Red Purple Black
Kurdistanigawre@gmail.com
هەڵمەتێك بۆ هەفتەی سەربەخۆیی كوردستان

kurrdistanوەڵامێك بۆ هەڵوێستی ئێستای حكومەتی عێراق دەربارەی كوردستان و هاتنە ئارای توند و تیژی و كاری تێكدەرانە لە پایتەخت

وەڵامێك بۆ باڵیۆز و كونسوڵی ئێران لە بەغدا و هەولێر

ئێمە وەکو کۆمەڵێک نووسەر و رۆشنبیر و هاوڵاتی کورد لە ناوەوە و دەرەوەی کوردستان، وا هەست دەکەین کە ئەگەر سەرکردایەتی سیاسی کوردەوە هەنگاوێکی جیدی نەهاوێژرێ بۆ دوا ئامانجی نەتەوەکەمان کە(سەربەخۆیی کوردستان)ە، گەورەترین هەلی زێڕین لە کیسمان دەچێت. بە پێشکەوتنە سیاسی و هاوکێشە سیاسیەکانی رۆژهەڵاتی ناوەڕاست و ئەو وڵاتانەی کوردستانیان بەسەردا دابەشکراوە پێمان دەڵێن کە ئێستا کاتی وەدیهێنانی خەونە دێرینەکانی 2700 ساڵەی نەتەوەی کوردە، هاوکات لەو کیانەی کە ئێستا هەمانە بەهۆی یەک سەنگەری لایەنە عەرەبەکان و پلانەکانیان وا خەریکە کورد دەخەنە پەراوێزەوە و دیسانەوە دەیانەوێت لە خشتەمان ببەنەوە، بەمەش ئێمەی کورد تەنها دەبینەوە پاشکۆی نەتەوەی سەردەست و (نەتەوەی کورد بێ بەش دەکرێت لە ئازادی). هاوکات دەستدرێژیەکانی ئیران و تورکیا بە بیانووی بوونی پژاک و پەکەکە لە سنورەکانەوە بە پلانێکی (نەخشەڕێژکراوی داگیرکەران) دەزانین کە دەخوازن ئەم هێرشانە وەکو کارتێک بەکاربهێنن بۆ لاوازکردنی سەنگی کورد لە جیهان و عێراقدا.

بۆیە ئەم بانگەواز و چالاکیە لەم کاتەدا ڕادەگەیەنین چونکە جارێکی تر بارودووخی باشووری کوردستان خەریکە بەرەو ئاڵۆزی دەڕوات و عێراق سەر لە نوێ لە لایەن ئەمریکا و جیهانەوە نەخشەیەکی تازە بۆی دادەنرێت. هاوکات ڕۆژهەلاتی ناوەڕاست و تورکیا و ئێران و سوریا لە قەیرانێکی جیهانی گەورەدان. ئەگەر کوردستان و ناوەندەکانی بڕیار وشیارانە مامەڵە لە گەڵ ئەم گۆڕانکارایانە نەکەن ئەوە دوور نییەرۆژە رەشەکانی تری مێژووی رابردوومان خۆیان دووبارە بکەنەوە. ئێمە پێمان وایە ڕاگەیاندنی سەربەخۆیی بۆ کوردستان کێشەی کورد لە جیهاندا بەرەو پێش دەبات نەک لاواز دەکات. ئەوە بیرۆکەکانی ئۆتۆنۆمی و فێدارلی و لکاندنی پارچەکانی کوردستان بە عێراق، ئێران، تورکیا و سوریاوە دێن ڕێگا دەگرن لە بەردەم بەدەستهێنانی هەتا (ئۆتۆنۆمی)ش بۆ کوردستان. پێمان وایە کورد دەبێ ڕوو لە نەتەوە یەکگرتوەکان و ئەورپا و وڵاتە بڕیاربەدەستەكان و جیهان بکات لە جیاتی ئەوەی ڕوو لە ئەنقەرە و تاران و بەغدا و دیمەشق بکات. ئێمە پێمان وایە ڕاگەیاندنی سەربەخۆیی کوردستان (ئۆتۆنۆمی و فێدرالی) گەرەنتی دەکات نەک بە پێچەوانەوە. کەواتە ئەگەر هەتا دەسەڵاتدارانی کورد فێدرالیان بوێت دەبێ داوای سەربەخۆیی بکەن بۆ ئەوەی فێدڕالی بەدەست بێنن) .

هاوکات لەگەڵ بوونی هەموو ئەو مەترسیە گەورانە و دەرفەتە زێڕینانە کە ئەمڕۆ هاتۆتە پێشمان رۆشنبیران و ناوەندە سیاسیەکان خۆیان بە سووک کردن و تەشهیرکردنی یەکتر و شەڕە جنێو و کاری لاوەکیەوە سەرقاڵ کردووە و لەو لاشەوە هەستی كەسانی ئایینی و توندڕۆش بۆ سەرجەم ئەو مەرامانە بەكاردێت و بەو شێوەیە ڕێڕەوی ململانێی کورد لە گەڵ داگیرکەرانیان لاوازکردوە ، بۆیە ئێمە داواکارین لە بەڕێزتان هاودەنگمان بن بۆ سەرخستنی ئەو پڕۆژەیە بۆ ئەوەی هەوڵ بدەین لەو هەفتەیە هەر نووسەر و رۆشنبیر و گروپ و رێکخراو و کۆمەڵە و حزبێک هەڵوێستی خۆی بە نووسین و کۆنفرانس و سیمینار و رێپێوان و چالاکی تر دەرببڕێت، تاوەکو سەرکردایەتی سیاسی کوردی بەدەنگ دێت، تاوەکو تەکانێک بە هەستی نەتەوەیی و سەربەخۆیی کوردستان بدەین، و هاوکات میدیا ی کوردی و حزبەکان و ڕۆشەنبیران و نووسەران و ڕۆژنامنووسان زیاتر خەریکی کێشە نەتەوایەتیەکان بن نەک شەڕی ڕاگەیاندنی ناوخۆ و با شەقامی سیاسی کوردی بە ئاگا بێت و دەنگی کپکراومان بە گوێی هەموو دونیادا بچرپێنین. هەفتەی سەربەخۆیی کوردستان بۆ ئەوەیە هەڵوێستی هەموو رۆشنبیران و گروپ و کۆمەڵە و رێکخراو و حزبەکان بۆ کۆمەڵگای کوردی رۆن بێتەوە، بۆیە چاوەڕوانی وەڵامی هەموو لایەکتان دەکەین. بۆیه‌ به‌ باشی ده‌زانین له‌ 11-5-2012 تاوه‌کو 18-5-2012 وه‌ک پڕۆژه‌ی هه‌فته‌ی راگه‌یاندنی سه‌ربه‌خۆیی کوردستان ڕاده‌گه‌یه‌نین و چاوه‌ڕوانی وه‌ڵامی هه‌موو لایه‌کتان ده‌که‌ین که‌ له‌و هه‌فته‌یه‌دا بویرانه‌ و نه‌ته‌وه‌ییانه‌ قسه‌ی خۆتان هه‌بێت و غیره‌تێک بده‌ینه‌ به‌ر ده‌سه‌ڵاتی کوردی.

Share