Red Purple Black
Kurdistanigawre@gmail.com
سێكس، عه‌شق، خۆشه‌ویستی ....ستیڤان شه‌مزینانى

stivan 333سێكس، عه‌شق، خۆشه‌ویستی

دیمانه‌یه‌ك له‌گه‌ڵ رۆژنامه‌وان (ستیڤان شه‌مزینانى)

دیمانه‌: ئه‌وین عه‌لادین

* عه‌شق له‌وه‌ گه‌وره‌تره‌ له‌چوارچێوه‌ى زه‌واجدا بچووك بكرێته‌وه‌

* له‌ عه‌شقدا دوو كه‌س نامێنێت به‌ڵكو هه‌ریه‌ك كه‌س هه‌یه‌

* خۆشه‌ویستى تاكه‌ شته‌ زۆرترین درۆى له‌په‌ناوه‌ كراوه‌

* به‌پێى كولتوورى كورده‌واریى له‌ موماره‌سه‌ى سێكسدا ژن به‌ركار و پیاو بكه‌ره‌

ئه‌وین: یه‌كه‌م پرسیارمان ئه‌وه‌یه‌ په‌یوه‌ندیى كوڕ و كچ وه‌ك هه‌ر جۆره‌ په‌یوه‌ندییه‌كى تر چۆن سه‌یر ده‌كه‌یت؟
ستیڤان شه‌مزینانى: ئه‌وه‌ په‌یوه‌ندییه‌كى سروشتى و ئاساییه‌ كه‌ ده‌بێت له‌نێوان مرۆڤه‌كاندا دروست بێت، دیاره‌ په‌یوه‌ندیی نێوان مرۆڤه‌كان به‌جیاواز له‌ ره‌گه‌ز و ته‌مه‌ن و ئاستى تێگه‌یشتن و رۆشنبیریى كاتێك په‌یوه‌ندییه‌كى سروشتى ده‌بێت كه‌ له‌سه‌ر بنه‌مایه‌ك دروست بووبێت ئینسان به‌ته‌واوه‌تى ئازاد بێت له‌دروستكردنى په‌یوه‌ندییه‌كانى له‌گه‌ڵ ئه‌ویترى به‌رامبه‌ر. به‌لاَم له‌كۆمه‌ڵگه‌ داخراوه‌كاندا، ئه‌و كۆمه‌ڵگایانه‌ى ئازادییه‌كان تیایاندا سنووردار كراون و په‌یوه‌ندییه‌كانى نێوان ره‌گه‌زى نێر و مىَ په‌یوه‌ندیگه‌لێكى سنووردار و تابو كراون، ئه‌م حاڵه‌ته‌ و ئه‌و په‌یوه‌ندییه‌ ته‌ندروسته‌ى تیادا له‌دایك نابێت. له‌كۆمه‌ڵگه‌ى ئێمه‌دا په‌یوه‌ندیى نێوان دوو ره‌گه‌زه‌كه‌ په‌یوه‌ندییه‌كى سروشتى نییه‌ و له‌هه‌موو حاڵه‌ته‌كاندا په‌یوه‌ندییه‌كه‌ چه‌پاندن و چاو و سانسۆرى كۆمه‌ڵگه‌ى له‌سه‌ره‌.
ئه‌وین:ئه‌و هۆكارانه‌ چین وا له‌ خه‌ڵك ده‌كات به‌چاوێكى سووك سه‌یرى په‌یوه‌ندیى نێوان كوڕ و كچ بكه‌ن؟.
ستیڤان شه‌مزینانى: فاكتۆره‌كانى ده‌گه‌ڕێنه‌وه‌ بۆ زۆر شت، یه‌كێك له‌وانه‌ بریتییه‌ له‌ خوونه‌ریت و ترادیسیۆنى كۆمه‌لاَیه‌تى ئێمه‌ وه‌ك كورد، ئه‌و دابونه‌ریته‌ى زاڵه‌ به‌سه‌ر كۆى بیركردنه‌وه‌ى خه‌ڵكى كوردستاندا دابونه‌ریتێكى خێڵه‌كى و هۆزگه‌راییه‌، كه‌ له‌ناو ئه‌م كولتووره‌دا جێگه‌ى په‌یوه‌ندیى هاوبه‌ش و سروشتیى مرۆڤه‌كان نابێته‌وه‌، به‌تایبه‌تى په‌یوه‌ندیى نێوان ره‌گه‌زى نێر و مىَ، ئه‌مه‌ یه‌كێكه‌ له‌و فاكتۆرانه‌ى به‌درێژایى مێژووى كورد كاریگه‌ر بووه‌ له‌سه‌ر دوورخستنه‌وه‌ى ئه‌و دوو ره‌گه‌زه‌ له‌یه‌كترى و هۆكارێكى به‌هێزیش بووه‌ له‌بوغز دروستكردن له‌نێوان ئه‌و دووره‌گه‌زه‌دا.
یه‌كێكى تر له‌و فاكتۆرانه‌ بریتییه‌ له‌ ئاین، چونكه‌ ئاین رۆڵێكى كاراى بینیووه‌ له‌ دوورخستنه‌وه‌ى دوو ره‌گه‌زه‌كه‌، په‌یوه‌ندییه‌كانى نێوانیانى حه‌رام كردووه‌ و ته‌نیا رێگه‌یه‌كى بۆ دۆزیوه‌ته‌وه‌، ئه‌ویش بریتییه‌ له‌و رێگه‌یه‌ى خۆى دیاریكردووه‌ (زه‌واج) ، له‌به‌رئه‌وه‌ ده‌توانم بڵێم دوو فاكتۆرى هه‌ره‌ گرنگ له‌دروستكردنى ئه‌و گۆشه‌نیگایه‌دا رۆڵیان گێڕاوه‌، كولتوورى كۆمه‌لاَیه‌تى زائیده‌ن ئاین كه‌ دیسان ئه‌ویش به‌شێكه‌ له‌ كولتوورى ئێمه‌.
ئه‌وین: پێتوایه‌ له‌كۆمه‌ڵگه‌دا جگه‌ له‌زه‌واج رێگه‌یه‌كى تر هه‌بێت ئه‌و دووره‌گه‌زه‌ بگه‌یه‌نێته‌وه‌ به‌یه‌ك؟.
ستیڤان شه‌مزینانى: ئه‌گه‌ر باسى ئێستا بكه‌ین، ده‌بینین په‌یوه‌ندیى له‌نێوان دوو ره‌گه‌زه‌كه‌دا هه‌یه‌، به‌لاَم به‌و فۆرمه‌ نییه‌ كه‌ ده‌بێت هه‌بێت یانى په‌یوه‌ندییه‌كى سروشتى نییه‌، بۆ نموونه‌ كاتێك من و تۆ له‌ ده‌ره‌وه‌ كوڕ و كچێك به‌یه‌كه‌وه‌ ده‌بینین ماناى ئه‌وه‌ نییه‌ ئه‌و دوو كه‌سه‌ ئازادن به‌ڵكو له‌وانه‌یه‌ له‌دڵه‌ خورپه‌ و ترس و راڕایدا یه‌كتریان بینیبێت، واته‌ په‌یوه‌ندییه‌كه‌ له‌ژێر گوشاردایه‌. ئه‌وه‌ بریتییه‌ له‌ جورئه‌ت نیشاندان و یاخى بوون كاتێك دوو كه‌س مه‌به‌ستم كوڕ و كچه‌ به‌یه‌كه‌وه‌ ده‌بینین، چونكه‌ له‌چه‌ند حاڵه‌تێكى كه‌م و له‌ئاستى ده‌سته‌بژێردا نه‌بێت هه‌موو په‌یوه‌ندییه‌كان به‌دزى كولتوور و بنه‌ماڵه‌وه‌ و چاوى ده‌وروبه‌ره‌وه‌یه‌.
تاكه‌ كه‌ناڵێك كرابێته‌وه‌ بۆ ئه‌وه‌ى ئه‌و دوو ره‌گه‌زه‌ یه‌كترى تیابناسن ته‌نانه‌ت له‌ رووى ناسینى شه‌خسییه‌وه‌ بریتییه‌ له‌ زه‌واج، جگه‌ له‌مه‌ش خۆ ئه‌گه‌ر كوڕ و كچه‌ گه‌نجه‌كانى ئێمه‌ یه‌كتریش بناسن له‌ نزیكه‌وه‌ نه‌یانتوانیوه‌ له‌ناخ و تایبه‌تمه‌ندییه‌كانى یه‌كتر تێبگه‌ن، چونكه‌ هه‌رده‌م ته‌مسیلیان له‌به‌رده‌م یه‌كتردا كردووه‌، ئه‌مه‌ش له‌به‌رئه‌وه‌ى له‌ كۆمه‌ڵگه‌یه‌كدا ژیاون هه‌موو ئازادیى و په‌یوه‌ندییه‌ كۆمه‌لاَیه‌تییه‌ سه‌ربه‌سته‌كانى تیا قه‌ده‌غه‌كراوه‌.
ئه‌وین: پێتوانییه‌ ئه‌گه‌ر په‌یوه‌ندیى نێوان كوڕ و كچ نه‌گاته‌ زه‌واج په‌یوه‌ندییه‌كه‌ ناشه‌رعى و نادروسته‌؟.
ستیڤان شه‌مزینانى: مه‌رج نییه‌ وابێت... ئێمه‌ له‌كۆمه‌ڵگه‌یه‌كدا ده‌ژین ئازادییه‌كان به‌تایبه‌ت ئازادیى موماره‌سه‌ى سێكسى رێگه‌ى لێگیراوه‌، هه‌موو ئه‌و په‌یوه‌ندییانه‌شى له‌نێوان دوو ره‌گه‌زه‌كه‌دا دروست ده‌بێت ته‌ریب كراوه‌ته‌وه‌ له‌گه‌ڵ ئه‌م غه‌ریزه‌یه‌دا، به‌لاَم ئه‌گه‌ر كۆمه‌ڵگه‌یه‌ك ئازادیى به‌تایبه‌تى ئازادیى سێكسى تیا بێت مه‌رج نییه‌ هه‌موو ئه‌و په‌یوه‌ندییانه‌ به‌زه‌واج ده‌ست پێبكات یان كۆتایى پێبێت، ته‌نانه‌ت مه‌رج نییه‌ هه‌ر كرده‌ى سێكس تیایدا ئه‌نجام بدرێت.
له‌كۆمه‌ڵگه‌یه‌كى نه‌ریتى وه‌ك ئه‌وه‌ى ئێمه‌دا كاتێك ئه‌و په‌یوه‌ندییه‌ به‌دروست و واقیعى ده‌زانرێت به‌زه‌واج بگات، به‌لاَم مه‌رج نییه‌ هه‌موو په‌یوه‌ندییه‌ك بگاته‌ زه‌واج، تۆ مه‌حكوم نیت به‌وه‌ى له‌گه‌ڵ كه‌سێكدا كه‌ ناتوانى له‌داهاتوودا ئیستیعابى بكه‌یت و بژیت زه‌واج بكه‌یت.
ئه‌وین:ئه‌ى بۆچى خۆشه‌ویستى له‌گه‌ڵدا ده‌كه‌یت؟
ستیڤان شه‌مزینانى: مه‌رج نییه‌ ئه‌و كه‌سه‌ى تۆ خۆشت ده‌وێت به‌ئیتارى زه‌واج گه‌مارۆى بده‌یت و ته‌نیا زه‌واج بێت مانا بداته‌ په‌یوه‌ندییه‌كه‌ كه‌ خۆشه‌ویستییه‌كى راسته‌قینه‌یه‌ یان نا؟ به‌لاَم من وتم نابێت مرۆڤ مه‌حكوم به‌وه‌ بكرێت كه‌ په‌یوه‌ندییه‌كى دروستكرد ئیلاَ و بیلاَ بگاته‌ ئه‌و ده‌ره‌نجامه‌ (زه‌واج). ده‌ره‌نجامه‌كه‌ خۆى پێى ده‌گات، ئاكامه‌كه‌ به‌چه‌شنى شێوه‌ى په‌یوه‌ندییه‌كه‌ ده‌رده‌چىَ، ئه‌گه‌ر سروشتى بێت ده‌ره‌نجامه‌كه‌ش سروشتییه‌ و پێچه‌وانه‌كه‌شى هه‌روه‌ها.
ئه‌وین: ئه‌وه‌ روون بكه‌ره‌وه‌ كه‌ مه‌به‌ستت له‌وه‌ چییه‌ ده‌ڵێى مه‌رج نییه‌ كۆتایى هه‌موو په‌یوه‌ندییه‌ك بگاته‌ زه‌واج، ئه‌مه‌ كه‌مێك ئاڵۆزه‌؟.
ستیڤان شه‌مزینانى: لوتكه‌ى خۆشه‌ویستى بریتی نییه‌ له‌زه‌واج، ده‌كرێت ئه‌و په‌یوه‌ندییه‌ وه‌ك خۆى بمێنێته‌وه‌ هه‌روه‌ك چۆن ده‌كرێت كۆتایشیى پێبێت.
ئه‌وین:تۆ وه‌ك ئه‌وروپا قسه‌ ده‌كه‌یت، بۆ باسى كۆمه‌ڵگه‌ى خۆمان ناكه‌یت؟.
ستیڤان شه‌مزینانى: باسى ئه‌وه‌م نه‌كردووه‌ با وه‌ك ئه‌وروپا قسه‌ و ره‌فتار بكه‌ین، مه‌به‌ستى من ئه‌وه‌یه‌ له‌به‌رئه‌وه‌ى كۆمه‌ڵگه‌ى كوردیى كۆمه‌ڵگه‌یه‌كى چه‌پێنه‌ره‌ و كۆمه‌ڵگه‌یه‌كه‌ كاریگه‌ریى كولتوورى كۆن و ئاینى به‌ رادده‌یه‌كى زۆر له‌سه‌ره‌، په‌یوه‌ندییه‌كان تێیدا به‌سروشتى نه‌ماونه‌ته‌وه‌ و شێوێندراون، هه‌ر بۆیه‌ په‌یوه‌ندیى نێوان كوڕ و كچه‌كانیش په‌یوه‌ندییه‌كى راست و دروست نین و له‌سه‌ر بنه‌مایه‌كى ته‌ندروست بونیاد نه‌نراوه‌، له‌به‌رئه‌وه‌ى لێره‌ خۆشه‌ویستى تابۆیه‌ و هه‌بوونى په‌یوه‌ندیی سێكسى له‌نێوان هه‌ردوو ره‌گه‌زدا له‌و تابۆتر بووه‌ و به‌كاره‌سات لێكدراوه‌ته‌وه‌، چونكه‌ به‌پێى كولتوورى كورده‌واریى له‌پرۆسێسى موماره‌سه‌ى سێكسدا ژن به‌ركار و پیاو بكه‌ره‌، هه‌میشه‌ ئه‌م كولتووره‌یه‌ وا له‌خه‌ڵكان ده‌كات كه‌ ده‌بىَ كۆتایى و لوتكه‌ى په‌یوه‌ندییه‌ سۆزدارییه‌كانیان بریتى بێت له‌ زه‌واج، له‌كاتێكدا مه‌رج نییه‌ وا بێت، هه‌روه‌ك چۆن ئاساییه‌ بگاته‌ زه‌واج ئاوهاش هه‌ر ئاساییه‌ نه‌گاته‌ زه‌واج.
ئه‌وین:تۆ وتت ئاین هۆكارێكه‌ له‌دوورخستنه‌وه‌ى ره‌گه‌زى نێر و مىَ له‌یه‌كتر به‌چ به‌ڵگه‌یه‌ك ئه‌م قسه‌یه‌ ده‌سه‌لمێنى له‌كاتێكدا كچى پێغه‌مبه‌ر به‌خۆشه‌ویستى شووى كردووه‌؟.
ستیڤان شه‌مزینانى: من ئاگام له‌و چیرۆكانه‌ نییه‌ كه‌ له‌ مێژووى ئایندا باسیان لێوه‌ده‌كرێت، به‌لاَم ئاین وه‌ك ئه‌و تابلۆ و شێوه‌ گشتییه‌ى من ده‌یبینم په‌یوه‌ندیى ئازادانه‌ى نێوان هه‌ردوو ره‌گه‌زى حه‌رام كردووه‌، با باسى ئاینى ئیسلاَم بكه‌ین، كاتێك چاو به‌ئایه‌ته‌كانى قورئاندا ده‌خشێنین نه‌ك په‌یوه‌ندیى حه‌رام كردووه‌ به‌ڵكو سه‌یركردن و نیگاكردنیشى له‌نێوان هه‌ر دوو ره‌گه‌زدا حه‌رامكردووه‌، ئه‌مه‌ش كاریگه‌ریى هه‌بووه‌ له‌شێواندنى ئه‌و په‌یوه‌ندییه‌ سروشتییه‌ى ده‌بێت له‌نێوان هه‌ردوو جێنده‌ردا هه‌بێت، ئاین ته‌نیا رێگه‌یه‌كى هێشتۆته‌وه‌ بۆ به‌یه‌كگه‌یشتنى نێرومىَ و یه‌كتر ناسینیان ئه‌ویش رێگه‌ى زه‌واجه‌ به‌پێى رێوڕه‌سمى ئاینى.
پێش ئه‌وه‌ (واته‌ زه‌واج) رێگه‌ى نه‌داوه‌ له‌هیچ شوێنێكدا نێرو مىَ له‌ژێر هه‌ر ناوێكدا بێت ته‌نانه‌ت به‌یه‌كه‌وه‌ دانیشن، حه‌دیس هه‌یه‌ ده‌ڵێت ئه‌گه‌ر كوڕ و كچێك به‌ته‌نىَ به‌یه‌كه‌وه‌ دانیشتن سێهه‌میان شه‌یتانه‌، بۆیه‌ دووباره‌ پێموایه‌ ئه‌م كولتووره‌ ئاینییه‌ كاریگه‌ریی زۆر نێگه‌تیڤى هه‌بووه‌ له‌سه‌ر به‌ربه‌ستكردنى په‌یوه‌ندیى نێوان نێر و مىَ.
ئه‌وین:به‌ده‌ر له‌و مانا جوانه‌ى كه‌ خۆشه‌ویستى هه‌یه‌تى، به‌لاَم زۆربه‌ى په‌یوه‌ندییه‌كانى ئێره‌ به‌خیانه‌ت كۆتایى پێدێت، تۆ له‌مباره‌وه‌ چى ده‌ڵێیت؟ .
ستیڤان شه‌مزینانى: ده‌مه‌وىَ ئه‌و چه‌مكه‌ زۆر وتراوه‌یه‌ راست بكه‌مه‌وه‌ (خۆشه‌ویستى پاك و پیس)، له‌ڕاستیدا خۆشه‌ویستییه‌ك نییه‌ به‌ناوى خۆشه‌ویستى ناپاك، خۆشه‌ویستى یان هه‌یه‌ یان نییه‌، خۆشه‌ویستى هه‌مووى پاك و راسته‌ و پیسى نییه‌، ئه‌وه‌ى پیس و ناپاكه‌ هه‌ر له‌بنه‌ماوه‌ خۆشه‌ویستى نه‌بووه‌ و نابێت، ئه‌وه‌شى بووه‌ته‌ خۆشه‌ویستى په‌یوه‌ندییه‌كى راست و دروسته‌.
له‌كۆمه‌ڵگه‌ی كوردیدا هه‌موو شته‌كان به‌شێوه‌ى سروشتیى خۆیان نه‌ماونه‌ته‌وه‌، یه‌كێكیش له‌وانه‌ خۆشه‌ویستییه‌، له‌كۆمه‌ڵگه‌ى ئێمه‌دا عه‌شق به‌ته‌واوه‌تى و به‌هه‌موو جۆرێك شێوێندراوه‌، خه‌ڵكى ئێره‌ به‌ده‌گمه‌ن ده‌توانێت په‌یوه‌ندیى هه‌بێت جچاى عاشق بێت، به‌ده‌گمه‌ن ده‌توانێت له‌ده‌ره‌وه‌ى پاڵنه‌ره‌ سێكسى و غه‌ریزه‌ییه‌كانه‌وه‌ كه‌سێكى ترى خۆشبوێت.
ئه‌و كوڕه‌ گه‌نجه‌ى له‌گه‌ڵ كچێكدا ده‌یبینین یان به‌پێچه‌وانه‌وه‌، ئه‌وه‌نده‌ى پاڵنه‌ره‌ غه‌ریزیى و سێكسییه‌كه‌ كۆیكردۆوونه‌ته‌وه‌ له‌گه‌ڵ یه‌كتردا، به‌چاره‌گى ئه‌وه‌ پاڵنه‌ره‌ رۆحییه‌كان رۆڵیان نه‌بینیوه‌ له‌كۆكردنه‌وه‌یاندا، له‌كاتێكدا په‌یوه‌ندیى خۆشه‌ویستى بریتییه‌ له‌په‌یوه‌ندییه‌كى رۆحى قووڵ، به‌بىَ ئه‌و رۆحانییه‌ته‌ ناتوانین بڵێین عه‌شق و خۆشه‌ویستى هه‌یه‌، به‌لاَم له‌گه‌ڵ ئه‌وه‌شدا ئاساییه‌ ئه‌و په‌یوه‌ندییه‌ سێكسیشی تێدا ئه‌نجام بدرێت. لێره‌وه‌ ده‌مه‌وێت بچمه‌وه‌ سه‌ر كرۆكى ته‌وه‌رى پێشوو، ئه‌و په‌یوه‌ندییانه‌ى زوو به‌زوو كۆتاییان پێدێت خۆى له‌بنه‌ماوه‌ نه‌بوونه‌ته‌ عه‌شق تا بڵێین ئه‌وانه‌ عه‌شق بوون و خیانه‌تیان تیاكراوه‌.
ئه‌وین:ده‌كرێت بڵێین خیانه‌تى خۆشه‌ویستى چییه‌؟.
ستیڤان شه‌مزینانى: بامن له‌سه‌ره‌تاوه‌ ئه‌وه‌ بڵێم، ئینسانه‌كان به‌ده‌گمه‌ن ده‌توانن عاشق بن، هه‌موو ئه‌و په‌یوه‌ندییانه‌ى له‌سه‌ر شه‌قامه‌كان ده‌یانبینین، ناتوانین هه‌موو ئه‌مانه‌ ناوبنێین عه‌شق، ده‌كرێت ناویان په‌یوه‌ندیى بێت. عه‌شق ئاستێك یان پله‌یه‌كى بالاَتره‌ له‌و په‌یوه‌ندییه‌ى ئێمه‌ ده‌یبینین، چونكه‌ عه‌شق ساته‌وه‌ختى به‌دێوانه‌یى بوونه‌، به‌ده‌گمه‌ن عاشقه‌كان ده‌توانن خیانه‌ت بكه‌ن، به‌ده‌گمه‌ن ده‌توانن داببڕێن، مه‌گه‌ر نوقته‌ى دابڕان بریتى بێت له‌ خاڵى مه‌رگ.
ته‌نانه‌ت مه‌فهومى دابڕان له‌نێو عه‌شقدا هه‌بوونى نییه‌، من خۆم ئه‌گه‌ر مه‌عشوقه‌كه‌م به‌هه‌زاران كیلۆمه‌تر لێم دوور بێت هه‌رگیز هه‌ست به‌دابڕان ناكه‌م، چونكه‌ له‌پرۆسه‌ى عه‌شقدا من بووم به‌ به‌شێك له‌و و ئه‌و بووه‌ به‌ به‌شێك له‌ من، كه‌واته‌ به‌رده‌وام له‌گه‌ڵ خۆمدام یاخود به‌مانایه‌كى تر به‌یه‌كه‌وه‌ین. عه‌شق راسته‌وخۆ له‌قوولاَیى رۆحدایه‌، عه‌شق راسته‌وخۆ له‌ناو ئه‌ندێشه‌دایه‌، به‌لاَم به‌پێچه‌وانه‌وه‌ ئه‌و په‌یوه‌ندییه‌ى ده‌یبینین په‌یوه‌ندییه‌كه‌ له‌سه‌ر بنه‌ماى جه‌سته‌ و به‌رژه‌وه‌ندیى هاوبه‌ش.
ئه‌وین: تۆ ده‌ڵێیت ته‌نیا مه‌رگ كۆتایى به‌عه‌شق ده‌هێنێت به‌لاَم له‌هه‌مان كاتدا پێت ئاساییه‌ كه‌سێك پێش مه‌رگ واز له‌مه‌عشوقه‌كه‌ى بێنێت و بڕوات كه‌سێكى تر بهێنێت ئه‌مه‌ چۆن ده‌بینیت؟.
ستیڤان شه‌مزینانى: ره‌نگه‌ په‌یوه‌ندیى عه‌شق به‌درێژایى په‌یوه‌ندییه‌كه‌ وه‌ك عه‌شق و په‌یوه‌ندییه‌ك بمێنێته‌وه‌ و نه‌گاته‌ زه‌واج بىَ ئه‌وه‌ى گومان له‌راستى و دروستى په‌یوه‌ندییه‌كه‌ بكه‌ین، من نموونه‌ى سارته‌ر و سیمۆن دوبوڤوار به‌بیرت ده‌هێنمه‌وه‌ كه‌ تامردن پێكه‌وه‌ بوون بىَ ئه‌وه‌ى زه‌واج بكه‌ن.
ئه‌گه‌ر سه‌یرى چیرۆك و ئیپۆسه‌كانى عه‌شق بكه‌ین كه‌ ده‌ماو ده‌م ده‌وترێنه‌وه‌ و له‌وانه‌یه‌ له‌ رووى واقیعییه‌وه‌ راست نه‌بن و به‌رهه‌مى ئه‌ندێشه‌كانى مرۆڤ بن، له‌هیچ یه‌كێكیاندا عاشقه‌كان ناگه‌نه‌ ئه‌نجام وه‌ك ئه‌وه‌ى تۆ ده‌ته‌وێت، بۆ نموونه‌ مه‌م و زین نابنه‌ هاوسه‌رى یه‌كتر، له‌كاتێكدا ئێمه‌ ناتوانین هاشا له‌وه‌بكه‌ین كه‌ ئه‌مه‌ په‌یوه‌ندییه‌كى خۆشه‌ویستى نه‌بووه‌. له‌یلاَ و مه‌جنون ناگه‌نه‌ یه‌كتر، له‌ساتێكدا ئێمه‌ ناتوانین حاشا له‌وه‌بكه‌ین كه‌ ئه‌مانه‌ یه‌كتریان خۆشنه‌ویشتووه‌، شیرین و فه‌رهاد ناگه‌نه‌ یه‌كتر، خه‌ج و سیامه‌ند هه‌ر به‌هه‌مان شێوه‌. كاتێك ده‌ڵێم مه‌رج نییه‌ بگاته‌ زه‌واج مه‌به‌ستم له‌وه‌ نییه‌ خۆشه‌ویستى نابێت بگاته‌ زه‌واج، به‌ڵكو من ده‌ڵێم مه‌رج نییه‌ بگاته‌ زه‌واج، یان به‌دیوێكى تردا زه‌واج تاكه‌ شتێك نییه‌ میسداقیه‌تى خۆشه‌ویستى بسه‌لمێنێت.
له‌وه‌ختێكدا ده‌بینین ئه‌و پاڵه‌وانه‌ ئه‌فسانه‌ییانه‌ گه‌وره‌ترین عاشق و مه‌عشوق و سیمبۆڵى خۆشه‌ویستین له‌لاَى ئێمه‌، به‌لاَم وه‌ك چیرۆكه‌كه‌ بۆمانده‌گێڕێته‌وه‌ نه‌گه‌یشتوونه‌ته‌ ئه‌و خاڵه‌ى پێى ده‌وترىَ زه‌واج به‌ڵكو چاره‌نووسیان دابڕانێكى جه‌رگبڕو تراژیدیى بووه‌. ئه‌و گرته‌یه‌ى له‌فیلمى تایتانیكدا بینوومانه‌ خۆشه‌ویسته‌كان ناگه‌نه‌ یه‌ك، به‌لاَم هه‌ر خۆشه‌ویستییه‌ و بگره‌ سیمبۆلێكه‌ بۆ عه‌شق، جگه‌ له‌وه‌ش سه‌رنجت بۆئه‌وه‌ راده‌كێشم پێش ئه‌وه‌ى له‌مێژوودا زه‌واج ده‌ربكه‌وێت خۆشه‌ویستى هه‌ر هه‌بووه‌، عه‌شق زۆر له‌وه‌ گه‌وره‌تره‌ له‌چوارچێوه‌یه‌كى وردیله‌ى وه‌ك زه‌واجدا بچووك بكرێته‌وه‌.
ئه‌وین: ئه‌گه‌ر سه‌یرى تایتانیك بكه‌ین ته‌نیا مه‌رگ رێگره‌ له‌عه‌شق، به‌لاَم لێره‌ كوڕ شێوازى جل له‌به‌ركردن و شتى له‌و جۆره‌ ده‌كاته‌ به‌هانه‌ بۆ جیابوونه‌وه‌، ئه‌ى ئه‌مه‌یان چى؟.
ستیڤان شه‌مزینانى: من پێموایه‌ ئه‌گه‌ر یه‌كێك چ كوڕ بێت یان كچ به‌رامبه‌ره‌كه‌ى خۆشبووێت، ئه‌و كه‌سه‌ى به‌هه‌موو تایبه‌تمه‌ندیى و خوونه‌ریته‌كانییه‌وه‌ ده‌وێت، كه‌سێك تۆى خۆشبووێت تۆ سنووردار ناكات له‌سه‌ر ره‌فتاریك، ئه‌وه‌ بریتییه‌ له‌ داگیركردن، كاتێك كوڕێك یان كچێك تۆ ناچار ده‌كات و ده‌ڵێت فلاَنه‌ جل له‌به‌ربكه‌، ئاوها خۆت بگۆڕه‌، به‌فلاَن شێوازه‌ مامه‌ڵه‌ بكه‌، به‌فلاَنه‌ ئیقاع قسه‌بكه‌، ئه‌مه‌ به‌هیچ جۆرێك عه‌شق نییه‌ و داگیركردنه‌، حه‌زێكى تایبه‌تى رووتى شه‌هوانییه‌ نه‌ك خۆشه‌ویستى.
كاتێك ده‌ڵێى خۆشه‌ویستى، من به‌هه‌موو كه‌موكوڕییه‌كانه‌وه‌، به‌هه‌موو جوانى و ناشیرینییه‌كانه‌وه‌ تۆم قبوڵه‌ هه‌روه‌ها به‌پێچه‌وانه‌وه‌. خۆشه‌ویستى بریتییه‌ له‌یه‌كتر قبوڵكردن و یه‌كتر ویستن، كاتێكیش پله‌ى خۆشه‌ویستى كامڵ ده‌بێت و ده‌گاته‌ دواپله‌، عاشق و مه‌عشوق له‌ناویه‌كدا توابنه‌وه‌، وه‌ك حه‌لاَج ده‌ڵێت: ئێمه‌ ده‌بێت ببین به‌یه‌ك دانه‌، ساتێك من ده‌بینیت ئه‌وت بینیوه‌، كه‌ ئه‌ویشت بینى منت بینیوه‌. بۆیه‌ له‌ عه‌شقدا دوو كه‌س نامێنێت به‌ڵكو هه‌ریه‌ك كه‌س هه‌یه‌.
ئه‌وین: تۆ خۆت وه‌ك كه‌سێكى به‌ئه‌زموون چۆن له‌خۆشه‌ویستى تێگه‌یشتوویت و پێناسه‌ى ده‌كه‌یت؟
ستیڤان شه‌مزینانى: پێناسه‌كردنى خۆشه‌ویستى یاخود هه‌ر چه‌مكێكى تر له‌قاڵبدانى ئه‌و چه‌مكه‌یه‌ له‌ چوارچێوه‌ى یه‌ك تاكه‌ پێناسه‌ و یه‌ك جۆره‌ بیركردنه‌وه‌ و روانیندا. ده‌كرێت روانگه‌ و بیركردنه‌وه‌كان له‌مه‌ڕ خۆشه‌ویستى جیاوازبن، ره‌نگه‌ له‌لاَى كه‌سێك كه‌ له‌خۆشه‌ویستییه‌كه‌یدا گه‌شبین و سه‌ركه‌وتووه‌، خۆشه‌ویستى بریتى بێت له‌لوتكه‌ و چڵه‌ پۆپه‌ى هه‌موو له‌ززه‌ت و خۆشییه‌كانى دنیا. ره‌نگه‌ له‌لاَى كه‌سێكى تر كه‌ ئاكامى عه‌شقه‌كه‌ى بریتى بووه‌ له‌ حوزنێكى تاڵ و بىَ كۆتایى و قه‌ده‌رێكى ره‌ش و تاریك، عه‌شق ناهه‌موار و سه‌ختترین پرۆسه‌ بێت.
به‌لاَم من وه‌ك خۆم پێموایه‌ عه‌شق وه‌ك (به‌ختیار عه‌لى) شاعیر ده‌ڵێت: سه‌ختتره‌ له‌جه‌نگه‌كان. له‌لاَى من عه‌شق پرۆسه‌یه‌كى قورسه‌، پرۆسه‌یه‌كه‌ هێنده‌ كاریگه‌ره‌ له‌سه‌ر مرۆڤه‌كان تێكیانده‌قوپێنێت و تێكیانده‌شكێنێت، عه‌شق له‌لاَى من سوپایه‌كه‌ به‌شێوه‌یه‌ك هێرشت بۆ ده‌هێنێت هه‌میشه‌ ساته‌ به‌ختیاره‌كانت لىَ تاڵ ده‌كات.
پێموایه‌ ته‌نانه‌ت چێژو خۆشییه‌كانى ناو عه‌شق، شتێكن له‌ئه‌نجامى ئه‌و ناڕه‌حه‌تى و ئه‌و حوزنه‌ تاڵ و چاره‌نووسه‌ نادیاره‌ى ناوییه‌وه‌ هه‌ڵقولاَون، كه‌واته‌ وه‌ك چۆن ده‌ڵێن ده‌شىَ له‌ناو قوڵپى گریاندا زه‌رده‌خه‌نه‌یه‌ك له‌دایك بێت، له‌ناو هه‌موو هاوارو گریانه‌كانى عه‌شقدا زه‌رده‌خه‌نه‌یه‌كى شه‌رمنانه‌ هه‌یه‌.
به‌لاَى منه‌وه‌ عه‌شق گریانێكى قووڵه‌، خۆشه‌ویستى باخچه‌یه‌كى رازاوه‌یه‌، هه‌ر چوار ده‌ورى به‌دڕك و داڵ ته‌نراوه‌، ئاسان نییه‌ هه‌موو كه‌سێك بچێته‌ ناو ئه‌و باخچه‌یه‌وه‌ و بتوانێت له‌تامى ئه‌و میوه‌ خۆشه‌ بكات كه‌ ناوى عه‌شقه‌، مه‌گه‌ر ته‌نیا یه‌كێك نه‌بێت به‌یداخى سه‌رچڵى هه‌ڵكردبێت و حیسابى بۆ ئازارى دڕك و دڵسووتان و ژانى رۆح نه‌كردبێت.
ئه‌وین:خۆشه‌ویستییه‌كانى ئێره‌ جۆرێكن له‌خه‌ڵه‌تاندن، كوڕى وا هه‌یه‌ له‌گه‌ڵ چوار كچدایه‌ یان كچى واهه‌یه‌ له‌گه‌ڵ شه‌ش كوڕدایه‌، تۆ له‌سه‌ر ئه‌مه‌ چ قسه‌یه‌كت هه‌یه‌؟.
ستیڤان شه‌مزینانى: ئه‌وانه‌ به‌خۆشه‌ویستى به‌حیساب ناهێنرێن، چونكه‌ له‌راستیدا خۆشه‌ویستى بوویه‌كى جیایه‌ له‌وه‌ى باستان كرد (ئه‌وه‌ى یه‌كێك له‌یه‌ك كاتدا له‌گه‌ڵ چه‌ند كه‌سێكى جیاوازدا په‌یوه‌ندیی سۆزداریى هه‌بێت).
به‌لاَم ئه‌م په‌یوه‌ندییه‌ شێوێنراوه‌ له‌سه‌ر مه‌ریخ نییه‌، په‌یوه‌ندییه‌كه‌ كۆمه‌ڵگه‌ى ئێمه‌ دروستى كردووه‌. بۆ وێنه‌ كاتێك گه‌نجێك ده‌بینیت هیچ ده‌روازه‌یه‌كى نییه‌ لێیه‌وه‌ له‌گه‌ڵ ئافره‌تدا مامه‌ڵه‌ بكات ئیلاَ ده‌بێت به‌درۆى خۆشه‌ویستى بچێته‌ به‌رده‌مى و له‌گه‌ڵى په‌یوه‌ندیى ببه‌ستێت.
له‌ژیانى خۆمدا زۆرجار ئه‌وه‌م بینیوه‌، گه‌نجێك بۆئه‌وه‌ى بۆشاییه‌ عاتیفییه‌كه‌ى خۆى پڕبكاته‌وه‌، یان بۆئه‌وه‌ی پێویستى خۆی له‌ره‌گه‌زى به‌رامبه‌ر به‌ده‌ست بهێنێت، ناچار بووه‌ به‌به‌هانه‌ى خۆشه‌ویستى و له‌ژێر ئه‌و ناوه‌وه‌ بچێته‌ پێشه‌وه‌ و لێى نزیك بێته‌وه‌. ئه‌گینا هه‌ر له‌بنه‌ڕه‌ته‌وه‌ ئه‌و په‌یوه‌ندییه‌ خۆشه‌ویستى نه‌بووه‌ تا له‌كۆتایدا بڵێین ئه‌مه‌ به‌خیانه‌ت كۆتایى پێهاتووه‌.
ئه‌وین:كه‌واته‌ زۆربه‌ى ئه‌و په‌یوه‌ندییانه‌ بۆ تێركردنى غه‌ریزه‌كانى خۆیانه‌؟.
ستیڤان شه‌مزینانى: به‌ڵىَ بۆ تێركردنى غه‌ریزییه‌ (هه‌رچه‌ند تێركردنى غه‌ریزیى عه‌یب نییه‌). ئه‌گه‌ر بگه‌ڕێمه‌وه‌ بۆسه‌ر نموونه‌ هیتله‌ر حه‌زێكى بێسنوورى بۆ ده‌سه‌لاَتى سیاسى هه‌بوو و كورسییه‌كه‌ى خۆى خۆشویستووه‌ به‌لاَم ئه‌م حه‌زه‌ خۆشه‌ویستییه‌كى مه‌شروع نه‌بووه‌، بریتى بووه‌ له‌چێژ وه‌رگرتن له‌كورسى ده‌سه‌لاَت. دیكتاتۆره‌كان له‌مێژوودا و دیكتاتۆر سه‌دام حسێن وه‌ك نموونه‌ چێژیان وه‌رگرتووه‌ له‌ كورسى و ده‌سه‌لاَته‌كانیان خۆشویستووه‌ له‌كاتێكدا ده‌زانین ئه‌مه‌ بریتى نییه‌ له‌خۆشه‌ویستییه‌كى رۆمانسى و بێگه‌رد، مه‌به‌ستم ئه‌وه‌یه‌ خۆشه‌ویستى و حه‌ز، عه‌شق و داگیركردن لێكجودان، له‌به‌رئه‌وه‌ هه‌موو ئه‌و په‌یوه‌ندییانه‌ى ئاماژه‌ت بۆ كردن جۆرێكن له‌ داگیركردن، وه‌ك وتم حه‌زێكى كاتین، هه‌روه‌ك چۆن له‌ ئێراندا هاوسه‌رگیریى چێژ (سیغه‌) هه‌یه‌ بۆ ماوه‌یه‌كى دیاریكراو.
ئه‌وین:زۆربه‌ى گه‌نجه‌كان پێیانوایه‌ خۆشه‌ویستى بووه‌ به‌گاڵته‌جاڕیى و ده‌ستبڕین و به‌رده‌وام ئه‌م حاڵه‌تانه‌ ڕووده‌ده‌ن، تۆ چى ده‌ڵێى؟
ستیڤان شه‌مزینانى: خۆشه‌ویستى تاكه‌ شته‌ زۆرترین درۆى له‌په‌ناوه‌ كراوه‌، ئه‌گه‌رنا ئه‌و په‌یوه‌ندییانه‌ى ئه‌مڕۆ به‌شێوه‌یه‌كى گشتى له‌نێوان دوو ره‌گه‌زه‌كه‌دا هه‌یه‌ و ناوى لێنراوه‌ خۆشه‌ویستى, له‌جه‌وهه‌ردا خۆشه‌ویستى نییه‌ و فڕى به‌عه‌شقه‌وه‌ نییه‌، په‌یوه‌ندییه‌ك نییه‌ گه‌یشتبێته‌ قۆناغى خۆشه‌ویستى كامڵ، كه‌ ئه‌م دوو كه‌سه‌ له‌سه‌ر بنه‌مایه‌كى سۆزداریى رووت پێكه‌وه‌ گرێدرابن، به‌ڵكو بۆ پڕكردنه‌وه‌ى كۆمه‌ڵێك بۆشایى عاتیفى و ده‌روونى خۆیانه‌ به‌ رێگه‌یه‌كى ناگونجاو. ئه‌گه‌ر بگاته‌ سه‌ر ئه‌وه‌ى پێى ده‌وترێت خۆشه‌ویستى بالاَ هیچ كاتێك سه‌ره‌نجامه‌كه‌ى نابێته‌ گاڵته‌جاڕیى و خیانه‌ت، یان ئه‌وه‌ى پێى ده‌ڵێن رابواردن و ده‌ستبڕین و ده‌ست گه‌رمكردنه‌وه‌.
ئه‌وین: تۆ له‌باره‌ى ئه‌وه‌ى هۆكارى ماددیى رێگره‌ له‌ به‌یه‌كگه‌یشتنى خۆشه‌ویسته‌كان چى ده‌ڵێیت؟ ئایا ئه‌مه‌ به‌ڕاست ده‌زانیت؟ بۆ نموونه‌ هه‌ندێجار باسى كێشه‌ى سه‌كه‌ن ده‌كرێت؟
ستیڤان شه‌مزینانى: له‌خۆشه‌ویستیدا هه‌موو ئه‌و رێگرییانه‌ بىَ مانان وچه‌ند گه‌وره‌بن بچووك ده‌بنه‌وه‌، هیچ كاتێك عاشق و مه‌عشوق بیریان له‌وه‌ نییه‌ له‌كام ڤێلاَ و كۆشك و قه‌سردا ده‌ژین، بیریان له‌وه‌نییه‌ چه‌ند كیلۆ ئاڵتون بكه‌ن به‌خۆیاندا، یان به‌ چ شێوه‌یه‌ك ئاهه‌نگ ده‌گێڕن، ئه‌وان ده‌یانه‌وىَ بۆیه‌كتر بژین و له‌بۆته‌ى یه‌كتریدا بتوێنه‌وه‌ و بۆ هه‌میشه‌ ئاوێزانى یه‌كدى بن.
به‌لاَم به‌دیوه‌كه‌ى تریشدا ئه‌وه‌ راسته‌ له‌كۆمه‌ڵگه‌ى ئێمه‌ و له‌هه‌موو دنیادا مرۆڤ ناتوانێت له‌سه‌ر شه‌قام و په‌ناو پاساردا بژى، باشه‌ ئه‌گه‌ر عاشق و مه‌عشوق بڕیاریاندا ژیانى هاوبه‌ش دروست بكه‌ن و په‌یوه‌ندییه‌كیان گه‌یشته‌ زه‌واج ئه‌ى له‌ كوىَ به‌به‌خته‌وه‌ریى بژین؟ من حكوومه‌ت به‌ به‌رپرسیار ده‌زانم له‌ كێشه‌كانى گه‌نجان و قه‌یرانى نیشته‌جێبوون.
پرسیاره‌كه‌ت دوولاَیه‌نى هه‌یه‌، لاَیه‌نێكى له‌عه‌شقدا ئه‌و شته‌ لاَوه‌كى و رێگرییه‌ بچووكانه‌ كاریگه‌ر نین، لاَیه‌نى دووه‌میش ئه‌وه‌یه‌ ئینسان بۆ به‌رده‌وامیدان به‌ژیانى ده‌بێت له‌جێگه‌یه‌كدا بسره‌وێت و ژیان بباته‌سه‌ر جا عاشق بێت یان نا. لاَموایه‌ به‌ڵىَ ئه‌و مه‌سه‌لاَنه‌ رێگریى دروست ده‌كه‌ن له‌به‌رده‌م پرۆسه‌ى هاوسه‌رگیریى گه‌نجان.
ئه‌وین: تۆ چى ده‌ڵێى له‌سه‌ر ئه‌و خۆشه‌ویستییه‌ى له‌به‌ر ئه‌وه‌ى باوكى كوڕێك به‌ كوڕه‌كه‌ى ده‌ڵێت ده‌زگیرانه‌كه‌ت بالاَى كورته‌ و به‌دڵم نییه‌، ئیتر كۆتایى پێدێت؟.
ستیڤان شه‌مزینانى: له‌ راستیدا خۆشه‌ویستى پله‌یه‌كى ئه‌وه‌نده‌ بالاَتره‌, تان ه‌و ته‌شه‌رو توانجى خه‌ڵك ناتوانێت بگاته‌ دامێنى، بالاَ و گه‌ردنى عه‌شق هێنده‌ بڵنده‌ هیچ كاریگه‌رییه‌كى ده‌ره‌كى ناتوانێ بگاته‌ قوله‌پێى جا نه‌خاسمه‌ ئه‌وه‌ى بتوانێت رۆڵى هه‌بێت له‌خاوكردنه‌وه‌و كۆتایى پێهێنانى.
به‌شه‌كه‌ى ترى قسه‌كانم هه‌ڵده‌گرم بۆ ئه‌وه‌ى هێمابكه‌م به‌وه‌ش كه‌ په‌یوه‌ندییه‌ كۆمه‌لاَیه‌تییه‌كانى ئێمه‌ رێگرن له‌به‌رده‌م عه‌شقدا و میكانیزمێكن بۆ ساردكردنه‌وه‌ى گه‌نجان له‌و رووه‌وه‌، ته‌نانه‌ت زۆر باوك هه‌ن ده‌ڵێن مادام كچه‌كه‌م ده‌یه‌وێت به‌خۆشه‌ویستى شووبكات، من نایه‌ڵم ئه‌و زه‌واجه‌ دروست بێت.
دیاره‌ هه‌موو مرۆڤه‌كانیش وه‌ك یه‌ك نین، كه‌سانێكى زۆر هه‌ن لاوازن و نه‌گه‌یشتوونه‌ته‌ ئه‌و پله‌یه‌ى قسه‌و قسه‌ڵۆك كاریگه‌رییان تێنه‌كات، ناچار ته‌سلیم به‌واقیع ده‌بن هه‌رچه‌نده‌ ئه‌و واقیعه‌ تاڵیش بێت.
ئه‌وین: خۆشه‌ویستییه‌كانى ئێره‌ زیاتر له‌سه‌ر بنه‌ماى حه‌زن نه‌ك له‌سه‌ر بنه‌ماى عه‌قڵو ژیریى؟
ستیڤان شه‌مزینانى: حه‌زده‌كه‌م له‌وه‌وه‌ ده‌ست پێبكه‌م كه‌ ده‌ڵێى پێویسته‌ خۆشه‌ویستى له‌سه‌ر بنه‌ماى عه‌قڵ بونیاد بنرێت، به‌لاَم به‌ بۆچوونى من له‌خۆشه‌ویستیدا عه‌قڵ رۆڵ نابینێت، به‌ڵكو به‌ پێچه‌وانه‌وه‌ عه‌شق به‌هه‌موو جۆرێك دژى عه‌قڵه‌، چون عه‌قڵ لاَیه‌نه‌ لۆژیكییه‌كانى هه‌ر شتێك لێكده‌داته‌وه‌، عه‌شقیش دژى لۆژیكه‌، لۆژیك رێگره‌ له‌ به‌رده‌م سه‌رچڵییه‌كانى عه‌شق.
به‌لاَم سۆز وه‌ك قوبتانێكى توڕه‌ وایه‌ به‌ره‌و رووى شه‌پۆله‌ هه‌ڵچووه‌كانى ئۆقیانووس ده‌بێته‌وه‌، عه‌شق وه‌ك كرده‌ى فڕینه‌, به‌لاَم عه‌قڵ باوه‌ڕ به‌فڕینى دیدالیۆسیانه‌ى مرۆڤ ناكات. كاتێك كه‌سێك ده‌توانێت عاشق بێت كه‌ جڵه‌وى خۆىو كاروكرده‌وه‌كانى بداته‌ ده‌ستى سۆزێكى قووڵ، بیداته‌ ده‌ست دڵى، به‌لاَم كاتێك عه‌قڵ به‌شداریى كرد عه‌شق وه‌ك مه‌لێك ده‌فڕێت.
خولاَسه‌ عه‌شق له‌سه‌ر بنه‌ماى سۆزدارییه‌كى رووت بونیاد ده‌نرێت نه‌ك له‌سه‌ر سترۆكتۆرى عه‌قڵ. من ویستم ئه‌م روانگه‌یه‌ لاى گه‌نجه‌كان روونو ئاشكرا بێت، له‌ هه‌مان كاتدا بۆیان راست بكه‌مه‌وه‌ كه‌ عه‌شق زۆرانبازییه‌كى ترسناكه‌و پرۆسه‌یه‌كى ناعه‌قلاَنى له‌سه‌داسه‌ده‌.
ئه‌وین: ئه‌گه‌ر عه‌قڵ نه‌بێت كه‌واته‌ تۆ له‌سه‌ر چ بناغه‌یه‌ك خۆشه‌ویستى بونیاد ده‌نێیت؟
ستیڤان شه‌مزینانى: له‌سه‌ر بناغه‌ى سۆز، له‌وانه‌یه‌ ژیرییم فه‌رمانم پێبكات ئه‌و كه‌سه‌ى هه‌ڵمبژاردووه‌ كه‌سێكى گونجاو و هاوشان نه‌بێت له‌گه‌ڵ من به‌بیانووى جیاوازیى چینایه‌تى یان هه‌ر جیاوازییه‌كى تر، به‌لاَم سۆزى من هه‌میشه‌ وه‌ك پاڵنه‌رێك، وه‌ك ره‌شه‌بایه‌ك ده‌مبات بۆ لاى. حه‌زم له‌وه‌ نییه‌ به‌زمانى مه‌جازو شیعریى قسه‌ بكه‌م، به‌لاَم ئه‌وه‌ عه‌قڵه‌ ده‌ڵێت فلاَن كورته‌ بالاَیه‌، له‌چینى خواره‌وه‌یه‌، له‌به‌رامبه‌ریشدا ئه‌مه‌ سۆزه‌ ئه‌و شتانه‌ له‌بیرده‌باته‌وه‌.
ئه‌وین: تۆ ده‌ڵێى عه‌شق به‌عه‌قڵ ناكرێت به‌ڵكو به‌سۆز ، به‌لاَم تا چه‌ند بڕوات به‌ سۆزى كوڕانى ئه‌م زه‌مانه‌ هه‌یه‌ كه‌ له‌ رۆژێكدا داواى په‌یوه‌ندیى له‌ده‌ كچ ده‌كه‌ن؟
ستیڤان شه‌مزینانى: منیش ده‌ڵێم تۆ ناتوانیت یه‌ك دانه‌ سۆز دابه‌ش بكه‌یت به‌سه‌ر ده‌ كه‌سدا، بۆیه‌ به‌بڕواى من ئه‌و په‌یوه‌ندییانه‌ نابنه‌ عه‌شق، هه‌ركاتێك بوونه‌ عه‌شق به‌و شێوه‌یه‌و له‌وقاڵبه‌دا نامێننه‌وه‌. وه‌ك له‌سه‌ره‌تاشه‌وه‌ وتم ئه‌مانه‌ له‌بنچینه‌وه‌ خۆیان عه‌شق نین، به‌شێوه‌یه‌ك له‌شێوه‌كان كات به‌ڕێكردنن و ئومێَدى ئه‌وه‌یان لێناكرێ رۆژێك بێته‌ پێشه‌وه‌ بچنه‌ بازنه‌ى عه‌شقه‌وه‌. ئه‌وه‌ ره‌وشتى ده‌ستبازیىو ده‌رئه‌نجامێكى زۆر خراپى تێگه‌یشتنمانه‌ له‌په‌یوه‌ندیى سروشتى نێوان هه‌ردوو ره‌گه‌ز.
ئه‌وین: جۆرێكى تر له‌خۆشه‌ویستى سه‌ریهه‌ڵداوه‌ له‌ڕێگه‌ى مۆبایله‌وه‌ بێ ئه‌وه‌ى ئه‌و دووكه‌سه‌ یه‌كتریان بینیبێت خۆشه‌ویستى ده‌كه‌ن، تۆ چۆن له‌مه‌ ده‌ڕوانیت كه‌ ته‌نانه‌ت نایانه‌وێت خۆیان نیشانى یه‌كتر بده‌ن؟
ستیڤان شه‌مزینانى: ئه‌و فۆرمه‌ هه‌رناوێكى هه‌بێت ناوى خۆشه‌ویستى نییه‌، وه‌ك وتم به‌تاڵكردنه‌وه‌ى ئه‌و سایكۆلۆژییه‌ته‌ هه‌ڵچووه‌یه‌ كه‌ هه‌میشه‌ شه‌رمنو ترسنۆك بووه‌ له‌وه‌ى راسته‌وخۆو بێ سڵه‌مینه‌وه‌ به‌ره‌و رووى ره‌گه‌زى به‌رامبه‌ر بێته‌وه‌، ئه‌وه‌ به‌ربه‌ستو له‌مپه‌ره‌ كۆمه‌لاَیه‌تییه‌كانى كۆمه‌ڵگه‌ى ئێمه‌ن ناهێڵێت ئه‌و دوو مرۆڤه‌ به‌شێوه‌یه‌كى ئازادانه‌ له‌گه‌ڵ یه‌كتر مامه‌ڵه‌ بكه‌نو یه‌كتر بخوێننه‌وه‌.
گه‌نجى چه‌پێنراوى كورد ناچاره‌ بۆ ئه‌وه‌ى گوێى له‌ ده‌نگى كچێك بێت یان به‌ پێچه‌وانه‌وه‌، له‌و ڕێگه‌یه‌وه‌ ئه‌و بۆشایه‌ عاتیفییه‌ى هه‌یه‌تى پڕى بكاته‌وه‌، به‌لاَم واقیعه‌ن ئه‌م گه‌نجانه‌ گوناهن چونكه‌ وا ده‌زانن عه‌شق ده‌كه‌ن، چون ئه‌و كرده‌یه‌ سه‌دو هه‌شتا پله‌ به‌ پێچه‌وانه‌ى عه‌شقه‌وه‌یه‌.
به‌كورتى ئه‌و رێگه‌یه‌ رێگه‌ى عه‌شق نییه‌، دۆزینه‌وه‌ى درزێكه‌ له‌و دیواره‌ ئه‌ستوور و پۆلاَینه‌ى كه‌ كولتوورى كورده‌واریى له‌نێوان دووره‌گه‌زه‌كه‌دا دروستیكردووه‌و رۆژانه‌ چیمه‌نتۆى زیاترى تێده‌كات.
ئه‌وین: زۆربه‌ى كوڕان به‌بیانووى سه‌یرو سه‌مه‌ره‌وه‌ نایانه‌وێ كچان ببیننو ته‌نیا به‌ مۆبایل عه‌شق ده‌كه‌ن تۆ چۆن سه‌یرى ئه‌مه‌ ده‌كه‌یت؟
ستیڤان شه‌مزینانى: ئه‌و گه‌نجانه‌ى باسیان ده‌كه‌یت ژماره‌یه‌كى زۆر كه‌من له‌چاو ئه‌و لێشاوه‌ بێشووماره‌ى گه‌نجه‌ به‌دبه‌خته‌كان، به‌پێچه‌وانه‌وه‌ به‌شى زۆرى كوڕان تامه‌زرۆن كچێك ببینن، پێموانییه‌ ئه‌وه‌ى تۆ باستكرد وابێت، ئه‌گه‌ریش وابوو وێنه‌ى كۆمه‌ڵگه‌كه‌مان پیشان ده‌دات چه‌نده‌ ترسى دروست كردووه‌ له‌سه‌ر رۆحى عاشقه‌كانو چه‌ند توڕه‌و دڵڕه‌قه‌ به‌رامبه‌ر به‌خۆشه‌ویسته‌ نازداره‌كان.
لاَموانییه‌ كوڕێك هه‌بێت حه‌ز بكات كچێك كه‌ پێشتر گوێى له‌ده‌نگى بووه‌ نه‌بینێ، به‌پێچه‌وانه‌شه‌وه‌ هه‌ر راسته‌، به‌قه‌ناعه‌تى خۆم ئه‌گه‌ر هه‌ردوولاَ بزانن فورسه‌تێكى له‌بارو بىَ ترس هه‌یه‌ بێگومان ده‌یانه‌وێ یه‌كتر ببینن.
ئه‌وین: ئه‌ى ئه‌گه‌ر ئه‌و فورسه‌ته‌شى هه‌بوو به‌لاَم هه‌ر نه‌یانویست یه‌كترى ببینن؟
ستیڤان شه‌مزینانى: دیاره‌ ده‌بێت له‌ڕووى ده‌روونییه‌وه‌ شیكاریى بۆ كه‌سێتى ئه‌و مرۆڤه‌ بكرێت، له‌وانه‌یه‌ ئه‌و كه‌سه‌ له‌ڕووى سایكۆلۆژییه‌وه‌ گرێو گۆڵى هه‌بێت، یان كه‌سێتییه‌كى ناكۆمه‌لاَیه‌تى بێتو هه‌ستى خۆ به‌كه‌مزانین تیایدا دروست بووبێت.
به‌لاَم دیسان پێموایه‌ ژماره‌ى ئه‌و كه‌سانه‌ زۆر زۆر كه‌مه‌، بۆناسینه‌وه‌ى نه‌خۆشییه‌كانى ئه‌م كه‌سانه‌ش ده‌بێت له‌ڕووى ده‌روونییه‌وه‌ بیانخوێنینه‌وه‌، ئه‌میش ئیشى پسپۆڕانى بوارى ده‌رووننشیكارییه‌ به‌م كاره‌ هه‌ڵستن.
ئه‌وین: به‌لاَم تۆ پێتوانییه‌ خۆشه‌ویستى ئێستا هه‌مووى بووه‌ به‌ڕابواردنو خیانه‌تو ده‌ست گه‌رمكردنه‌وه‌؟
ستیڤان شه‌مزینانى: با ئێمه‌ چه‌مكه‌كان جیابكه‌ینه‌وه‌، قۆڵبڕین قۆڵبڕینه‌، ده‌ست گه‌رمكردنه‌وه‌ ده‌ست گه‌رمكردنه‌وه‌یه‌، رابواردن ناوى خۆى به‌خۆیه‌وه‌یه‌تى، خیانه‌ت هه‌ر خیانه‌ته‌، خۆشه‌ویستیش هه‌ر خۆشه‌ویستییه‌و تا قیامه‌ت وه‌ك خۆى ده‌مێنێته‌وه‌.
ئه‌وین: تۆ وتت ئه‌و په‌یوه‌ندییه‌ى له‌ڕێى مۆبایله‌وه‌ دروست ده‌بێت به‌خۆشه‌ویستى نازانم به‌لاَم ئه‌م حاڵه‌ بووه‌ به‌ خۆشه‌ویستىو زه‌واجیشى لێكه‌وتۆته‌وه‌ ئه‌ى ئه‌مه‌یان چى؟
ستیڤان شه‌مزینانى: مه‌رج نییه‌ ئه‌و په‌یوه‌ندییه‌ى زه‌واج دروست ده‌كات خۆشه‌ویستى بێت، ته‌نانه‌ت زۆربه‌ى هاوسه‌رگیرییه‌كانى كۆمه‌ڵگه‌ى منو تۆ هیچ كێماسییه‌كیان نییه‌ جگه‌ له‌خۆشه‌ویستى، له‌لاَیه‌كى تره‌وه‌ له‌وانه‌یه‌ له‌زۆر حاڵه‌تدا ئه‌و په‌یوه‌ندیى گرتنه‌ بووبێته‌ هۆى دروستبوونى خۆشه‌ویستى به‌مانا كوردییه‌كه‌ى، بۆیه‌ ده‌ڵێم به‌مانا كوردییه‌كه‌ى، چونكه‌ ته‌نیا له‌كوردستاندا ئه‌و جۆره‌ خۆشه‌ویستییه‌م بینیوه‌، ئه‌وجا پێشان ده‌مانووت عه‌شق له‌نیگایه‌كه‌وه‌ ده‌ست پێده‌كات تا ئه‌وه‌ى مرۆڤ وێران ده‌كات، ره‌نگه‌ له‌مه‌ودوا واپێویست بكات بڵێین عه‌شق له‌زه‌نگى ته‌له‌فۆنێكه‌وه‌ ده‌ست پێده‌كات.
به‌ڕێزم شێوازه‌كانى رۆیشتن بۆ عه‌شق ئه‌م شێوازه‌ نییه‌ (واته‌ له‌ڕێى مۆبایله‌وه‌)، ئاخر كاتێك عه‌شق دێته‌ ناوناخته‌وه‌ له‌ڕێى مۆبایله‌وه‌ نایه‌ت، مۆبایل ئامێرێكى بێگیانو مردووه‌و ناتوانێ ئه‌و كاره‌ راپه‌ڕینێت.
تۆ مرۆڤێك نه‌بینیت ناتوانى هیچ بڕیارێكى له‌سه‌ر بده‌یت، له‌باشترین حاڵه‌تدا تۆ وه‌ك ئه‌و كوێره‌ واده‌بیت كه‌ له‌ژیانیدا فیلى نه‌بینیوه‌و ده‌ست ده‌دات له‌شفره‌كه‌ىو ده‌ڵىَ فیل شفره‌یه‌كى ره‌قه‌، با كه‌مێك بێ په‌رده‌و پێچو په‌نا قسه‌بكه‌ین، ئه‌و جۆره‌ ته‌نیاو ته‌نیا پاڵنه‌ره‌ سێكسییه‌كان له‌ پشتییه‌وه‌ن، گه‌نجى ولاَته‌كه‌ى منو تۆ هیچ رێگه‌یه‌كى نییه‌ بۆ ئه‌وه‌ى بتوانێت موماره‌سه‌ى سێكس ئه‌نجامبدات له‌ڕێى زه‌واجه‌وه‌ نه‌بێت، ده‌بێت پێش ئه‌وه‌ى فیلمى بسووتێت ژیانى هاوسه‌ریى پێكبێنێت.
من ئه‌وه‌ ناو ده‌نێَم په‌یوه‌ندیى مۆبایل، ناویده‌نێم زه‌واجه‌ مۆبایل، یان خۆشه‌وستى مۆبایل كه‌خۆشه‌ویستییه‌كى عه‌نتیكه‌و تایبه‌تى كوردییه‌و عه‌شق نییه‌.
ئه‌وین: به‌لاَم زۆرجار هه‌بووه‌ كه‌سێك له‌ڕێى مۆبایله‌وه‌ خۆشه‌ویستى كردووه‌، به‌لاَم بێ ئه‌وه‌ى بیبینێَت زۆریشى خۆشویستووه‌، ئه‌مه‌ چۆن لێكده‌ده‌یته‌وه‌؟
ستیڤان شه‌مزینانى: ئه‌وه‌ى تۆ ده‌یڵێیت سیحره‌، سه‌رم له‌وه‌ ده‌رناچێت.
ئه‌وین: تۆ چۆن سه‌یرى ئه‌و په‌یوه‌ندییه‌ ده‌كه‌یت كچه‌كه‌ به‌كوڕه‌كه‌ ده‌ڵێت وه‌ك برام وایت یان كوڕه‌كه‌ به‌كچه‌كه‌ ده‌ڵێ وه‌ك خوشكم وایت هه‌موویشى سه‌ر زاره‌كییه‌؟
ستیڤان شه‌مزینانى: ئه‌وه‌ موجامه‌له‌یه‌كى زۆر سه‌یرى كۆمه‌ڵگه‌ى كوردییه‌، مرۆڤى ئێمه‌ بۆ ئه‌وه‌ى هه‌میشه‌ پاكێتى خۆى نیشان بدات، ناچاره‌ كۆمه‌ڵێك ته‌مسیل بكاتو كۆمه‌ڵێك درۆى شاخدار بهێنێته‌ پێشه‌وه‌، تا به‌ به‌رامبه‌ره‌كه‌ى بڵێت كچه‌كه‌ یان كوڕه‌كه‌، من هیچ مه‌رامێكى خراپو سێكسىو بێگانانه‌م به‌تۆ نییه‌، وه‌ك برا یان وه‌ك خوشك په‌یوه‌ندیى له‌گه‌ڵ تۆ ده‌گرم.
مرۆڤى ئێمه‌ ده‌یه‌وێ هه‌میشه‌ وێنه‌یه‌كى پاكى خۆى نیشان بداتو وه‌ها له‌به‌رامبه‌ره‌كه‌ى بگه‌یه‌نێت له‌ سێكسى (قێزه‌ون) به‌دووره‌، باشترین وێنه‌و چه‌تر خوشكو برایه‌تییه‌، چونكه‌ هه‌موو ده‌زانین له‌ ته‌واوى دونیادا هیچ خوشكو برایه‌ك موماره‌سه‌ى سێكس ناكه‌نو پاكترین په‌یوه‌ندییان به‌یه‌كه‌وه‌ هه‌یه‌، بۆیه‌ ئه‌و كه‌ به‌تۆ ده‌ڵىَ وه‌ك خوشكم وایتو یان به‌من ده‌ڵێت وه‌ك برام وه‌هایت، پاكانه‌یه‌كى پێشوه‌خته‌، ته‌نیاو ته‌نیا له‌پێناوى پێشكه‌شكردنى وێنه‌یه‌كى بێگه‌ردو نموونه‌یى خۆماندایه‌ هه‌ر له‌سه‌ره‌تاى ناسینه‌وه‌ یاخود به‌درێژایى ئه‌و په‌یوه‌ندییه‌ى كه‌ به‌یه‌كه‌وه‌ هه‌مانه‌.
ئه‌وین: دواجار ده‌مه‌وێـت بڵێم دوا په‌یامو دوا ئامۆژگاریت چییه‌ بۆ گه‌نجانى ولاَته‌كه‌مان كه‌ چۆن خۆشه‌ویستى بكه‌ن وبه‌ چ شێوه‌یه‌ك بیگه‌یه‌ننه‌ ئه‌نجام؟
ستیڤان شه‌مزینانى: له‌پێشدا ده‌مه‌وێت بڵێم زۆر قینم له‌وشه‌ى ئامۆژگارییه‌و دژى هه‌ر جۆره‌ ئامۆژگاریى كردنێكى خه‌ڵكم، ئاخر من خۆم چیم تا ئامۆژگاریى خه‌ڵك بكه‌م؟ به‌لاَم ئه‌گه‌ر وه‌ك بۆچوونو ئه‌زموونێكى تایبه‌تى بێت به‌ گه‌نجه‌كانى هاوته‌مه‌نى خۆمى بڵێم تا به‌ڕۆشنى كارێك ئه‌نجام بده‌ن ئه‌وه‌یان شتێكى تره‌و ره‌نگبێ یه‌ك دووقسه‌م هه‌بێت بۆ دركاندن.
من پێموایه‌ خۆشه‌ویستى پله‌یه‌كى زۆر بالاَو كاریگه‌ره‌، له‌بووندا هیچ وجودێكى تر نییه‌ وه‌ك ئه‌و بۆیه‌ ئه‌وانه‌ى به‌مۆبایل ئه‌نجام ده‌درێنو له‌سه‌ر گرده‌كانى قه‌راغ شار رووده‌ده‌ن یان له‌به‌رده‌م ده‌رگاكانى خوێندنگاكانى كچان ده‌یانبینین هیچیان ناتوانن ببنه‌ خۆشه‌ویستى، ئاخر هاوڕێى ئازیزم خۆشه‌ویستى بریتیه‌ له‌په‌یوه‌ندییه‌ رۆحییه‌ قووڵو بێگه‌رده‌كان.
داوا له‌گه‌نجانى ولاَته‌كه‌م ده‌كه‌م خۆیان په‌روه‌رده‌ بكه‌نو به‌فۆرمێكى راستو دروستو به‌رۆح ئاوێته‌ى خۆشه‌ویستى بنو په‌یمان له‌گه‌ڵ خۆشه‌ویستىو ئه‌وكه‌سانه‌ ببه‌ستن كه‌خۆیان ده‌یانه‌وێنو به‌كامى دڵ و به‌وپه‌ڕى متمانه‌وه‌و قه‌ناعه‌ته‌وه‌ ده‌یانه‌وێن بۆ هه‌میشه‌ بۆ یه‌كتربنو بۆ یه‌كتر بژین، وابزانن هه‌ر له‌بناغه‌وه‌ یه‌ك رۆحو جه‌سته‌ بوونو شمشێرى قه‌ده‌ر دووله‌تى كردوون.
وا له‌پرۆسه‌كه‌ بڕوانن به‌یه‌كگه‌یشتنیان واته‌ بوون به‌یه‌ك، هه‌رواش وه‌ك نیوه‌یه‌كى ناته‌واو خۆیان ببینن كه‌ له‌كاتى عه‌شقدا ده‌بنه‌وه‌ به‌ یه‌ك جه‌سته‌و رۆحێكی ته‌واوو كامڵ.
تێبینى:
1-ئه‌م هه‌ڤپه‌یڤینه‌ پوخته‌ى دیمانه‌یه‌كى دوو ئه‌ڵقه‌یى به‌رنامه‌ى (دیارده‌كانى كۆمه‌ڵ)ى رادیۆى هه‌رێمى كوردستان- سلێمانییه‌، كه‌ به‌رنامه‌كه‌ له‌لاَیه‌ن رۆژنامه‌نووس (ئه‌وین عه‌لاَئه‌دین)ه‌وه‌ ئاماده‌و پێشكه‌ش ده‌كرێت.
2-هه‌موو پرسیارو وه‌لاَمه‌كانى ئه‌م هه‌ڤپه‌یڤینه‌ بێ هیچ ده‌ستكارییه‌ك له‌به‌ر كاسێته‌كانى دیمانه‌كه‌ نووسراونه‌ته‌وه‌، ته‌نیا ئه‌گه‌ر وه‌لاَمو رسته‌یه‌ك دووباره‌ بووبێته‌وه‌ لێى لاَبراوه‌، جگه‌ له‌وه‌ش هه‌موو ئه‌و په‌یوه‌ندییه‌ ته‌له‌فۆنیانه‌ى بۆ به‌رنامه‌كه‌ هاتوون له‌گه‌ڵ وه‌لاَمه‌كانیاندا نه‌نووسراونه‌ته‌وه‌، چونكه‌ زۆرترینى ئه‌و په‌یوه‌ندییانه‌ یان هه‌مان ئه‌و پرسیارانه‌ بوون كه‌ ئاماده‌كارى به‌رنامه‌ پرسیبوونى یان په‌یوه‌ندییان به‌ حاڵه‌تى تاكه‌كه‌سییه‌وه‌ هه‌بووه‌، بۆیه‌ به‌پێویستمان نه‌زانى لێره‌دا هه‌بن

تێبینی: ئه‌م دیمانه‌ له‌لایه‌ن رۆژنامه‌نووس "ئه‌وین عه‌لادین"ه‌وه‌ بۆ رادیۆی "هه‌رێم" سازدراوه‌ له‌ هاوینی ساڵی 2006..

Share