Red Purple Black
Kurdistanigawre@gmail.com
ته‌ها سڵێمان، ئه‌ندامی كۆمیته‌ی ناوه‌ندیی حزبی شیوعی كوردستان:

 

tahaaaaaaaaته‌ها سڵێمان، ئه‌ندامی كۆمیته‌ی ناوه‌ندیی حزبی شیوعی كوردستان:

پرسه‌ نه‌ته‌وه‌ییه‌كان ئێمه‌ له‌گه‌ڵ سه‌رۆكى هه‌رێم كۆده‌كاته‌وه‌

دیمانه‌: ستیڤان شه‌مزینانی

* ئه‌وه‌ى ده‌وترىَ حزبى شیوعى پاشكۆى پارتییه‌ فووكردنه‌ به‌ قه‌وانێكى سواودا

* په‌یوه‌ندییه‌كانمان له‌گه‌ڵ بزووتنه‌وه‌ی گۆڕان وه‌ك پێویست نییه‌

* په‌یوه‌ندیى نێوان ئێمه‌ و گۆڕان له‌سه‌ر بنه‌ماى پشتئاشان دانانرىَ

* نامانه‌وىَ كۆمۆنیسته‌ كرێكارییه‌كان مامۆستامان بن له‌ بیركردنه‌وه‌دا

ته‌ها سڵێمان ئه‌ندامى كۆمیته‌ى ناوه‌ندیى حزبى شیوعى كوردستان و سه‌رپه‌رشتیارى هه‌فته‌نامه‌ى رێگاى كوردستان، له‌م دیمانه‌ تایبه‌ته‌دا باس له‌ هاوبۆچوونی حزبی شیوعی له‌گه‌ڵ سه‌رۆكی هه‌رێم ده‌كات، هاوكات باس له‌ ئه‌جیندا و تێڕوانینی حزبی شیوعی ده‌كات له‌مه‌ڕ قه‌یرانی عێراق و ئاستی په‌یوه‌ندییه‌كانی خۆیان له‌گه‌ڵ حزبه‌ كوردستانییه‌كان به‌تایبه‌ت پارتی و گۆڕان ئاشكرا ده‌كات.
ستیڤان: هه‌ندێك چاودێری سیاسیی به‌رده‌وام جه‌خت له‌وه‌ ده‌كه‌نه‌وه‌ كه‌ حزبی شیوعی بووه‌ به‌ پاشكۆی پارتی. ئه‌م بۆچوونه‌ زاده‌ی چییه‌؟
ته‌هاسڵێمان: ئه‌م پرسیاره‌ یه‌كه‌م جار نییه‌ ده‌كرىَ، به‌ڵكو به‌ بۆنه‌ و بێ بۆنه‌ ده‌كرىَ و هه‌ندىَ جار ده‌گاته‌ ئاستى ئه‌وه‌ى زیادڕۆیشى بۆ ده‌كرىَ. حزبى شیوعى كوردستان حزبێكى سه‌ربه‌خۆیه‌ و نه‌ك پارتى به‌ڵكو پاشكۆى هیچ حزبێكى تریش نییه‌. یان ده‌مه‌وىَ روونتر بڵێم له‌و حزبانه‌ى به‌رده‌وام هه‌ڵوێستى سه‌ربه‌خۆیانه‌ و سیاسه‌تى راست و دروستى خۆیان له‌مه‌ڕ تێكڕاى پرسه‌ نیشتمانى و نه‌ته‌وه‌ییه‌كان له‌لایه‌ك و كێشه‌ و گرفته‌كانى چین و توێژه‌كانى كۆمه‌ڵگا له‌لایه‌كى تر هه‌بووه‌، حزبى شیوعى كوردستان یه‌كێك بووه‌ له‌و حزبانه‌ و به‌رده‌وامیش بووه‌ له‌و فه‌لسه‌فه‌یه‌ى كاركردنى. ئیتر ئه‌وه‌ى ده‌وترىَ حزبى شیوعى كوردستان پاشكۆى پارتییه‌ یان فلاَنه‌ حزبه‌ ئه‌وه‌ فووكردنه‌ به‌ قه‌وانێكى سواودا، كه‌ جگه‌ له‌ دژایه‌تیكردنى حزبى شیوعى كوردستان و پڕۆژه‌ى كاركردنى گۆِرانكارییه‌ كۆمه‌لاَیه‌تییه‌كه‌ى هیچى تر نییه‌.
ستیڤان: حزبی شیوعی هه‌میشه‌ به‌رگریی له‌ هه‌ڵوێسته‌كانی بارزانی ده‌كات. پێتوانییه‌ ئه‌مه‌ هۆكاری ئه‌وه‌یه‌ كه‌ ده‌وترێت حزبی شیوعی بووه‌ته‌ پاشكۆی پارتی؟
ته‌ها سڵێمان: نا. نه‌خێر مه‌سه‌له‌كه‌ وانییه‌، ئه‌وه‌ ته‌نیا ئێمه‌ نین هاوڕا بووبێتین له‌گه‌ڵ بۆچوون یان هه‌ڵوێستێكى سه‌رۆكى هه‌رێم، به‌ڵكو ئه‌مه‌ بۆ هه‌موو حزبه‌ سیاسییه‌كان راسته‌ و پێشموایه‌ ناته‌واوییه‌ك یان ناهاوسه‌نگییه‌ك له‌م بواره‌دا نییه‌، چوونكه‌ ئه‌وه‌ وانییه‌ كه‌ له‌ پرسیاره‌كه‌دا هاتووه‌، به‌ڵكو ئه‌وه‌ په‌یوه‌ندیى به‌ كۆمه‌ڵێك پرس و بابه‌تى نیشتمانى و نه‌ته‌وه‌ییه‌وه‌ هه‌یه‌. بۆ نموونه‌ كه‌ى راسته‌ ئه‌گه‌ر پرسێكى نیشتمانى یان نه‌ته‌وه‌یى بێته‌ پێشه‌وه‌ ئێمه‌ وابیر بكه‌ینه‌وه‌ له‌ به‌ر ئه‌وه‌ى سه‌رۆكى هه‌رێم هه‌ڵوێستى وایه‌، پێویسته‌ ئێمه‌ پێچه‌وانه‌ى ئه‌و بیر بكه‌ینه‌وه‌؟.
كۆمه‌ڵێك هێڵى نیشتمانى و نه‌ته‌وه‌یى و هه‌ڵوێستى هاوبه‌ش هه‌یه‌، نه‌ك ته‌نیا حزبى شیوعى كوردستان و سه‌رۆكى هه‌رێم به‌ڵكو هه‌موو هێز و لایه‌نه‌ سیاسییه‌كان له‌ یه‌ك وێستگه‌دا كۆ ده‌كاته‌وه‌. بۆ نموونه‌ پرسى ناوچه‌ دابڕاوه‌كانى كوردستان، یان پرسى كه‌ركووك یاخود كێشه‌ هه‌ڵپه‌سێردراوه‌كانى نێوان به‌غداد و هه‌رێم، یان پرسى یه‌كڕیزیى و یه‌كده‌نگى ناوماڵى كوردستانى له‌سه‌ر كۆى مه‌ترسیى و هه‌ڕه‌شانه‌ى له‌سه‌رمانه‌، له‌ سه‌رووى هه‌وویانه‌وه‌ پرسى رزگاریى نیشتمانى یه‌كجاره‌كى و مه‌سه‌له‌ چاره‌نووسسازه‌ نه‌ته‌وه‌ییه‌كانه‌، ئه‌م پرسانه‌ن ئێمه‌ له‌گه‌ڵ سه‌رۆكى هه‌رێم و ته‌واوى هێز و لایه‌نه‌ سیاسییه‌كاندا له‌ یه‌ك وێستگه‌ یان یه‌ك سه‌نگه‌ر به‌ جیاوازیى بیروڕاشه‌وه‌ یه‌ك ده‌خات، نه‌ك بابه‌ت و پرسى ترى نابه‌باتى كه‌ لێكدانه‌وه‌ى بۆ ده‌كرىَ گوایه‌ ئێمه‌ ته‌نیا پشتگیریى سه‌رۆكى هه‌رێم ده‌كه‌ین.
ده‌مه‌وىَ ئه‌وه‌ش بڵێم ته‌نیا ئێمه‌ نین له‌گه‌ڵ سه‌رۆكى هه‌رێم له‌و مه‌سه‌لانه‌ هاوڕابین به‌ڵكو سه‌رۆكى هه‌رێمیش له‌گه‌ڵ زۆرێك له‌ بۆچوونه‌كانى ئێمه‌ هاوڕایه‌. له‌ كۆبوونه‌وه‌كانمان له‌گه‌ڵ سه‌رۆكى هه‌رێم كه‌ زۆربه‌ى حزبه‌ سیاسییه‌كان ئاماده‌ى ده‌بن، به‌ ره‌وانى بیر و بۆچوونى خۆمان وتووه‌، ته‌نانه‌ت ئه‌گه‌ر پێچه‌وانه‌ى بیر و بۆچوونه‌كانى سه‌رۆكى هه‌رێمیش بێت.
ستیڤان: كۆمۆنیسته‌ كرێكارییه‌كان پێیانوایه‌ حزبی شیوعی لاده‌ره‌ و نوێنه‌رایه‌تی چه‌پ و شیوعییه‌ت ناكات. وه‌لاَمی ئێوه‌ چییه‌ بۆ ئه‌و جۆره‌ بۆچوونه‌ له‌سه‌ر ئێوه‌؟.
ته‌ها سڵێمان: ئێمه‌ به‌ كه‌س ناڵێین لاده‌ر و مۆدێلى ئه‌وه‌ش به‌سه‌ر چووه‌ ناسنامه‌ى لاده‌ربوون و نالاده‌ربوون به‌م و به‌و ببه‌خشین، ئێمه‌ حزبێكى سیاسیین و ناسنامه‌ى فه‌لسه‌فى و فیكریمان رێبازى ماركسیزم و كولتوورى پێشكه‌وتووخوازیى ماركسییه‌ته‌. حزبى كۆمۆنیستى كرێكاریى كوردستانیش، به‌رنامه‌ى فیكریى و سیاسیى خۆیان هه‌یه‌. ئه‌گه‌ریش قسه‌ى ئه‌وان بۆ ئیمه‌ لاده‌ربوون بێت له‌ ماركسییه‌ت و شیوعییه‌ت، ئه‌وه‌ جۆرێك له‌ ناحاڵى بوون و تێڕوانینێكى عه‌ده‌میانه‌یه‌ و رابردوو و ئێستا و ئاینده‌ش ئه‌و راستییه‌ ده‌سه‌لمێنىَ، نه‌ك قسه‌ى ئه‌و به‌ڕێزانه‌.
له‌ بنه‌ڕه‌تیشدا، تێڕوانینى و خوێندنه‌وه‌ى ئه‌وان بۆ ماركسییه‌ت جۆرێكه‌ و تێڕوانین و خوێندنه‌وه‌ى ئێمه‌ش جۆرێكى تر. له‌م نێَوانه‌شدا ئاساییه‌ بیر و بۆچوونى جیاواز له‌سه‌ر كۆى ئاسته‌ فه‌لسه‌فى و فیكریى و چینایه‌تى و سیاسییه‌كان هه‌بىَ. ئه‌گه‌ر كه‌مێك بگه‌ڕێینه‌وه‌ بۆ سه‌ره‌تاى نه‌وه‌ده‌كان، ئه‌وكات كۆمۆنیسته‌كان (كرێكاریى) به‌ ئێمه‌یان ده‌وت ناسیۆنالیست له‌به‌ر ئه‌وه‌ى حزبى شیوعى كوردستانمان دروست كردووه‌، كه‌چى پاش چه‌ندین ساڵ ئه‌وان هاتن حزبى كۆمۆنیستى كرێكاریى كوردستانیان درووست كرد.
نموونه‌یه‌ك ده‌گێڕمه‌وه‌ له‌ ساڵى 1994 یان 1995 بوو له‌ سیمینارێك بووین، له‌ سه‌ر ویلایه‌تى موسڵ، براده‌رێكى كۆمۆنیستى كرێكاریى له‌ ئاستێكى بالاَ وتى (من هیچ قسه‌م له‌ سه‌ر ویلایه‌تى موسڵ نییه‌ له‌به‌ر ئه‌وه‌ى ماركس به‌ هیچ شێوه‌یه‌ك باسى نه‌كردووه‌)، ئه‌م نموونه‌یه‌م بۆ ئه‌وه‌ هێنایه‌وه‌ ئێمه‌ وه‌ك ئه‌وان له‌ ماركسییه‌ت ناڕوانین و نه‌مانوتووه‌ ئه‌وان وه‌ك ئێمه‌ بیر بكه‌نه‌وه‌ و ناشمانه‌وىَ ئه‌وان مامۆستامان بن له‌ بیركردنه‌وه‌ و ماركسییه‌تیش موڵكى ته‌نیا حزبى شیوعى كوردستان یان هه‌ر حزبێكى ترى شیوعى له‌ سه‌ر تاسه‌رى دنیا نییه‌، به‌ڵكو موڵكى سه‌رجه‌م مرۆڤایه‌تییه‌.
ستیڤان: هیچ په‌یوه‌ندییه‌كی راسته‌وخۆ و ناڕاسته‌وخۆ له‌نێوان حزبی شیوعی و بزووتنه‌وه‌ی گۆڕان به‌دی ناكرێت. ئایا ئه‌و بایكۆته‌ له‌لایه‌ن كام لاتانه‌وه‌یه‌؟.
ته‌ها سڵێمان: راسته‌ په‌یوه‌ندییه‌كانمان له‌و ئاسته‌ نییه‌، وه‌ك پێویست بێت، به‌لاَم ماناى ئه‌وه‌ نییه‌ هه‌ر نیمانه‌، لاوازیى په‌یوه‌ندیى نێوان حزبى شیوعى كوردستان و بزووتنه‌وه‌ى گۆڕان بۆ هه‌ردوولامان ده‌گه‌ڕێته‌وه‌. ئێمه‌ له‌ كۆنگره‌ى پێنجه‌مى حزبى شیوعى كوردستان كه‌ له‌ ناوه‌ڕاستى مانگى 7-2012 به‌ستمان گفتوگۆى ته‌واوى لایه‌نه‌ پۆزه‌تیف و نێگه‌تیفه‌كانى په‌یوه‌ندییه‌كانمان كرد، به‌ بزووتنه‌وه‌ى گۆڕانیشه‌وه‌. هاوكات بزووتنه‌وه‌ى گۆڕان یه‌كێك بوو له‌و هێزانه‌ى بروسكه‌ى پیرۆزبایى و سه‌ركه‌وتنیان بۆ كۆنگره‌كه‌مان ناردبوو. له‌به‌رنامه‌ماندایه‌ په‌یوه‌ندییه‌كانمان له‌گه‌ڵ هه‌موو هێز و لایه‌نه‌ سیاسییه‌كان به‌هێزتر بكه‌ین به‌ بزووتنه‌وه‌ى گۆڕانیشه‌وه‌.
ستیڤان: هه‌ندێك له‌ چاودێرانی سیاسیی ده‌ڵێن حزبی شیوعی له‌ تاوانی پشتئاشان خۆش بووه‌ و ته‌نیا هه‌ڵوێستیان بایكۆتكردنی په‌یوه‌ندییه‌ له‌گه‌ڵ رێكخه‌ری گۆڕان. ئه‌مه‌ تا چه‌ند راسته‌؟.
ته‌ها سلێمان: نا. نه‌خێر ئه‌و مه‌سه‌له‌یه‌ وانییه‌ و مه‌سه‌له‌ى پشئاشان شتێكه‌ و مه‌سه‌له‌ى په‌یوه‌ندیى له‌گه‌ڵ بزووتنه‌وه‌ى گۆڕان شتێكى تر و به‌ هیچ شێوه‌یه‌كیش په‌یوه‌ندیى به‌ كاك نه‌وشیروانه‌وه‌ نییه‌. تێكه‌ڵكردنى ئه‌م دوو بابه‌ته‌ش له‌ بنه‌ڕه‌تدا راست نییه‌ و ئامانجى جیاجیاى له‌ پشته‌وه‌یه‌. پشتئاشانیش وێستگه‌یه‌كى تاڵه‌ هه‌م بۆ ئێمه‌ى شیوعییه‌كان و هه‌م بۆ بزووتنه‌وه‌ى رزگاریخوازى گه‌لى كوردستان، كه‌سیش له‌ ئێمه‌ ته‌مه‌ناى دووباره‌ بوونه‌وه‌ى ناكه‌ین. ئه‌گه‌ریش مه‌سه‌له‌كه‌ به‌رپرسیارێـتى مێژوویى بێت له‌و وێستگه‌ تاڵه‌ یه‌ك كه‌س نییه‌ و به‌رپرسیارێتى به‌ كۆمه‌ڵ هه‌یه‌. په‌یوه‌ندیى نێوان ئێمه‌ و بزووتنه‌وه‌ى گۆڕانیش له‌ سه‌ر بنه‌ماى پشتئاشان دانانرىَ، به‌ڵكو له‌ سه‌ر بنه‌ماى هه‌ڵوێست و روانینى هاوبه‌ش بۆ تێكڕاى مه‌سه‌له‌ نیشتمانى و نه‌ته‌وه‌یى و كێشه‌ و گرفته‌كانى خه‌ڵك داده‌نرێ.
ستیڤان: خوێندنه‌وه‌تان چییه‌ بۆ قه‌یرانی ئێستای عێراق؟. پێتانوانییه‌ مالیكی جارێكی دیكه‌ عێراق به‌ره‌و دیكتاتۆریی ده‌باته‌وه‌؟
ته‌ها سڵێمان: ئه‌و نموونه‌یه‌ى كه‌ مالیكى و هاوشێوه‌كانى سیستمى حكومڕانى پىَ به‌ ڕێوه‌ ده‌به‌ن، نموونه‌یه‌كى نامۆ نییه‌ له‌ ناوچه‌كه‌ به‌ گشتیى و عێراق به‌ تایبه‌ت و مێژوویه‌كى دوور و درێژى هه‌یه‌. ئێمه‌ پێش رووخان و له‌ ناوبردنى رژێمى به‌عس، له‌ جارێك زیاتر ئه‌وه‌مان دووپات كردووه‌ته‌وه‌، پێویسته‌ عێراق له‌سه‌ر بنه‌ما سه‌ره‌كییه‌كانى دیموكراسى بنیاد بنرىَ، ئه‌مه‌مان دواى رووخان له‌ گووتارى ئاڕاسته‌كراوماندا به‌ روونى شیكردووه‌ته‌وه‌ و مكوڕیمان له‌سه‌ر ئه‌وه‌ كردووه‌ته‌وه‌ نابىَ عێراق له‌سه‌ر بنه‌ماى ئاین و مه‌زهه‌ب و خێڵ بنیاد بنرێته‌وه‌. به‌لاَم له‌ واقیعدا ئه‌وه‌ى ئێستا به‌ سه‌لمێنراویى و به‌رجه‌سته‌كراویى ده‌یبینین، نموونه‌یه‌كه‌ به‌ره‌و حكومى شمولى و تاكڕه‌ویى، ئه‌مه‌ش بۆ خۆى رێگا خۆش ده‌كات به‌ره‌و ده‌سه‌لاَتى دیكتاتۆرییانه‌.
هه‌ر په‌یوه‌ست به‌مه‌ ئێمه‌ پێمانوایه‌ گرفتى بنه‌ڕه‌تى له‌ ناوه‌ڕۆكى سیستمى حكومڕانییه‌ له‌ عێراقدا، یانى به‌ بینین و لێكدانه‌وه‌یه‌كى تر، ئه‌وه‌ سیستمى حكومڕانییه‌ له‌ عێراقدا، به‌رده‌وام تاكڕه‌ویى و دیكتاتۆرییه‌ت به‌رهه‌م دێنىَ، به‌م واتایه‌ش ئه‌گه‌ر گۆِرانكاریى جه‌وهه‌ریى له‌ سیسته‌مى حكومڕانى عێراقدا نه‌كرىَ، ئه‌وه‌ى دواى مالیكیش دێت هه‌مان سیاسه‌تى مالیكى دووباره‌ ده‌كاته‌وه‌. ئه‌مه‌ جگه‌ له‌وه‌ى نموونه‌ى ده‌سه‌لاَت و ئاڕاسته‌ى كاركردنه‌كانى به‌ شێوه‌یه‌ك له‌ شێوه‌كان، هه‌وڵدانه‌ بۆ جێكردنه‌وه‌ى نموونه‌ى سیستمى حكومڕانى ئێران له‌ ناو جومگه‌كانى سیسته‌مى حكومڕانى عێراقدا.
واتا ئێمه‌ هێشتا له‌ كۆت و به‌ندى سیستمێكى حكومڕانى شمولى قووتارمان نه‌بووه‌، هه‌وڵ ده‌درىَ به‌ كۆمه‌لێك تووخم و ره‌گه‌زى حكومڕانییه‌كى شمولى مه‌زهه‌بى، ئاڕاسته‌ى تاكڕه‌ویى و دیكتاتۆرییه‌ت به‌هێزتر بكرىَ و كاراكته‌رى سه‌ره‌كى ئه‌م یارییه‌ش ته‌نیا مالكى نییه‌ به‌ڵكو هێزى سیاسیى شیعه‌ مه‌زهه‌ب له‌لایه‌ك و هێزى سیاسیى سووننه‌ مه‌زهه‌ب و شۆڤێنى تریشه‌ به‌ ئه‌جێنداى تایبه‌تى خۆیان له‌لایه‌كى تر. هه‌موو ئه‌مانه‌ش عێراق به‌ره‌و تاكڕه‌ویى و دیكتاتۆرییه‌ت ده‌به‌نه‌وه‌ نه‌ك به‌ ئاڕاسته‌ى دیموكراسى ببه‌ن.
ستیڤان: مه‌ترسییه‌كانی هێزی دیجله‌ له‌سه‌ر كورد به‌ گشتیی و كه‌ركووك به‌ تایبه‌تی چۆن ده‌بینن؟.
ته‌ها سڵێمان: به‌ پێى ده‌ستوور و ئه‌و رێككه‌وتنانه‌ى له‌ نێوان حكوومه‌تى ناوه‌ندیى و حكوومه‌تى هه‌رێمى كوردستاندا هه‌یه‌، بۆ كه‌ركووك و ناوچه‌ دبڕاوه‌كانیش به‌ رێككه‌وتن و هاوبه‌ش هێزه‌ ئه‌منییه‌كان یان سه‌ربازیى رێكده‌خرێن و ده‌جوڵێنرێن، به‌لاَم پێكهێنانى فه‌رمانده‌ى ئۆپه‌راسیۆنه‌كانى دیجله‌ كه‌ له‌ هه‌ردوو فیرقه‌ى سه‌ربازیى (12و5) پێكدىَ و به‌ فه‌رمانى راسته‌وخۆى سه‌رۆكى ئه‌نجوومه‌نى وه‌زیران (نورى مالیكى) پێكهێنراوه‌ و به‌عسییه‌كى داواكراو، (عه‌بدلئه‌میر ره‌زا زه‌یدى) فه‌رمانده‌ى پێشووى فیرقه‌ى (12) وه‌ك فه‌رمانده‌ى یه‌كه‌مى دانراوه‌، به‌ بىَ پرس و راوێژى حكوومه‌تى هه‌رێمى كوردستان كراوه‌.
مه‌ترسییه‌كه‌ش لێره‌وه‌ ده‌ست ده‌ست پێده‌كات و ئامانج له‌ پشت پێكهێنانى ئه‌م هێزه‌ زیاتر له‌وه‌ى ئامانجێكى ئه‌منى بێت بۆ چاره‌سه‌رى ره‌وشى كه‌ركووك و به‌شێك له‌ ناوچه‌ دابڕاوه‌كان، ئامانجێكى سیاسییه‌. بۆ نموونه‌ دوورخستنه‌وه‌ى هێزه‌كانى ئاسایش و پۆلیسى كه‌ركووك و خودى پارێزگار و ئیداره‌ى كه‌ركووك له‌ پێكهاته‌ى پێكهێنانى فه‌رمانده‌یى دیجله‌، ئامانجه‌كان و مه‌ترسییه‌كانى پشت درووستكردنى ئه‌م هه‌نگاوه‌ ده‌خه‌نه‌ڕوو. بۆیه‌ له‌ كاتى خۆى و به‌ روونى ئێمه‌ وه‌ك حزبى شیوعى كوردستان بۆچوون و قسه‌ى خۆمانمان چ له‌ كۆبوونه‌وه‌ له‌گه‌ڵ سه‌رۆكى هه‌رێم و چ له‌ راگه‌یاندن بلاَو كرده‌وه‌ و جه‌ختمان له‌ سه‌ر ئه‌وه‌ كرده‌وه‌، كه‌ نابىَ به‌هیچ شێوه‌یه‌ك قبوڵ بكرىَ.
ستیڤان: پێتانوایه‌ قه‌یرانی عێراق به‌ ته‌نیا به‌ شه‌خسی تاڵه‌بانی چاره‌ ده‌كرێت؟ به‌ كورتی ئایا تاڵه‌بانی ده‌توانێت عێراق له‌م قه‌یرانه‌ ده‌رباز بكات؟.
ته‌ها سڵێمان: سه‌رۆك كۆمارى عێراق مام جه‌لال له‌ هه‌موو كێشه‌ و قه‌یرانه‌كانى عێراق رۆڵى گرنگ و باشى هه‌بووه‌، ئێستاش هه‌مان كاریگه‌ریى و رۆڵى ماوه‌، به‌لاَم ئه‌مه‌ ماناى ئه‌وه‌ نییه‌ هه‌موو كێشه‌یه‌ك یان قه‌یرانێك كه‌ دێته‌ پێشه‌وه‌، یان ئه‌و قه‌یرانه‌ى به‌ شێوه‌یه‌كى به‌رده‌وام له‌ عێراق بوونى هه‌یه‌، هه‌مووى به‌ مام جه‌لال چاره‌سه‌ر ده‌بێت. چوونكه‌ قه‌یرانى عێراق قه‌یرانێكى هه‌مه‌لایه‌نه‌ و له‌ سه‌رووى هه‌موویانه‌وه‌، قه‌یرانى سیستمى حكومڕانى كه‌ ئه‌مه‌ش ته‌نیا په‌یوه‌ندیى به‌ تواناكانى تاڵه‌بانییه‌وه‌ نییه‌، به‌ڵكو په‌یوه‌ندیى به‌ چه‌ندین هۆكارى ناوه‌كیى و ده‌ره‌كیى هه‌یه‌.

 

Share