Red Purple Black
Kurdistanigawre@gmail.com
شوكریە سەعید: بەرپرس دەناسم كە دوو ژن و چوار ژنی هەیە و لە سەر ئیشەكەشی لانەبراوە

shokria_saedبەرێز (شوكریە سەعید) چالاكوان لە بواری كار و باری ژنان پرسیارەكانی رۆژی وڵاتی لەمەڕ تێكەڵاوی ژنان و سیاسەت و ئاستی بەشداربوونی ژنان لە بڕیارە سیاسی و چارەنووسسازەكانی كۆمەڵگەدا و هاوكات چۆنییەتی بەهێزبوونی ژنان لەم بوارەدا و ئەو ئاستەنگیانەی رووبەرووی ژنان دەبێتەوە هەڵدەسەنگێنێت.
شوكریە سەعید پێوایە، ژنان هیچیان كەمتر نییە لە پیاوان و پێویستە پێش هەر شتێك خۆیان لە ژێر دەستەیی و دەسەڵاتی حزبەكان دەرخەن و سەربەخۆانە و بە ئیرادەی ئازادانەی خۆیان ئیش بكەن. هەروەها سەعید ئەوەشی ووت:" ئەو دام و دەزگایانەی لە كەركوك كار بۆ ژنان دەكەن هەموویان لە ژێر دەستی حزبەكاندان، یان ئەوەتا لە ناوەندێكەوە بەرێوە دەبڕدرێن". 
ئا/ تەوار كەركوكی
رۆژی وڵات/ رۆڵی ژنان لە سیاسەتدا چۆن دەبینن؟
وەڵام/ ئێمە ئافرەتی زۆر بە توانامان هەیە كە خاوەن ئەزموونێكی زۆر گەورەن لە بواری سیاسەتدا، بەڵام زۆر بەداخەوە لێرە هیچ دەرفەتێك نییە بۆ ئەو ژنانە و هیچ رێگە پێدانێك نییە بۆ ئەوەی ئەو ژنانە كاری سیاسی خۆیان ئەنجام بدەن. چاوەڕوانیمان لە كابینەی حەوت بوو كە كاتی پۆستەكەی وەربگرێت، ژنان زیاتر لە كابینەكەیدا بەجێ ببن، بەڵام بەداخەوە هیچ رۆڵێك نەدرا بە ژنان و ژن هیچ بوارێكی پێنەدرا ئەوەش جێی داخە و هەروەها جێی رەخنەیە بۆ كابینەی نوێ.
رۆژی وڵات/ ئەو ژنانەی لە هەرێمی كوردستاندا كە بەشدارن لە كایە سیاسیەكاندا، چەندە دەتوانن نوێنەرایەتی راستەقینەی ژنان بن؟
وەڵام/ من لە پێشووتریش گوتم كە ئێمە زۆر ژنمان هەیە كە زۆر بە ئەزموون و چالاكن لە بواری سیاسیدا و زۆریش بە توانان لە سیاسەت كردندا. بە داخەوە ژنان تا ئێستا نەیانتوانیووە خۆیان لە ژێر دەسەلاتی حیزبەكاندا دەرخەن و ناتوانن ئازادانە كاری خۆیان بكەن یا خود بە مێشكی فراوانی خۆیان ئیش بكەن دەبێ‌ هەر كۆنترۆلەكە لەو حیزبەوە بێت كە گرێدراوێتی بۆی هەیە هەر ئافرەتێك كە دەرفەتی سیاسی وەرگرت بە دڵنیاییەوە حیزبێك پشتیوانی كردووە یا خود لە رێگای حیزبێكەوە ئەو پۆستەی وەرگرتووە كە مەجبور دەمێنێ‌ لە ژێر دەسەڵاتی ئەو حیزبانە و بە سیاسەتی ئەو حیزبانە ئیش بكات، بەڵام ئەگەر ئافرەتی ئێمە دەرفەتی ئەوەی پێبدرێ‌ كە لە ژێر دەسەڵاتی حیزب و سیستەمی پیاوسالاری ئەم كۆمەڵگایە رزگاری بێت ئەوە من لەو باوەڕییە دام كە كاری سیاسی و سیاسەت لە وڵاتی ئێمە زۆر زۆر پێش دەكەوێ‌، چونكە هەر وەكو ئاماژەم پێكرد ئافرەت زۆر لە پیاو دیپلۆماسی ترە و دەتوانێ‌ كاری سیاسی زۆر لە پیاو ڕێك و پێكتر ئەنجام بدات.
رۆژی وڵات/ ژن و سیاسەت چەندە بەیەكەوە دەگۆنجێن لەحاڵێكدا لە كۆمەڵگاكەی خۆماندا هەر دەبیستین كە سیاسەت كاری ژنان نییە؟ رای بەرێزتان چییە لەم بارەیەوە؟
وەڵام/ ئەگەر لەبواری سایكۆلۆژی و تەكوینی تەماشای ژنان و پیاوانیش بكەین، ئافرەت هیچ فەرقێكی نییە لە گەڵ پیاو. هەروەها لە باری تەكوینی مێشكەوە ژن و پیاو هیچ جیاوازییان نییە یانی ئەو رۆڵەی كە پیاو دەیبینێ‌ ژنیش بە هەمان ئەندازە و بگرە زیاتریش و باشتریش دەتوانێ‌. چونكە بە راستی ژیان خۆی بریتیە لە كۆمەڵێك دیپلۆماسیەت ئێستا پەروەردەكردنی منداڵان خۆی جۆرێكە لە سیاسەت كردن. بە پێچەوانەی ئەوەیە كە خەڵكی بیری لێدەكەنەوە، تەنانەت بەهۆی ئەو چاودێرییەی ژنان لە ژیاندا، زۆرتر بە سیاسەت و تێكڵاوی سیاسەتەوە نزیكترن و دەتوانن زیرەكانەتر كار بكەن و گرێداروتریشە.
ژنان زۆر بە سەبر و خۆراگرن بە تایبەت بۆ بەرامبەرەكەیان. ئەوەش لە كاری سیاسەتدا گرینگە. زیاتر گوێی لێئەگیرێ‌ و بواری پێدەدرێ‌. لەكۆلدا سیاسەت مێشك و سەبر و دیپلۆماسیەتی دەوێ‌. لەكۆمەڵگەی ئێمەدا هیچ گرنگی بە تواناكانی ژنان نەدراوە و بەرهەمەكانی بە پێ تێروانینی خۆدی ژن هەڵنەسەنگێنراوە، تەنیا بەو پێیەی كە سەر بە كام لایەن و حزبێكە تەماشای كراوە و هەڵسوكەوتی بەرامبەر كراوە. ژنان هەتا ئێستا نەیانتوانیووە سەربەخۆ بن و سیاسەت بەرێوە ببەن. هەمیشە لەمپەرێكیان لەبەرامبەریان داناوە، هەر ئەمەی كە دەڵێن سیاسەت كاری ژنان نییە، گەورەترین لەمپەرە. 
رۆژی وڵات/ لە شاری رێكخراوەكانی تایبەت بە كاروباری ژنان چەندە توانیوویانە ئەم لەمپەر كاڵ بكەنەوە یان خۆد ببنە پردێكی پەڕینەوە بۆ ژنان لە كایە سیاسیەكاندا؟
وەڵام/ لە شاری كەركوكدا چەند رێكخراوەی ژنانمان هەیە كە هەر هەمویان لە ژێر دەسەڵاتی حیزبەكاندان یان لە ژێر دەسەڵاتی كەسانێكی سەر بە دەسەڵاتدان. هەتا ئێستا نەتوانراوە رێكخراوەیەكی ژنان ئاوا بكرێت كە بە ئازادی و سەربەخۆ ئیش بكات. هێندێك رێكخراوە هەیە كە دەڵێن ئێمە سەربەخۆین، بەڵام لە راستیدا وا نییە، بەگشتی لە ئاستی باشووری كوردستاندا رێكخراوەی سەربەخۆی ژنانمان نییە كە تایبەت كار بۆ پرسەكانی ژنان و چارەسەری كێشەی ژنان بكات. هەر ئەوەش بۆتە هۆكار كە من ئەو ماوەیەی دوایی لە رێكخراوەكان دوور بم، چونكە من بە راستی هەستی پێدەكەم و دەبینم كە هەر رێكخراوەیەك لە ژێر فشاری حیزبەكەی دایە و ناتوانێ‌ تەنانەت لە ناو كۆبوونەوەی رێكخراوەكاندا بیر و ڕای خۆی دەرببڕێت یان بڕیارێكی سەربەخۆ بدات هەتا نەچێت و لە بەرپرسی حیزبەكەی خۆی پرس نەكات، تاكو بزانێ‌ رێنمایەكانی چییە كە ئەو دەیداتێ‌ ئەو كاتی ئەتوانێ‌ قسە بكات و بریار بدات. جا ئەگەر لە ناو رێكخراوەكاندا بارودۆخی ژن ئاوا بێت ئیتر لە سیاسەتدا چۆن دەتوانێ‌ بە ئازادی و سەربەخۆییەوە بەدوا داچوون بكات؟ لە كاتێكدا هیچ لایەنێك نەبێت كە باوەڕی بەوە هەبێت كە ئەو مرۆڤە هێز و توانای هەیە با ئاوا سەیر نەكرێت كە ئەوە ژنە یان پیاوە، با بزانین كە هەتا چ ڕادەیەك توانا و بەهرەی هەیە بۆ ئەنجامی كارەكانی.
هۆی سەرەكی دواكەوتوویی لە وڵاتی ئێمە دا هەر ئەوەیە كە من سەیر ناكەم كە تۆ چەندە توانات هەیە و چی دەتوانی بكەی ئەوەی كە گرینگ دەبێت ئەوەیە كە تۆ سەر بە كام حیزب و لایەنی و لایەنگری كام حیزبی و هەتا چەندێك ئێوە ئیمكان و دەسەڵاتتان هەیە بۆ ئەنجام دانی شتەكان، ئەوەیە كە گرینگی پێدەدرێ‌. قەت لێرە سەیری توانای ئافرەت نەكراوە بە پێی ئەوەی كە سەر بە كام حیزبە سەیری ژن كراوە. بۆ وێنە ئێستا ئەو حیزبانەی كە دەسەڵاتن و حیزبی سەركردەن ئافرەتیان بە چاوێكی تر سەیر دەكرێ‌، بەڵام لە كاتی بەراورد لە گەڵ ژنانی رێكخراوەكانی دیكە بە ڕوونی دەبینرێ‌ كە ئەو رۆشنبیری و توانایەی كە لە ژنانی رێكخراوەكانی تردا هەیە قەت لەواندا نییە بەڵكو تەنیا لەبەر ئەوەی كە سەر بە حیزبێكی سەركردە و دەسەڵاتە زیاتر گوێی لێدەگیرێ‌َ و بواری پێدەدرێت بەڵام ئەوەی كە لە حیزبێك دایە كە زۆر ئیمكانی نییە یان سەر بە حیزبە دەسەڵاتدارەكان نییە و زۆر ناودار نییە ئەوە ئەو ئافرەتە سەیری تواناكان و هێزی سیاسی ناكرێت و ئەوەی كە دەتوانێ‌ چەندە خزمەت بە ژن و كۆمەڵگا و سیاسەت بكات بەرچاو ناگیرێت. ژن بەداخەوە لە وڵاتی ئێمەدا رۆڵی خۆی نەبینیوە، لە بەر ئەوەی ئێمە بە بەردەوامی لە ژێرفشار و تەوژمی حیزبەكاندا ئیش دەكەین و هیچ كاممان سەربەخۆ نین ئەوە بە بێ‌ جیاوازی بۆ هەموو رێكخراوەكانی ژنان راستیەكە.
رۆژی وڵات/ باشە ئەگەر وایە كە بەرێزتان باسی دەكەن، ئەی ژنان چۆن دەتوانن ئیرادەی سیاسی خۆیان پێشبخەن؟
وەڵام/ یەكەم كار ئەوەیە كە لە ژێر دەسەڵاتی حیزبەكەیان دەركەون و بە ئازادانە و سەربەخۆ ئیش بكەن. ئایا هیچ كام لە رێكخراوەكانی ژنان قانعن بەو ئیشانەی كە كردوویانە؟ من خۆم هەست ناكەم كە كارێكم بۆ ژن كرد بێت ئەوانەی كە كردوومانە لە شاری كەركوك بۆ ژنان چییە، چیمان گوڕیووە. ژنی ئەم شارە ئەوەتا رۆژانە دەكوژرێن، رۆژانە كۆیلە دەكرێن لە زیندانی ماڵدا دەمێننەوە. تاوانەكە پیاو دەیكات، بەڵام رووبەرووی هیچ ئاستەنگیەك نابێتەوە، تەنانەت نەمانتوانیوە ژن لە ئاستێكدا رۆشنبیر بكەین و بە مافەكانی خۆی وشیاری بكەینەوە. ژنان هەتا ئێستا نازانن كە مافیان چییە، ئەوە كە هەیە وەكو قەدەرێك بۆ خۆیان دەیبینن. كاتێك دەڵێن كە رێكخراوەكانی كاریان نەكردووە، ئەمەیە، نەك هیچ كارمان نەكردووە، یان ئەوەتا حەز ناكەین كار بۆ ژنان بكەین، كارەكانمان لە پێناو بەرژەوەندی حزبەكانماندایە، بۆیە ناتوانین سەربەخۆ بین.
رۆژی وڵات/ ئەو یاسایانەی كە دەڵێن بۆ بەرژەوەندی ژن و بە ناوی خزمەت بە ژنان دانراون چەندە هاندەر بوون بۆ چارەسەری كێشەكانی ژنان، سەرەڕای ئەوەی كە ژنان خۆیان لە ناوەندی بڕیاردا نین؟
وەڵام/ لە ناوەندی بڕیار دانین و گومانم هەیە كە ڕۆژێك لە ناوەندی بڕیاریشدا هەبن. ئەو یاسایانەی كە دانراون هەر حیسابیان ناكەم كە خزمەتیان بە ژن كرد بێت هەر بچووكترین شت كە قەدەغە كردنی فرەژنی بوو، یانی بەرپرسێَك ئەگەر دوو ژنی هەبێت لە ئاستی بەرپرسیارەتی لادەبرێ‌ بۆ ئەوەش دەچێ‌ هاوسەرگیری نهێنی دەكات. هیچ شتێكیش نییە كە رێگر بێت من بەرپرس دەناسم كە دوو ژن و چوار ژنی هەیە و لە سەر ئیشەكەشی لانەبراوە ئەو مەرجەشی نییە كە ژنی یەكەم رازی بێت. ژنی یەكەمی هەر نازانێ‌ كە ژنی تری هەیە. ژن دەبێ‌ بێ‌ و بڵێ‌ كە من رازیم مێردەكەم ژنی دووەم بهێنێ‌! یانی بەو جۆرە دەڵێن كە كێشەی فرەژنیمان لە كوردستان چارەسەر كردووە.
رێگای زۆر هەیە كە پیاو، ژنی د‌و‌وەم بهێنێت. بە بێ ئە‌وەی كە یاسا سزای بدات یان هەتا هەر پێشی بزانێت. كێشە كە لێرە دایە كە لەشوێنی هاوسەرگیری یاسایی، ها‌وسەرگیری شەرعی دەكات ‌واتە بە رێگای مەلاكان ها‌وسەرگیری نایاسایی دەكەن. دوا رۆژیش كۆمەڵێك منداڵ دێنێتە دونیا كە دەبن بە كۆسپێك بۆ كۆمەڵگە. لەبەر ئە‌وەی زە‌واجەكەیان بەرێگەی شەرعییە ‌و نایاساییە. یاساش دان بە منداڵێكدا نانێت كە دایك ‌و با‌وكیان لە رێگەی یاسا ها‌وسەرگیریان نەكرد‌و‌وە.
رۆژانە بە هەزاران ژن تەڵاق دەدرێن. تەنانەت لەم دواییانەدا موالیدی (2000) تەڵاق درا. ئەگەر بپرسین هۆكاری ئەمانە چین؟ بێگومان هۆكاری یەكەم ناهۆشیاری خێزانیە بۆ بەشودانی كچ ‌و لەلایەكی تریشە‌وە ئە‌و ها‌وسەرگیریانەی ئێستا، لەسەر بنەمایەكی پتە‌و‌و تەندر‌وست نییە. ئیتر ئە‌و یاسا ‌و دادگایەی كە دانرا‌وە چ خزمەتێكی بەمن كرد‌و‌وە؟ كچەكەم بە منداڵی، قانو‌ون بەشووی نادات، بەڵام شەرع لە دەرە‌وە دەیدات بەشو ‌و پێویستە لێرەدا كۆنترۆڵی مەلاكان بكردرێت تا لەدەرەوە زە‌واجی شەرعی قبوڵ نەكەن بۆ تەمەنی 12‌و 13 ساڵ. بۆ ئە‌وەی كە لەدایكبو‌وانی (2000) لە دەرە‌وە تەڵاق نەدرێن. لە‌و تەمەنەدا چ دەزانێت لە ژیان، بەڵكو ئە‌و ئێستا منداڵە‌و پێویستی بە پەر‌وەردە هەیە، لە كاتێكدا تۆ دەیخەیتە ژێر باری بەرپرسیارێتیەكی گرانتر.
ئەگەر یاسا ‌و دادگاكانمان كێشەی ژنیان چارەسەر كردبێت لە دایكبو‌وانی (2000) چۆن مارە دەكرێن ‌و چۆن تەڵاق دەدرێن؟ ئایا دادگا هیچ پرسیارێك لە خۆی ناكات. یان لە تەمەنی بچو‌وكدا زە‌واج، دادگا رەتی دەكاتە‌وە كە چی بە ئامادەیی ولی ئەمر(گەورەی ماڵ) قبوڵی دەكات. ئە‌وە چ كێشەیەكی بۆ ژن چارەسەر دەكات ‌و چ خزمەتێك بە ژن دەكات. ژن هەیە تەڵاق دەدرێت ‌و هیچ مافێك ‌وەرناگرێت یان ژنی بەسەردا دێت ‌و هیچ مافێكی نییە بۆ قسەكردن‌و موداخەلەكردن. ‌واتە ئە‌و یاسایانە بەشێوەیەكی ر‌و‌وكەشیانە دەڵێن خزمەت بە ژن دەكەین، بەڵام لە نا‌وەرۆكدا هیچ ‌و بەتاڵن. بۆیەش دەڵێم ئە‌و یاسایانە هیچ خزمەتێكیان تا ئێستا بە ژن نەكرد‌و‌وە. لەبەر ئە‌وەش ئە‌وەی قانون نایكات لە دەرە‌وە شەرع دەیكات. بۆیە دەبێت حكومەت ‌و دادگاكان كۆنترۆڵی دەرە‌وە ‌و ئە‌و گر‌وپانە بكەن كە كاری شەرع دەكەن.
رۆژی ‌وڵات/ ‌وەك ژنێكی چالاك لە بواری سیاسیدا، كێشەی سەرەكی ژنان لەم بوارەدا لە چیدا دەبینن؟
وەڵام/ یەكەم لەژێر دەسەڵاتی حزبەكان دەركە‌ون و دووهەمینیش دان پێدانانی كۆمەڵگا بە تواناكانی ژنان. ئە‌و ژنانەی كە كار دەكەن كێشەكانیان زۆرترە لە‌و ژنانەی كە لە ماڵە‌وەن، چونكە ئێمە ر‌و‌وبەڕ‌و‌وی زۆر شت بو‌وینەتە‌وە داواكاری زۆرمان هەیە، دەسەڵاتیش هیچ ئا‌وڕێكمان لێ ناداتە‌وە بۆیە لێرە هیچ شتێكی بچوك ‌وەك شەڵتەرێكی ژنان نییە كە ‌وەك پەناگەیەك لەكاتی لێقە‌ومانی كێشەكان ژنان پەنای بۆ بەرن، چونكە را‌وەستەی لەسەر نەكرا‌وە. من ‌وەك رێكخرا‌وێك دەرفەت و ئیمكانیەت ‌و پەناگەیەكم نییە بیگرمە خۆم ‌و بیپارێزم ‌و یارمەتییەكی باشی بدەم. زۆربەری زۆری رێكخرا‌وەكانیش بەمشێوەیەن بۆیە دا‌وای پەناگەیەكمان بۆ ژنان كرد، بەڵام لەگەڵ ئە‌وەی پارێزگاریش رەزامەندی نیشاندا لەسەری كە چی هەتا ئێستا شەش مانگ تێپەڕیوە ‌و هیچی بۆ نەكرا‌وە. لێرەدا دەپرسم بۆچی شوێنێكی ‌وا لە شارەكەماندا نەبێت؟
‌وەكو رێكخرا‌وەكانی ژنان ‌و ‌وەكو كەمپینی نا بۆ كەلتوری دەستدرێژی لەسەر ژنان كاتێك دا‌وای پەناگەیەكمان كرد بۆ ژنان پارێزگار نەك یەك، بەڵكو بەڵێنی د‌و‌و پەناگەی پێداین كە چی تا ئێستا نە ‌وەڵام ‌و نە ئەنجامێكمان بەدەست گەیشتووە. ئەمە یەكێكە لە كێشە هەرە گە‌ورەكانی ژنان. ئەگەر سەیری بكەین بۆمان دەردەكە‌وێت كە بۆ چی بنەماڵەكان هەر لە تەمەنی بچو‌وكدا كچەكەیان بەشو‌و دەدن بۆ ئە‌وەی كە لە ژێر ئە‌و بەرپرسیارێتیە دەركە‌وێت.
بنەماڵە لە كچ بێزارە ‌و لەكاتی تەڵاقداندا ‌وەریناگرێتە‌وە بۆیەش لێرە پەناگەیەكی ژنان گرنگیەكی زۆری هەیە. ئەگەر دەسەڵات دانمان پێدا بنێت ‌و دەرفەتمان بۆ دابین بكات ئە‌و هەڵەمان بۆ برەخسێنێت كە كار بە ئازادانە بكەین ئەوە باشە.
خاڵەكەی تر دابینكردنی ئاسایشە كە لەكاتی كاركردندا هەستی پێ بكەیت. كاتێك دەردەكە‌ویت بۆ كارەكەت هەست نەكەیت كە یەكێك لە گەڵتە ‌و چا‌ودێریت دەكات و دەیەوێت تیرۆرت بكات. ئە‌وانە تەنیا بەشێكی بچوكن لە‌و كێشانەی كە ر‌و‌وبەڕ‌و‌وی ژنان دەبنە‌وە لە كاتی كاركردندا. 
كێشەیەكی ترمان ئەوەیە كە دەسەڵات دان بە كارەكانی ئێمە دانانێت. ئێمە بە كاتژمێران لەبەر دەرگای پارێزگا را‌وەستا‌وین بە بێ ئە‌وەی كە كەسێك ‌وەڵاممان بداتە‌وە، تەنانەت ئەندام پەرلەمانە ژنەكانیش نەهاتنە دەرە‌وە بزانن ئە‌و هەمو‌و ژنە هاتوون ‌و خۆپیشاندان دەكەن هۆكارەكەی چییە ‌و چیان دە‌وێت. كەس هەتا ئێستا نەهاتۆتە دەرە‌وە ‌و پێمان بڵێت چیتان دە‌وێت لە پارێزگار كە ‌وەڵامتان بداتە‌وە ‌و بۆتان جێبەجێ بكات، ئە‌وەش كێشەیەكی گە‌ورەیە كە لایەنی پەیوەندیدار گوێت لێنەگرێت.
رۆژی ‌وڵات/ ما‌وەیەكە باس لە بەستنی كۆنگرەی نەتە‌وەیی كورد دەكرێت، پێتان ‌وایە ژنان رۆڵیان چییە لە بەستنی كۆنگرەی نەتە‌وەیی؟
وەڵام/ ئێمە بۆ كێشە نەتە‌وەییەكان زۆر چالاكیمان كرد‌و‌وە، هەر لەشاری كەركوك ئێمە هەڕەشەشمان لێ كرا‌وە بەڵام هەر كرد‌و‌ومانە ئە‌وەی كە لە پێنا‌و نەتە‌وەكەمان بێت. ژن توانیویەتی رۆڵی خۆی زۆر باش بگێرێت لە پینا‌و خزمەتكردن بە كێشەی نەتە‌وەیی بەمەرجێك كە دەرفەتی پێ بدرێت. هیوادارم كە ژنان لەم كۆنگرەیەدا بەشداریەكی باشیان هەبێت، ئەگەر ئە‌و حزبانەی كە نوێنەری خۆیان دەنێرن رێژەیەكی زۆریان ژن بێت زۆر باشە. ئەگەر ‌وا بێت من ‌واهەست دەكەم كە ئە‌و كۆنگرەیە سەركە‌وتنێكی باش بەدەستبهێنێت، چونكە لە سیاسەت‌و دیبلۆماسیدا توانای ژنان زۆر گە‌ورە‌و بەهێزە، ئەگەر رێژەی ژنان زۆر بێت لە‌و كۆنگرەیەدا ئە‌وا هەر كەسێك دەبینێت كە ژنان رۆڵی خۆیان چۆن دەبینن. 
رۆژی ‌وڵات/ دوا ‌وتەت سەبارەت بە بەشداربوونی ژنان لە سیاسەتدا؟
وەڵام/ هیوادارم كە دەرفەتی زیاتر بدرێت بە ژنان بۆ كاركردن لە كۆمەڵگادا چ لە كاری سیاسی ‌و كۆمەڵایەتی و لە گشت بوارەكانی تردا. پێشنیارێكیشم هەیە بۆ حزبەكان چیتر دەست لە كاری ژنان ‌وەرنەدەن ‌و بهێڵن ئە‌و ژنانە بە ئازادانە كار بكەن بۆ ئە‌وی ئە‌و كاتە ببینن كە رۆڵی ژن چۆنە. ‌واتە دەبێت ژن ئازاد بهێڵرێتەوە و لەژێر فشاری حزبەكان دەركەوێت. ئەگەر ئێمە ژنان هەموو بە یەكدەنگ و یەكدەست بین و لە ژێر دەسەڵاتی حیزبەكانی خۆمان و لە ژێر دەستی دەسەڵات دەرچین ئەو كاتەی تواناكانی ئێمە دەردەكەوێت، بەڵام تاكو ئێمە لە ژێر دەستی پیاودا كار بكەین ئەوە بە هیچ شێوەیەك رزگاریمان نابێت و كەسیش هەست بە رۆڵ و كاریگەریەكانی ئێمە ناكات هەر چەندە ژنان رۆشنبیر و بە تواناش هەبن. سەرچاوە... پارتی جارەسەری دیموکراتی کوردستان

Share

 

 

شوكریە سەعید

Share