیش هەڵکشان بەرەو جەولەى هەکارى و کەسى وامان نەبوو کە پشتى پێ ببەستین، تەنانەت بەشارەکانیشەوە پەیوەندیمان نەمابوو، بەردەوامیش رێکخستنەکان داواى مەعلوماتیان لێدەکردین، لەپاش کارەساتى هەکارى برادەرانى ئەوێ هاتنەوە ناو شارو تەسلیم بونەوە، بەڵام ورەیان زۆر بەرز بوو ئەوە بوو کاک بێستون بڕیارى دا لەگەڵ من بێت بۆ سەرکردایەتى، لە رێکەوتى 1/1/1979 بەڕێگاى قەڵادزێ و ژاراوە لەگەڵ هەندێ قاچاغچى بەرێکەوتین و چووین بۆ شێنێ و زەڵێ چونکە مەکتەبى عەسکەرى لەزەڵێ بوو، ئەوشەوە هەر بەڕێوەبووین تا بەیانى هەر باران بوو کە ڕۆژ بوەوە لە شینێ ڕەتبووین تووشى مەفرەزەیەک پێشمەرگەبووین، فەرماندەى مەفرەزەکە کاک وەهابى ناوبوو، کاک بێستوون دەیناسین و نانى بەیانیمان لەبارەگاى مەکتەبى عەسکەرى خوارد، پاشان چوینە خوارەوە بۆ بارەگاى لق کاک ئەبوشەهاب مەسئوولى لق بوو لەوێ، دواى پشوویەک چوین بۆ بارەگاى کاک نەوشیروان، پێشوازى لێمانکردو هەندێ توڕە بوو لەکاک بێستوون لەسەر جەولەى هەکارى، دواى هەندێ موناقەشە و رێکەوتین لەسەر ئەوەى لەداهاتوودا چى بکەین، لەبارەگاکەى خۆى سەردانى جەنابى مام جلال مان کردو تا 3 شەو و 3 رۆژ لەوێ ماینەوە و کاک نەوشیروان نامەیەکى بۆ نووسین بۆ دروستکردنەوەى پەیوەندى نێوان شارەکانى کەرکوک و سلێمانى و هەولێر، ئیتر بە رێگاى قەڵادزێوە گەراینەوە بۆ کەرکوک، پاش چەند ڕۆژێک لەرێگاى مامۆستا محمد حەسەن لێپرسراوى خوێندکاران وردە وردە پەیوەندیمان کرد بە رێکخستنەکانى سلێمانى – هەولێر، لەسلێمانى کاک سەلیم سەرسپیمان بینى و لەهەولێر کاک حاجى مەمۆمان بینى و پاش رێکخستنەوەى کۆمیتەى سەرکردایەتى رێکخستنەکانى شار، شەوێک لەهەولێر کۆبوونەوەمان کردو بریاردرا حاجى مەمۆ بچێتە دەرەوە بۆ پێشمەرگایەتى، سەرەتا رێکخستنەکانى هەولێر تەسلیم بەکاک عەبدولڵا رەشید کرا، بەڵام دواى چەند ڕۆژێ کاک عەبدولڵا رەشید داوایکرد لە جێگاى ئەو کاک کۆسرەت ببێ بەئەندام سەرکردایەتى رێکخستنەکانى ناوشارو لێپرسراوى رێکخستنى هەولێر، ئێمەش زۆرمان پێ باش بوو ئەوە جێبەجێ کرا . ئێمەش وەکو کۆمیتەى ئاگر هەستاین بە رێکخستن و پیاچونەوەى کارەکانى خۆمان کە سێ رێکخراومان دروستکرد، رێکخراوى یەکى ئیمام قاسم و گەرەکەکانى و خەتەکانى چەمچەماڵ و قەرەهەنجیرو شوانى سەرخاسەى دەگرتەوە و(ئەحمەد کرێکار) سەرپەرشتى دەکرد، رێکخراوى دوو تەپەو رەحیمئاواو بان ساڵەیى و ناوچەى شوان و پردێ و دووبز(على مغاویر) لەگەڵ کۆمەڵێک کادر سەرپەرشتیان دەکرد . رێکخراوى سێ شۆرجەو گەرەکەکانى و لەیلان و داقوق و دووز تاسەر ئاوە سپى (مام حەمید) سەرپەرشتى دەکرد لەگەڵ کۆمەڵێک کادر کە حاجى حبیب و على قەساب. هەروەها رێکخراوێکى ترمان بەناوى یەکێتى خوێندکاران هەبوو (مامۆستا محمد حەسەن) بەرپرسى بوو، وە رێکخراوێک بەناوى کاسبکاران (مەلا محمد دێوانە شەریف) بەرپرسی بوو، بەشێکى ترمان هەبوو بەناوى مەفرەزەکانى ناوشار کەلە (4) مەفرەزە زیاتربوون، دوانیان کاک ملا محێدین سەرپەرشتى دەکرد، ئەوانیتر خۆم سەرپەرشتیانم دەکرد، هەر کارێکیان ئەنجام بدابایە بەبێ بڕیارى لێپرسراوى کۆمیتەى ئاگر نەدەکرا، لەوماوەیەدا زیاتر لە (11)چالاکى پێشمەرگانەیان ئەنجامدا، هەمووى بەبڕیار کراوە دیارە ئەم چالاکیانە لەدواى رێکخستنەوەى کۆمیتەى ئاگر بووە، با بزانین بۆچى ئەو بڕیارانە دران، رێکخستنەکانى سلێمانى هیچ ئاگادارى بارودۆخى کەرکوک نەبوون، بەڵام لەهەموو کۆبونەوەیە پرسیارى ئەوەیان دەکرد بۆ لە سلێمانى چالاکى دەکەین لەلاى ئێوە ناکرێت؟ ڕۆژێکیان وتیان ئێمە دێینە کەرکوک وچالاکى دەکەین، ئێمەش وتمان لاریمان نیە خەڵکتان بۆ دەستنیشان دەکەین، بەڵام حەقى ئەوەمان نیە ئەو پێشمەرگەیە چۆن جێگا بۆخۆى دابین دەکات، برادەرێکیان نارد بۆ لامان وهەموو شتەکانمان بۆ روون کردەوە، پاش 4 ڕۆژ هیچى پێ نەکراو گەرایەوە بۆ سلێمانى. ئیتر لەوە بەدواوە خۆمان بۆ ئەرکەکانى سەرشانمان ئامادەکردو دەستمان کرد بە چالاکى بەبێ ئەوەى هیچ مەفرەزەیەک بزانێ یان ئەوى تربناسێت. تا ساڵى 1980 بۆ 1981 کارەکان و چالاکیەکان زۆر بەباشى دەڕۆیشتن، بەڵام لەساڵى 1980 کادرى پێشکەوتوو مامۆستا (حەمید کاکەیى) لەبازارى ئەحمەد ئاغا بەشێوەى ئیختیفاکردن رفاندیان کە تا ئێستا بێ سەروشوێنە، دوابەدواى ئەو (مەلا محمد دێوانە شەریف، ئەوبەهەمان شێوە رفێندراو تا ئێستا بێ سەروشوێن کراوە، دواى ئەو مامۆستا (محمد حەسەن) و دایکى لەرێگاى جاسوسێکى کوردەوە دەستنیشان کران و بردیانیان بۆ ئەمنى عامەى بەغدا، بەڵام هەردوکیان زۆر خۆراگربوون لەتەعزیبەکان رژێمى بەعس هیچ سودى لێیان نەبینى، رێکخستن تووشى هیچ زیانێ نەبوون، هەر دواى ئەمان لەیەک ڕۆژدا(فاتح سابیر) بەرپرسى رێکخستنى چەمچەماڵ و (عەلى مغاویر) بەرپرسى رێکخراوى دوو گیران و برانە ئەمنى خاێەى کەرکوک . بەڵام ئێمە پێمان وابوو ئیتر کاتى ئەوە هاتووە خۆمان ئامادە بکەین بۆئەوەى شێوەى کارکردن بگۆڕین و هەندێکمان بچینە دەرەوەى شار. ئێمە چاوەڕێى چارەنووسى ئەو برادەرانە بووین کە گیرابوون، هێندەى پێنەچوو دواى 26 ڕۆژ لەمانگى تەموزى 1981 عەلى مغاویر لەسجن بەواستە ئازادکرا، پاش چەند ڕۆژێک هەوڵدان توانیمان عەلى مغاویر ببینین، زۆر هەوڵماندا شتێکى لێ حاڵى بین، بەهیچ شێوەیەک وەڵاممان دەستنەکەوت، هەموو ئەو پرسیارانەى لە عەلى مغاویرمان کردبوو لەگەڵ وەڵامەکەى بردمان بۆلاى مامۆستا جەمال تاهیر وکاک سەلیم سەرسپى لە سلێمانى لەکۆبوونەوە هەموویانمان خستەروو، لەوەڵامدا مامۆستا جەمال تاهیر ووتى: ئەو هەموو ئیعترافێکى کردووە لەسەر رێکخستن وکڵێشەى رێکخستنى داوە پێیان، بۆیە ئازادیان کردوە، بەڵام ئێوە لە سەعاتى سفر هەمووتان دەگیرێن، تازووە لەگەڵ کاک سلیم برۆنەوە بۆ کەرکوک کۆمیتەیەکى نهێنى وکاتى دروست بکەن، کە ئەو نەیان ناسێت چونکە کار لە کارترازاوەو دەگیرێن، برادەرانى تریش بچنە دەرەوە یان خۆیان بشارنەوە. بۆ ڕۆژى دوایى من و کاک سلیم سەر سپى هاتینە کەرکوک، سەردانى مامۆستا (کاکەرەش ێدیق) مان کردو داوامان لێ کرد ببێت بە لێپرسراوى ئەو کۆمیتەیەو کاک (عومەر قادر)و کاک ( ئەسعەد عزیز) دوو خوێندکارى زانکۆ بوون بەکارگێر دانران، ئەوەبوو مامۆستا کاکەرەش قبوڵى کردو دەورو تەسلیمان کردو شانەکانمان تەسلیم کردن، هەموو ئەو برادەرانەمان ئاگادار کردەوە کە عەلى مغاویر دەیناسى خۆیان بشارنەوە یان بچنە دەرەوە بۆ پێشمەرگایەتى لە 20/8/1981 من کەرکوکم بەجێ هێشت و چوومە دەرەوە بۆ ناو هێزى پێشمەرگە، مامۆستا کاکەڕەش بوو بە بەرپرسى کۆمیتەى ئاگر.

 

 

 

Share